ಲಖನೌ: ಉತ್ತರ ಪ್ರದೇಶದಲ್ಲಿ 2022ಕ್ಕೆ ವಿಧಾನಸಭೆ ಚುನಾವಣೆ ನಡೆಯಲಿದ್ದು, ಶತಾಯಗತಾಯ ಮತ್ತೆ ಅಧಿಕಾರಕ್ಕೆ ಬರಲು ಇನ್ನಿಲ್ಲದ ರಣತಂತ್ರಗಳನ್ನು ರೂಪಿಸುತ್ತಿರುವ ಬಿಜೆಪಿ ಸಾಮಾಜಿಕ ಜಾಲತಾಣಗಳಲ್ಲಿ ಮೊದಲಿಗಿಂತಲೂ ಹೆಚ್ಚು ಕ್ರಿಯಾಶೀಲತೆಯಿಂದ ಪ್ರಚಾರ ಮಾಡುತ್ತಿದ್ದೆ. ಮಾತ್ರವಲ್ಲದೇ, ಅಫ್ಘಾನ್‌ನಲ್ಲಿ ತಾಲಿಬಾನ್‌ಗಳು ಮಾನವ ಹಕ್ಕುಗಳ ಉಲ್ಲಂಘನೆಯ ವಿಷಯವನ್ನು ಮುಂದಿನ ಚುನಾವಣೆಯಲ್ಲಿ ಪ್ರಸ್ತಾಪಿಸಿ ವಿರೋಧ ಪಕ್ಷಗಳ ಮೇಲೆ ದಾಳಿ ಮಾಡಲು ಅಸ್ತ್ರವಾಗಿ ಬಳಸಿಕೊಳ್ಳುತ್ತಿದೆ.
ಉತ್ತರ ಪ್ರದೇಶದಲ್ಲಿ ಬಿಜೆಪಿಯವರು ತಾಲಿಬಾನ್ ವಿಷಯವನ್ನು ಹೇಗೆ ಪ್ರಬಲ ರಾಜಕೀಯ ಅಸ್ತ್ರವಾಗಿ ಬಳಸಿಕೊಳ್ಳುತ್ತಾರೆ ಎಂಬುದು ಆಶ್ಚರ್ಯವಾಗಬಹುದು. ವಾಸ್ತವವಾಗಿ, ಅಫ್ಘಾನಿಸ್ತಾನದ ಭಯಾನಕ ಚಿತ್ರವನ್ನು ಬಿಂಬಿಸುವ ಮೂಲಕ ಹಿಂದೂ ಮತದಾರರನ್ನು ಒಗ್ಗೂಡಿಸಲು ಬಿಜೆಪಿ ಪ್ರಯತ್ನಿಸುತ್ತಿದೆ. ತಳಮಟ್ಟದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದಂತಹ ಹಿಂದುತ್ವ ಸಂಘಟನೆಗಳ ಸಹಾಯವನ್ನೂ ಪಡೆಯುತ್ತಿದೆ.
ಮತ್ತೊಂದೆಡೆ, ಪ್ರಾದೇಶಿಕ ಪಕ್ಷಗಳು ಸಾಮಾಜಿಕ ಜಾಲತಾಣಗಳಲ್ಲಿ ಮೊದಲಿಗಿಂತ ಹೆಚ್ಚು ಸಕ್ರಿಯವಾಗಿರುವಂತೆ ತೋರುತ್ತಿದ್ದರೂ, ಅವರು ಇನ್ನೂ ತಮ್ಮ ಹಳೆಯ ಜಾತಿ ಸಮೀಕರಣಗಳ ಸೂತ್ರಗಳನ್ನೇ ನಂಬಿಕೊಂಡಿದ್ದಾರೆ. ಸಮಾಜವಾದಿ ಪಕ್ಷ(ಎಸ್ಪಿ)ವು ಯಾದವ್ - ಮುಸ್ಲಿಂ ಮತಗಳ ಲೆಕ್ಕಾಚಾರವನ್ನು ಹಾಕುತ್ತದೆ.
ಬಹುಜನ ಸಮಾಜ ಪಕ್ಷ(ಬಿಎಸ್ಪಿ) ಹಿಂದುಳಿದ ಮತ್ತು ಅತ್ಯಂತ ಹಿಂದುಳಿದ ವರ್ಗಗಳ ತನ್ನ ಸಾಂಪ್ರದಾಯಿಕ ಮತ ಬ್ಯಾಂಕ್‌ ಅನ್ನು ನೆಚ್ಚಿಕೊಂಡಿದೆ. ಆದರೆ, ಈ ಮಧ್ಯೆ, ಬಿಎಸ್ಪಿ ವರಿಷ್ಠೆ ಮಾಯಾವತಿ ಬ್ರಾಹ್ಮಣರಿಗೆ ಆದ್ಯತೆ ನೀಡುತ್ತಿರುವುದರಿಂದ ಇವರ ಸಾಂಪ್ರದಾಯಿಕ ಮತದಾರರು ಅಂತರ ಕಾಯ್ದುಕೊಳ್ಳುತ್ತಿದ್ದಾರೆ ಎನ್ನಲಾಗಿದೆ.
ಮಾಯಾವತಿ ಪಕ್ಷವನ್ನು ಅವರ ಪ್ರತಿಸ್ಪರ್ಧಿಗಳು ರಾಜ್ಯದಲ್ಲಿ ರಾಜಕೀಯವಾಗಿ ದುರ್ಬಲವಾಗಿಸಿದ್ದಾರೆ. ವಾಯುವ್ಯದಲ್ಲಿ ಚಂದ್ರಶೇಖರ್ ಅವರ ಭೀಮ್ ಸೇನೆ, ಅವಧ್ ನಲ್ಲಿ ನಿಷಾದ್ ಪಾರ್ಟಿ ಮತ್ತು ಪೂರ್ವಾಂಚಲ್‌ನಲ್ಲಿ ಅಪ್ನಾ ದಳ ಹೊರತಾಗಿಯೂ ಅನೇಕ ಸಣ್ಣ ಪಕ್ಷಗಳು ಇವರ ಜಾತಿ ಮತ ವಿಭಜಿಸುವ ಮೂಲಕ ಇವರ ಲೆಕ್ಕಾಚಾರಗಳನ್ನು ತಲೆಕೆಳಗಾಗಿಸುತ್ತಿವೆ.
ಈ ಕಾರಣದಿಂದಲೇ ಬಿಜೆಪಿ ಪೂರ್ವಾಂಚಲದಲ್ಲಿ ನಿಷಾದ್ ಪಕ್ಷ ಮತ್ತು ಅಪ್ನಾ ದಳವನ್ನು ಮೈತ್ರಿಯಲ್ಲಿ ಉಳಿಸಿಕೊಂಡಿದೆ. ಅಂದರೆ, ಪ್ರತಿ ವಲಯದಲ್ಲೂ ಪ್ರತಿಪಕ್ಷಗಳ ಮೇಲೆ ದಾಳಿ ಮಾಡಲು ಬಿಜೆಪಿ ಸಿದ್ಧವಾಗಿದೆ. ಮತ್ತೊಂದೆಡೆ, ಆಗಸ್ಟ್ 15 ರಂದು ಅಫ್ಘಾನಿಸ್ತಾನವನ್ನು ವಶಪಡಿಸಿಕೊಂಡ ನಂತರ, ಇದೇ ವಿಚಾರವನ್ನು ಇಟ್ಟುಕೊಂಡು ಉತ್ತರ ಪ್ರದೇಶದಲ್ಲಿ ಬಿಜೆಪಿ ಲಾಭ ಪಡೆಯಲು ಪ್ರಯತ್ನಿಸಿದೆ.
