ಬಾರಾಮುಲ್ಲಾ(ಜಮ್ಮು ಕಾಶ್ಮೀರ): ಉತ್ತರ ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಸೊಪೋರ್ನ ಹೈಗಾಮ್ ಪ್ರದೇಶದಲ್ಲಿ ಲಷ್ಕರ್-ಎ-ತೊಯ್ಬಾ ಸಂಘಟನೆಗೆ ಸೇರಿದ ಮೂವರು ಹೈಬ್ರಿಡ್ ಉಗ್ರರನ್ನು ಬಂಧಿಸಿರುವುದಾಗಿ ಜಮ್ಮು ಕಾಶ್ಮೀರ ಪೊಲೀಸರು ತಿಳಿಸಿದ್ದಾರೆ. ಇತ್ತೀಚಿಗೆ ಸ್ಥಳೀಯರಲ್ಲದ ಜನರ ಹತ್ಯೆಗಳು ಮತ್ತು ವಿವಿಧೆಡೆ ನಡೆದ ಗ್ರೆನೇಡ್ ದಾಳಿಗಳ ಬಗ್ಗೆ ಪೊಲೀಸರು ತನಿಖೆ ನಡೆಸಿದ್ದರು. ಈ ಹಿನ್ನೆಲೆಯಲ್ಲಿ ವಿವಿಧ ಸ್ಥಳಗಳಿಂದ ಶಂಕಿತರನ್ನು ಬಂಧಿಸಲಾಗಿದೆ.
ಸತತ ವಿಚಾರಣೆಯ ನಂತರ ಈ ಉಗ್ರರು ಲಷ್ಕರ್-ಎ-ತೊಯ್ಬಾದ ಸಂಘಟನೆಗೆ ಸೇರಿದವರು ಎಂದು ಗೊತ್ತಾಗಿದೆ. ಬಂಧಿತರಿಂದ ಮೂರು ಚೀನಾ ನಿರ್ಮಿತ ಪಿಸ್ತೂಲ್‌ಗಳು, ಮದ್ದುಗುಂಡುಗಳು ಹಾಗೂ ಇತರ ಅಪರಾಧ ಸಾಮಗ್ರಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಹೈಬ್ರಿಡ್ ಉಗ್ರರೆಂದರೆ ಯಾರು?: ಭಯೋತ್ಪಾದನಾ ಸಂಘಟನೆಗಳೊಂದಿಗೆ ಸೇರಿಕೊಂಡು ದಾಳಿ ನಡೆಸುವ, ಒಂದು ಅಥವಾ ಎರಡು ಬಾರಿ ದಾಳಿ ನಡೆಸಿ ಮರೆಯಾಗುವ ಹಾಗೂ ಭದ್ರತಾ ಪಡೆಗಳ ಬಳಿಯಿರುವ ಉಗ್ರರ ಪಟ್ಟಿಯಲ್ಲಿರದ ಉಗ್ರರನ್ನು ಹೈಬ್ರಿಡ್ ಉಗ್ರರು ಎಂದು ಕರೆಯಲಾಗುತ್ತದೆ. ಸ್ಥಳೀಯ ವ್ಯಕ್ತಿಯೇ ಒಮ್ಮೊಮ್ಮೆ ಹೈಬ್ರಿಡ್ ಉಗ್ರನಾಗಿ ಉಗ್ರ ಸಂಘಟನೆಯೊಂದರ ಪರ ಕಾರ್ಯನಿರ್ವಹಿಸುವ ಕಾರಣದಿಂದ 'ಹೈಬ್ರಿಡ್ ಭಯೋತ್ಪಾದನೆ' ಭದ್ರತಾ ಪಡೆಗಳಿಗೆ ಸವಾಲು ಕೂಡಾ ಹೌದು.
ಇದನ್ನೂ ಓದಿ: ನವಾಬ್ ಮಲಿಕ್ಗೆ ಮೂತ್ರಪಿಂಡ ಸಮಸ್ಯೆ, ಆಸ್ಪತ್ರೆಗೆ ದಾಖಲು.. ಮಧ್ಯಂತರ ಜಾಮೀನಿಗಾಗಿ ಕೋರ್ಟ್ಗೆ ಅರ್ಜಿ
