ಎಟಾವಾ( ಉತ್ತರ ಪ್ರದೇಶ) : ಇಲ್ಲಿನ ಸಫಾರಿ ಪಾರ್ಕ್ನಲ್ಲಿ ಎರಡು ಸಿಂಹಿಣಿಗಳಲ್ಲಿ ಕೋವಿಡ್ ಪಾಸಿಟಿವ್ ಕಂಡು ಬಂದಿದ್ದು, ತಜ್ಞರ ಸಲಹೆಯಂತೆ ಚಿಕಿತ್ಸೆ ನೀಡಲಾಗ್ತಿದೆ ಎಂದು ಸಫಾರಿ ಪಾರ್ಕ್ನ ನಿರ್ದೇಶಕರು ತಿಳಿಸಿದ್ದಾರೆ.
ಶುಕ್ರವಾರ ಸಂಜೆ 7 ಗಂಟೆಯವರೆಗೂ ಎರಡೂ ಸಿಂಹಗಳ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ತಿಳಿದು ಬಂದಿದೆ. ಏಪ್ರಿಲ್ 30 ರಂದು 9 ವರ್ಷದ ಸಿಂಹಿಣಿ ಜೆನ್ನಿಫರ್ ಮತ್ತು 4 ವರ್ಷದ ಗೌರಿಯಲ್ಲಿ 104 ರಿಂದ 105 ಡಿಗ್ರಿ ಸೆಲ್ಸಿಯಸ್ ಟೆಂಪರೇಚರ್ ಕಂಡುಬಂದಿತ್ತು ಎಂದು ಎಟಾವ ಲಯನ್ ಸಫಾರಿ ಪಾರ್ಕ್ನ ಅಧಿಕಾರಿಗಳು ತಿಳಿಸಿದ್ದಾರೆ.
ಮೇ 3 ಮತ್ತು 5 ರಂದು ಅಧಿಕಾರಿಗಳು ಸಿಂಹಗಳ ಮಾದರಿಗಳನ್ನು ಭಾರತೀಯ ಪಶು ವೈದ್ಯಕೀಯ ಸಂಶೋಧನಾ ಸಂಸ್ಥೆಗೆ (ಐವಿಆರ್ಐ) ಪರೀಕ್ಷೆಗೆ ಕಳುಹಿಸಿದ್ದರು.
ಓದಿ : ಕಂಗನಾಗೆ ಕೊರೊನಾ... ಈ ವೈರಸ್ ಹೊಡೆದೋಡಿಸುವೆ ಎಂದ ಬಾಲಿವುಡ್ ನಟಿ
"ನಾವು ಸಿಂಹಗಳನ್ನು ಪರೀಕ್ಷೆ ನಡೆಸಿ ಮಾದರಿಯನ್ನು ಬರೇಲಿಯ ಐವಿಆರ್ಐ ಸಂಸ್ಥೆಗೆ ಮೇ 3 ಮತ್ತು ಮೇ 6 ರಂದು ಕಳುಹಿಸಿದ್ದೆವು. ವರದಿಯಲ್ಲಿ ಎರಡೂ ಸಿಂಹಿಣಿಗಳಿಗೆ ಕೋವಿಡ್ ಪಾಸಿಟಿವ್ ಕಂಡು ಬಂದಿದೆ" ಎಂದು ಸಫಾರಿ ನಿರ್ದೇಶಕ ಕೆ.ಕೆ. ಸಿಂಗ್ ಮಾಹಿತಿ ನೀಡಿದ್ದಾರೆ.
ಈ ಕುರಿತಂತೆ ಕಳೆದ ಗುರುವಾರ ಸಂಜೆ ಐವಿಆರ್ಐ ಬರೇಲಿ, ನವದೆಹಲಿಯ ಕೇಂದ್ರ ಮೃಗಾಲಯ ಪ್ರಾಧಿಕಾರ, ಡೆಹ್ರಾಡೂನ್ನ ವೈಲ್ಡ್ಲೈಫ್ ಇನ್ಸ್ಟ್ಯೂಟ್ ಆಫ್ ಇಂಡಿಯಾ ಸೇರಿದಂತೆ ವಿವಿಧ ಸಂಸ್ಥೆಗಳ ತಜ್ಞರು ಜಂಟಿ ವಿಡಿಯೋ ಕಾನ್ಫರೆನ್ಸಿಂಗ್ ನಡೆಸಿದ್ದಾರೆ ಎಂದು ಸಿಂಗ್ ಹೇಳಿದ್ದಾರೆ. ಸೋಂಕಿತ ಎರಡೂ ಸಿಂಹಗಳನ್ನು ಪ್ರತ್ಯೇಕಿಸಿ ಚಿಕಿತ್ಸೆ ನೀಡಲಾಗ್ತಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಕಳೆದ ವಾರ, ಹೈದರಾಬಾದ್ನ ನೆಹರು ಝೂಲಾಜಿಕಲ್ ಪಾರ್ಕ್( ಎನ್ಝೆಡ್ಪಿ) ನ 8 ಸಿಂಹಗಳಲ್ಲಿ ಕೂಡ ಕೋವಿಡ್ ಸೋಂಕು ಕಂಡು ಬಂದಿತ್ತು.
