ಭೋಜ್​​ಪುರಿ ನಟಿ ಆಕಾಂಕ್ಷಾ ದುಬೆ ಸಾವು ಪ್ರಕರಣ: ಆರೋಪಿಗಳಿಗೆ ಡಿಎನ್‌ಎ ಪರೀಕ್ಷೆ

ನಟಿ ಸಾವಿನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಉತ್ತರ ಪ್ರದೇಶ ಪೊಲೀಸರು ಆರೋಪಿಗಳ ಡಿಎನ್‌ಎ ಪರೀಕ್ಷೆ ನಡೆಸಲು ಸಿದ್ಧತೆ ನಡೆಸಿದ್ದಾರೆ.

ವಾರಣಾಸಿ (ಉತ್ತರ ಪ್ರದೇಶ): ಭೋಜ್​​ಪುರಿ ಚಿತ್ರರಂಗದ ಜನಪ್ರಿಯ ನಟಿ ಆಕಾಂಕ್ಷಾ ದುಬೆ ಸಾವು ಪ್ರಕರಣ ಮತ್ತೊಂದು ತಿರುವು ಪಡೆದುಕೊಂಡಿದೆ. ಆರೋಪಿಗಳಾದ ಗಾಯಕ ಸಮರ್​​ ಸಿಂಗ್​​ ಮತ್ತು ಆತನ ಸಹೋದರ ಸಂಜಯ್​​ ಸಿಂಗ್​​​ ಅವರ ಡಿಎನ್​​ಎ ಪರೀಕ್ಷೆಗೆ ಪೊಲೀಸರು ನಿರ್ಧರಿಸಿದ್ದಾರೆ. ಪ್ರಕರಣದ ತನಿಖೆ ನಡೆಸುತ್ತಿರುವ ಉತ್ತರ ಪ್ರದೇಶ ಪೊಲೀಸರು ಪ್ರಯೋಗಾಲಯದಲ್ಲಿ ಆಕಾಂಕ್ಷಾ ಅವರ ಬಟ್ಟೆಗಳನ್ನು ಪರೀಕ್ಷಿಸಿದ ವರದಿ ಸ್ವೀಕರಿಸಿದ ನಂತರ ಆರೋಪಿಗಳನ್ನು ಡಿಎನ್​​ಎ ಪರೀಕ್ಷೆಗೆ ಒಳಪಡಿಸಲಿದ್ದಾರೆ.

ಪ್ರಸ್ತುತ ಜೈಲುವಾಸ ಅನುಭವಿಸುತ್ತಿರುವ ಸಮರ್​ ಸಿಂಗ್​​ ಹಾಗೂ ಸಂಜಯ್​​ ಸಿಂಗ್​ ಅವರನ್ನು ಡಿಎನ್​ಎ ಟೆಸ್ಟ್​​ಗೆ ಒಳಪಡಿಸಲು ಶೀಘ್ರದಲ್ಲೇ ಪೊಲೀಸರು ನ್ಯಾಯಲಯದಿಂದ ಅನುಮತಿ ಪಡೆಯಲು ತೀರ್ಮಾನಿಸಿದ್ದಾರೆ. ಕಳೆದ ಮಾರ್ಚ್​ 25 ರಂದು ವಾರಣಾಸಿಯ ಹೋಟೆಲ್​​ ಒಂದರಲ್ಲಿ ನಟಿ ಆಕಾಂಕ್ಷಾ ಅವರ ಮೃತದೇಹ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಮಾರ್ಚ್​ 27 ರಂದು ನಟಿಯ ತಾಯಿ ಮಧು ದುಬೆ ಅವರು ಭೋಜ್​​ಪುರಿ ಗಾಯಕ ಸಮರ್​ ಸಿಂಗ್​ ಮತ್ತು ಸಂಜಯ್​​ ಸಿಂಗ್​ ತನ್ನ ಮಗಳ ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ್ದಾರೆ ಎಂದು ಪೊಲೀಸರಿಗೆ ದೂರು ನೀಡಿದ್ದರು. ಈ ದೂರಿನ ಆಧಾರದ ಮೇಲೆ ಏಪ್ರಿಲ್​ 6 ರಂದು ಗಾಯಕ ಸಮರ್​ ಸಿಂಗ್​​ ಅವರನ್ನು ಬಂಧಿಸಲಾಗಿತ್ತು. ಅಂದಿನಿಂದ ಉತ್ತರ ಪ್ರದೇಶ ಪೊಲೀಸರು ಪ್ರಕರಣದ ತನಿಖೆಯಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿದ್ದಾರೆ.

ಮಧು ದುಬೆ ವಕೀಲ ಶಶಾಂಕ್​​ ಶೇಖರ್​ ತ್ರಿಪಾಠಿ ಮಾತನಾಡಿ, "ಮೂರು ತಜ್ಞರ ತಂಡವು ಆಕಾಂಕ್ಷಾ ದುಬೆ ಅವರ ಮೃತದೇಹದ ಮರಣೋತ್ತರ ಪರೀಕ್ಷೆ ನಡೆಸಿದ್ದು, ನಟಿ ಧರಿಸಿದ್ದ ಬಟ್ಟೆ ಹಾಗೂ ಗುಪ್ತಾಂಗಗಳ ಸ್ವಾಬ್​ಗಳನ್ನು ಫೋರೆನ್ಸಿಕ್​​ ಮತ್ತು ಪಾಥೋಲಾಜಿಕಲ್​​ ಪರೀಕ್ಷೆ ಕಳುಹಿಸಲಾಗಿತ್ತು. ಈಗ ಬಟ್ಟೆಯ ವರದಿ ಬಂದಿದೆ" ಎಂದು ತಿಳಿಸಿದರು. ಮತ್ತೊಂದೆಡೆ, ಬಟ್ಟೆ ಪರೀಕ್ಷೆ ವರದಿಯನ್ನು ಆಧರಿಸಿ 4 ಜನರ ಡಿಎನ್​ಎ ಪ್ರೊಫೈಲಿಂಗ್​​ ನಡೆಸಲು ನಿರ್ಧರಿಸಲಾಗಿದೆ. ಇದಕ್ಕಾಗಿ ನ್ಯಾಯಾಲಯದ ಅನುಮತಿ ಪಡೆಯಲು ಶೀಘ್ರದಲ್ಲೇ ಲಿಖಿತ ಅರ್ಜಿ ಸಲ್ಲಿಸುತ್ತೆವೆ. ಅನುಮತಿಯ ನಂತರ ಸಮರ್​​ ಸಿಂಗ್​, ಸಂಜಯ್​ ಸಿಂಗ್​, ಅರುಣ್​​ ಪಾಂಡೆ ಸಂದೀಪ್​​ ಸಿಂಗ್​​ ಅವರ ಮಾದರಿಗಳನ್ನು ಸಂಗ್ರಹಿಸಲಾಗುವುದು ಎಂದು ಡಿಸಿಪಿ ಅಮಿತ್​​​ ಕುಮಾರ್​​ ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ಸೂಪರ್​ ಸ್ಟಾರ್​ ಮಗಳು ಎಂಬ ಅಹಂ ಇಲ್ಲ ನಟಿ ಸುಹಾನಾಗೆ: ಶಾರುಖ್​ ಮಗಳನ್ನು ಹೊಗಳಿದ ನೃತ್ಯ ಸಂಯೋಜಕ

ಆಕಾಂಕ್ಷಾ ಸಾವಿನ ನಂತರ ಹೊರಬಿದ್ದಿರುವ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಸಂದೀಪ್ ಸಿಂಗ್ ಆಕಾಂಕ್ಷಾರನ್ನು ಹೋಟೆಲ್‌ಗೆ ಡ್ರಾಪ್ ಮಾಡಿರುವ ದೃಶ್ಯ ಸೆರೆಯಾದರೆ. ಅದೇ ಸಮಯದಲ್ಲಿ, ಮತ್ತೊಂದು ಸಿಸಿಟಿವಿಯಲ್ಲಿ, ಅರುಣ್ ಪಾಂಡೆ ಆಕಾಂಕ್ಷಾ ಜೊತೆ ರೆಸ್ಟೋರೆಂಟ್​ನಲ್ಲಿ ಪಾರ್ಟಿ ಮಾಡುತ್ತಿರುವುದು ಕಂಡುಬಂದಿದೆ. ಅಂದಿನಿಂದ ಇಬ್ಬರನ್ನೂ ವಿಚಾರಣೆ ನಡೆಸಲಾಗುತ್ತಿದೆ. ಈ ಕಾರಣಕ್ಕಾಗಿಯೇ ನಾಲ್ವರ ಡಿಎನ್‌ಎ ಪ್ರೊಫೈಲಿಂಗ್ ಮಾಡಲು ಪೊಲೀಸರು ಸಿದ್ಧತೆ ನಡೆಸುತ್ತಿದ್ದಾರೆ.

ಇದನ್ನೂ ಓದಿ: ವಿವಾಹದ ಸ್ಥಳಾನ್ವೇಷಣೆ ಮಾಡುತ್ತಿರುವ ಪರಿಣಿತಿ: ಸೋದರಿಯಂತೆ ರಾಜಸ್ಥಾನದಲ್ಲಿ ಸಪ್ತಪದಿ ತುಳಿಯಲಿದ್ದಾರಾ ಚೋಪ್ರಾ?