ಕೊಲ್ಕತ್ತಾ: ಸರ್ಕಾರಿ ಕೆಲಸ ಕೊಡಿಸುವುದಾಗಿ ನಕಲಿ ಕ್ಯಾಂಪೇನ್ ಮಾಡುತ್ತಿದ್ದ ಬಿಜೆಪಿ ನಾಯಕ ಸುವೆಂದು ಅಧಿಕಾರಿಯ ಆಪ್ತ ರಖಾಲ್ ಬೇರಾ ಎಂಬಾತನನ್ನು ನಗರದ ಮನಿಕ್ತಾಲ ಪ್ರದೇಶದಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಈತ ಪಶ್ಚಿಮ ಬಂಗಾಳ ನೀರಾವರಿ ಇಲಾಖೆಯಲ್ಲಿ ಕೆಲಸ ಕೊಡಿಸುವುದಾಗಿ ವ್ಯಕ್ತಿಯೊಬ್ಬರಿಂದ 2 ಲಕ್ಷ ರೂಪಾಯಿ ಪಡೆದಿದ್ದಾನೆ ಎಂದು ಆರೋಪಿಸಲಾಗಿದೆ.
ಯಾಸ್ ಚಂಡಮಾರುತದಿಂದಾಗಿ ರಾಜ್ಯದಲ್ಲಿ ಹಲವು ನದಿಯ ಒಡ್ಡುಗಳು ಹಾನಿಗೊಳಗಾಗಿವೆ. ಈ ಬಗ್ಗೆ ತನಿಖೆ ನಡೆಸುವಂತೆ ಸಿಎಂ ಮಮತಾ ಬ್ಯಾನರ್ಜಿ ಸೂಚಿಸಿದ್ದರು. ತನಿಖೆ ಪ್ರಾರಂಭವಾದಾಗಿನಿಂದ ನೀರಾವರಿ ಇಲಾಖೆಯ ಒಂದೊಂದೇ ಹಗರಣಗಳು ಬೆಳಕಿಗೆ ಬರುತ್ತಿವೆ. ಕಳೆದ ಶುಕ್ರವಾಗಿ ಕೆಲಸ ಕೊಡಿಸುವುದಾಗಿ ಹಣ ಲಪಟಾಯಿಸುತ್ತಿದ್ದ ಪಶ್ಚಿಮ ಬಂಗಾಳ ಬಿಜೆಪಿ ನಾಯಕ ವಿಧಾನಸಭೆಯ ಪ್ರತಿಪಕ್ಷ ನಾಯಕ ಸುವೇಂದು ಅಧಿಕಾರಿ ಆಪ್ತ ರಖಾಲ್ ಬೇರಾನನ್ನು ಬಂಧಿಸಲಾಗಿದೆ.
ಈ ಬಗ್ಗೆ ಸುವೇಂದು ಅಧಿಕಾರಿ ಮತ್ತು ಅವರ ಸಹೋದರ ಸುಮೇಂದು ಅಧಿಕಾರಿ ಪ್ರತಿಕ್ರಿಯಿಸಲು ನಿರಾಕರಿಸಿದ್ದು, ರಖಾಲ್ ಬೇರಾ ನನ್ನ ಆಪ್ತ ಎಂಬುವುದಕ್ಕೆ ಏನಾದರು ಪುರಾವೆ ಇದೆಯಾ ಎಂದು ಸುವೇಂದು ಪ್ರಶ್ನಿಸಿದ್ದಾರೆ.
ಸುವೇಂದು ಅಧಿಕಾರಿ ನೀರಾವರಿ ಸಚಿವರಾಗಿದ್ದಾಗ, ರಖಾಲ್ ಬೇರಾ ಕೆಲಸದ ಆಮಿಷವೊಡ್ಡಿ ಹಣ ಪಡೆಯುತ್ತಿದ್ದ ಬಗ್ಗೆ ಆರೋಪಗಳು ಕೇಳಿ ಬಂದಿತ್ತು. ಪೊಲೀಸರು ಈ ಬಗ್ಗೆ ತನಿಖೆ ನಡೆಸಿ ರಖಾಲ್ ಬೇರಾನನ್ನು ಬಂಧಿಸಿದ್ದಾರೆ. ಈ ಬಗ್ಗೆ ಹೆಚ್ಚಿನ ತನಿಖೆ ನಡೆಯುತ್ತಿದೆ. ಈತ ಸುವೇಂದು ಅಧಿಕಾರಿಯ ಆಪ್ತನಾಗಿದ್ದರೆ, ಪ್ರಕರಣದಲ್ಲಿ ಸುವೇಂದು ಅಧಿಕಾರಿ ಸಹೋದರರ ತಪ್ಪೇನಾದರು ಇದ್ದರೆ, ಅವರ ವಿರುದ್ಧ ಕಾನೂನು ರೀತಿಯ ಕ್ರಮ ಕೈಗೊಳ್ಳಲಾಗುವುದು ಎಂದು ಟಿಎಂಸಿ ನಾಯಕ ಮತ್ತು ಸಚಿವ ಅಖಿಲ್ ಗಿರಿ ತಿಳಿಸಿದ್ದಾರೆ.
ಪರಿಹಾರ ಸಾಮಗ್ರಿ ಲೂಟಿ ಆರೋಪ: ಪ್ರಕರಣ ದಾಖಲು
ಈ ನಡುವೆ, ಸರ್ಕಾರದ ಪರಿಹಾರ ಸಾಮಗ್ರಿಗಳನ್ನು ಲೂಟಿ ಮಾಡುತ್ತಿದ್ದಾರೆ ಎಂದು ಆರೋಪಿಸಿ ಕಂಟೈ ಮುನ್ಸಿಪಲ್ ಆಡಳಿತ ಮಂಡಳಿಯ ಸದಸ್ಯ ರತ್ನದೀಪ ಮನ್ನಾ ಎಂಬವರು ಜೂನ್ 1 ರಂದು ಸುವೇಂದು ಅಧಿಕಾರಿ ಅವರ ತಮ್ಮ ಸೌಮೇಂದು ಅಧಿಕಾರಿ ವಿರುದ್ಧ ಕಂಟೈ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ಈ ಸಂಬಂಧ ಸುವೇಂದು-ಸೌಮೇಂದು ಮತ್ತು ಇತರ ಇಬ್ಬರ ವಿರುದ್ಧ ಎಫ್ಐಆರ್ ದಾಖಲಾಗಿದೆ.
ಇದನ್ನೂ ಓದಿ: ಮಲಯಾಳಂ ಸಹ ಭಾರತೀಯ ಭಾಷೆ, ತಾರತಮ್ಯ ನಿಲ್ಲಿಸಿ: ರಾಹುಲ್ ಗಾಂಧಿ
