ಧೋತಿ ಎಂಬುದು ಭಾರತದ ಹಲವಾರು ರಾಜ್ಯಗಳಲ್ಲಿ ಪುರುಷರು ತೊಡುವ ಸಾಂಪ್ರದಾಯಿಕ ಉಡುಪಾಗಿದೆ. ಇದು ಹೊಲಿಗೆ ಹಾಕದ ಬಟ್ಟೆಯ ಉದ್ದನೆಯ ತುಂಡು ಆಗಿದೆ. ಧೋತಿಯು ಸೊಂಟ ಮತ್ತು ತೊಡೆಗಳ ಸುತ್ತ ಸುತ್ತಿಕೊಂಡಾಗ ಮತ್ತು ಒಂದು ತುದಿಯನ್ನು ಕಾಲುಗಳ ನಡುವೆ ಇರಿಸಿ ಸೊಂಟದ ಬ್ಯಾಂಡ್ ಗೆ ಸಿಕ್ಕಿಸಿದಾಗ ಇದು ಬ್ಯಾಗಿ ಪ್ಯಾಂಟ್ ಅನ್ನು ಹೋಲುತ್ತದೆ. ಪ್ರತಿ ವರ್ಷ ಜನವರಿ 6 ರಂದು ವಿಶ್ವ ಧೋತಿ ದಿನವನ್ನು ಆಚರಿಸಲಾಗುತ್ತದೆ.
ಧೋತಿಯ ಇತಿಹಾಸ ಮತ್ತು ಸಾಂಸ್ಕೃತಿಕ ಮಹತ್ವ: ಇದು 'ಧೌತ' ಎಂಬ ಸಂಸ್ಕೃತ ಪದದಿಂದ ಹುಟ್ಟಿಕೊಂಡ ಪದವಾಗಿದೆ. ಇದನ್ನು ಕೇರಳದ ಮುಂಡು, ಮಹಾರಾಷ್ಟ್ರದಲ್ಲಿ ಧೋತರ್, ಪಂಜಾಬಿಯಲ್ಲಿ ಲಾಚಾ ಮತ್ತು ಉತ್ತರ ಪ್ರದೇಶ ಮತ್ತು ಬಿಹಾರದಲ್ಲಿ ಮರ್ದಾನಿ ಸೇರಿದಂತೆ ಹಲವಾರು ಭಾರತೀಯ ರಾಜ್ಯಗಳಲ್ಲಿ ವಿವಿಧ ಪ್ರಾದೇಶಿಕ ಹೆಸರುಗಳಿಂದ ಕರೆಯಲಾಗುತ್ತದೆ. ಇದು ಭಾರತದಲ್ಲಿ ಪುರುಷರು ಧರಿಸುವ ಸಾಂಪ್ರದಾಯಿಕ ಉಡುಗೆಯಾಗಿದೆ. ಇದರ ಮೂಲವನ್ನು ಪ್ರಾಚೀನ ಭಾರತದಲ್ಲಿ ಗುರುತಿಸಬಹುದು. ಆಗ ಗಣ್ಯರು ಮತ್ತು ಮೇಲ್ವರ್ಗದವರು ಇದನ್ನು ಧರಿಸುತ್ತಿದ್ದರು. ಧೋತಿಯನ್ನು ರೇಷ್ಮೆ ಅಥವಾ ಹತ್ತಿಯಿಂದ ನಿರ್ಮಿಸಲಾಗುತ್ತಿತ್ತು ಮತ್ತು ಆಗ ಒಂದು ನಿರ್ದಿಷ್ಟ ರೀತಿಯಲ್ಲಿ ಇದನ್ನು ಉಡಲಾಗುತ್ತಿತ್ತು.
ಧೋತಿ ಕಾಲಾನಂತರದಲ್ಲಿ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಗುರುತಿನ ಸಂಕೇತವಾಗಿ ವಿಕಸನಗೊಂಡಿತು. ಇದು ಧಾರ್ಮಿಕ ಆಚರಣೆಗಳು, ಮದುವೆಗಳು ಮತ್ತು ಇತರ ಔಪಚಾರಿಕ ಸಂದರ್ಭಗಳಿಗೆ ಅಗತ್ಯವಾದ ಸಾಂಪ್ರದಾಯಿಕ ಉಡುಗೆಯಾಗಿದೆ. ಇದನ್ನು ಭಾರತದ ಹಲವಾರು ಭಾಗಗಳಲ್ಲಿ ದೈನಂದಿನ ಉಡುಗೆಯಾಗಿ ಧರಿಸಲಾಗುತ್ತದೆ. ಶ್ರೀಲಂಕಾ, ಬಾಂಗ್ಲಾದೇಶ ಮತ್ತು ಮಾಲ್ಡೀವ್ಸ್ ಸೇರಿದಂತೆ ವಿವಿಧ ರಾಷ್ಟ್ರಗಳ ಸಾಂಪ್ರದಾಯಿಕ ವೇಷಭೂಷಣದ ಭಾಗವಾಗಿತ್ತು ಮತ್ತು ಈಗಲೂ ಹಾಗೆಯೇ ಪರಿಗಣಿಸಲ್ಪಟ್ಟಿದೆ. ಆರಂಭದಲ್ಲಿ, ಇದನ್ನು ಕುರ್ತಾದೊಂದಿಗೆ ಮಾತ್ರ ಧರಿಸಲಾಗುತ್ತಿತ್ತು. ಧೋತಿಯನ್ನು ಗೌರವ ಮತ್ತು ಘನತೆಯ ಸಂಕೇತವಾಗಿಯೂ ಪರಿಗಣಿಸಲಾಗುತ್ತದೆ.
ಧೋತಿಯ ಬಟ್ಟೆಯ ಬಗ್ಗೆ : ಧೋತಿಯನ್ನು ಭಾರತ, ಪಾಕಿಸ್ತಾನ, ಬಾಂಗ್ಲಾದೇಶ ಮತ್ತು ಶ್ರೀಲಂಕಾದಲ್ಲಿ ಔಪಚಾರಿಕ ಉಡುಗೆ ಎಂದು ಪರಿಗಣಿಸಲಾಗಿದೆ. ಈ ಉಡುಪು ಪ್ರಾಥಮಿಕವಾಗಿ ಬಿಳಿ ಅಥವಾ ಕೆನೆ ಬಿಳಿ ಬಣ್ಣದಲ್ಲಿ ಇರುತ್ತದೆ. ಈ ಬಟ್ಟೆಯನ್ನು ಹತ್ತಿ ಅಥವಾ ರೇಷ್ಮೆಯಿಂದ ತಯಾರಿಸಬಹುದು. ಇದನ್ನು ಸಾಮಾನ್ಯವಾಗಿ ದಕ್ಷಿಣದ ರಾಜ್ಯಗಳಲ್ಲಿ ಹೆಚ್ಚಾಗಿ ಚಿನ್ನದ ಅಂಚಿನೊಂದಿಗೆ ತಯಾರಿಸಲಾಗಿರುತ್ತದೆ. ಚಿನ್ನದ ಅಂಚು ಶ್ರೀಮಂತ ಮತ್ತು ಆಕರ್ಷಕ ನೋಟವನ್ನು ನೀಡುತ್ತದೆ. ಸಾಮಾನ್ಯವಾಗಿ, ಈ ಉಡುಪನ್ನು ತಯಾರಿಸಲು 5 ಗಜ ಉದ್ದದ ಬಟ್ಟೆಯ ಪಟ್ಟಿಗಳನ್ನು ಬಳಸಲಾಗುತ್ತದೆ. ದಕ್ಷಿಣದ ದೇಶಗಳಲ್ಲಿ, ಈ ಉಡುಪನ್ನು ಸುಮಾರು ಐದು ನಾಟ್ ಗಳಿಂದ ಸುತ್ತಲಾಗುತ್ತದೆ. ಪ್ರತಿಯೊಂದು ದೇಶವು ತನ್ನದೇ ಆದ ಫ್ಯಾಷನ್ ಪ್ರಜ್ಞೆಯನ್ನು ಹೊಂದಿದೆ. ಭಾರತದ ಇತರ ಭಾಗಗಳಲ್ಲಿ ಇದನ್ನು ಸಾಮಾನ್ಯವಾಗಿ ದಕ್ಷಿಣದಲ್ಲಿ ಕಂಡುಬರುವ ಸ್ಕರ್ಟ್ ಪ್ರಕಾರಕ್ಕಿಂತ ಪ್ಯಾಂಟ್ ಶೈಲಿಯಲ್ಲಿ ಧರಿಸಲಾಗುತ್ತದೆ. ಧೋತಿಯ ಒಂದು ಭಾಗವನ್ನು ಹಿಂದೆ ಕಟ್ಟಲಾಗಿರುತ್ತದೆ. ಹೀಗಾಗಿ ಇದು ಪ್ಯಾಂಟ್ ನ ನೋಟವನ್ನು ನೀಡುತ್ತದೆ. ಹತ್ತಿ ಧೋತಿಗಳು ಮೃದುವಾದ ವಿನ್ಯಾಸದಿಂದಾಗಿ ಬೇಸಿಗೆಯಲ್ಲಿ ಧರಿಸಲು ಸೂಕ್ತವಾಗಿವೆ.
ಧೋತಿ ಬೆಳೆದು ಬಂದ ಬಗೆ: ಧೋತಿ ಜಗತ್ತು ಸಾಕಷ್ಟು ಬದಲಾವಣೆಯನ್ನು ಕಂಡಿದೆ. ಸಾಂಪ್ರದಾಯಿಕ ಉಡುಪನ್ನು ಇನ್ನೂ ಸಮಾಜದ ವಿವಿಧ ವಲಯಗಳಲ್ಲಿ ಧರಿಸಲಾಗುತ್ತದೆ; ಅದೇನೇ ಇದ್ದರೂ, ಹಲವಾರು ಸುಧಾರಣೆಗಳು ಮತ್ತು ಪಾಶ್ಚಾತ್ಯೀಕರಣಗಳು ಧೋತಿ ಪ್ಯಾಂಟ್ ಗಳ ಜಗತ್ತನ್ನು ಸೃಷ್ಟಿಸಿವೆ. ಧೋತಿಯ ರಚನೆಯು ಪಾಶ್ಚಿಮಾತ್ಯ ಪ್ಯಾಂಟ್ ಗಳೊಂದಿಗೆ ವಿಲೀನಗೊಂಡಿದೆ.
ಎಲ್ಲ ಕಾಲಕ್ಕೂ ಒಗ್ಗುವ ಧೋತಿ: ಧೋತಿ ಧರಿಸಲು ಬಹುತೇಕ ಎಲ್ಲಾ ಋತುಗಳಿಗೆ ಸೂಕ್ತವಾಗಿದೆ. ರೇಷ್ಮೆ ಮತ್ತು ಹತ್ತಿ ಎರಡರಲ್ಲೂ ಇವು ಲಭ್ಯವಿರುವುದರಿಂದ ಆಯಾ ಕಾಲಮಾನಕ್ಕೆ ತಕ್ಕಂತೆ ನೀವಿದನ್ನು ಧರಿಸಬಹುದು. ರೇಷ್ಮೆಯ ಧೋತಿಗಳನ್ನು ಪ್ರಾಥಮಿಕವಾಗಿ ಸಾಂಪ್ರದಾಯಿಕ ಆಚರಣೆಗಳು ಮತ್ತು ಮದುವೆಗಳಲ್ಲಿ ಬಳಸಲಾಗುತ್ತದೆ. ಹತ್ತಿಯ ಧೋತಿಗಳನ್ನು ದಿನನಿತ್ಯ ಉಡಲು ಬಳಸಲಾಗುತ್ತಿದೆ.
ಧೋತಿಯ ಸಾಂಪ್ರದಾಯಿಕ ಮತ್ತು ಸಮಕಾಲೀನ ಉಪಯೋಗಗಳು:
- ಧೋತಿ ಮದುವೆಗಳು ಮತ್ತು ಹಬ್ಬಗಳಂತಹ ಧಾರ್ಮಿಕ ಆಚರಣೆಗಳ ಸಮಯದಲ್ಲಿ ಧರಿಸುವ ಸಾಂಪ್ರದಾಯಿಕ ಉಡುಗೆಯ ಅತ್ಯಗತ್ಯ ಭಾಗವಾಗಿದೆ.
- ಧೋತಿಗಳನ್ನು ವ್ಯವಹಾರಿಕ ಸಭೆಗಳು ಮತ್ತು ಸಮ್ಮೇಳನಗಳಂತಹ ಔಪಚಾರಿಕ ಸಂದರ್ಭಗಳಲ್ಲಿಯೂ ಧರಿಸಲಾಗುತ್ತದೆ.
- ಧೋತಿಯನ್ನು ಭಾರತದ ವಿವಿಧ ಭಾಗಗಳಲ್ಲಿ, ವಿಶೇಷವಾಗಿ ವಯಸ್ಸಾದ ಪುರುಷರು ದೈನಂದಿನ ಉಡುಗೆಯಾಗಿ ಧರಿಸುತ್ತಾರೆ.
- ಇತ್ತೀಚಿನ ವರ್ಷಗಳಲ್ಲಿ ಧೋತಿ ಫ್ಯಾಷನ್ ಉಡುಪಾಗಿ ಮಾರ್ಪಟ್ಟಿದೆ.
ಧೋತಿ ಕೇವಲ ಬಟ್ಟೆಯ ತುಂಡು ಮಾತ್ರವಲ್ಲದೆ, ಇದು ಪರಂಪರೆ ಮತ್ತು ಸಂಪ್ರದಾಯದ ಸಂಕೇತವಾಗಿದೆ. ಇದು ಸುದೀರ್ಘ ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಮಹತ್ವವನ್ನು ಹೊಂದಿದೆ. ಧೋತಿ ಕಳೆದ ಅನೇಕ ವರ್ಷಗಳಲ್ಲಿ ಹಲವಾರು ಬದಲಾವಣೆಗಳಿಗೆ ಒಳಗಾಗಿದೆ. ಪ್ರತಿ ಪೀಳಿಗೆಯೊಂದಿಗೂ ಧೋತಿ ಬದಲಾಗಿದೆ. ಧೋತಿ ಆರಾಮದಾಯಕ ಮತ್ತು ಸೊಗಸಾದ ಉಡುಪಾಗಿದ್ದು, ಧಾರ್ಮಿಕ ಸಮಾರಂಭಗಳಲ್ಲಿ ಅಥವಾ ದೈನಂದಿನ ಉಡುಗೆಯಾಗಿ ಧರಿಸಬಹುದು.
ಇದನ್ನೂ ಓದಿ : ಪಶ್ಚಿಮ ಬಂಗಾಳದಲ್ಲಿ ಇಡಿ ಅಧಿಕಾರಿಗಳ ಮೇಲೆ ದಾಳಿ: ಕ್ರಮದ ಎಚ್ಚರಿಕೆ ನೀಡಿದ ರಾಜ್ಯಪಾಲ
