ಪಟಾಕಿ ಬ್ಯಾನ್ ಮಾಡಿದ ತೆಲಂಗಾಣ ಸರ್ಕಾರ: ಸುಪ್ರೀಂಕೋರ್ಟ್ ಷರತ್ತುಗಳು ಹೀಗಿವೆ

ತೆಲಂಗಾಣ ಹೈಕೋರ್ಟ್ ನೀಡಿದ್ದ ಸೂಚನೆಯನ್ನು ಆಧರಿಸಿ ಸರ್ಕಾರ ಪಟಾಕಿ ಮಾರಾಟ ಹಾಗೂ ಬಳಕೆಯ ಮೇಲೆ ನಿಷೇಧ ಹೇರಿದ್ದು, ಸುಪ್ರೀಂಕೋರ್ಟ್ ಕೆಲ ವಿನಾಯಿಯಿಗಳನ್ನು ನೀಡಿದೆ.

ಹೈದರಾಬಾದ್​: ಹೈಕೋರ್ಟ್​ನ ಸೂಚನೆಯಂತೆ ತೆಲಂಗಾಣ ಸರ್ಕಾರ ಶಬ್ದ ಮಾಲಿನ್ಯ ಹಾಗೂ ವಾಯು ಮಾಲಿನ್ಯ ನಿಯಂತ್ರಣಕ್ಕಾಗಿ ಈ ಬಾರಿ ದೀಪಾವಳಿಗೆ ಪಟಾಕಿಗಳನ್ನು ಮಾರುವುದು ಹಾಗೂ ಬಳಸುವುದನ್ನು ನಿಷೇಧ ಮಾಡಿದೆ.

ಮಂಗಳವಾರ ಪಟಾಕಿ ಮಾರಾಟವನ್ನು ತಡೆಯಲು ಹಾಗೂ ಈ ಬಾರಿ ದೀಪಾವಳಿಯಲ್ಲಿ ಸಾರ್ವಜನಿಕರು ಅದನ್ನು ಬಳಸದಂತೆ ತಡೆಯಲು ಶೀಘ್ರವೇ ಕಟ್ಟನಿಟ್ಟಿನ ಆದೇಶ ಜಾರಿಗೊಳಿಸುವಂತೆ ತೆಲಂಗಾಣ ಸರ್ಕಾರಕ್ಕೆ ಸೂಚನೆ ನೀಡಿತ್ತು.

ತೆಲಂಗಾಣ ಹೈಕೋರ್ಟ್​ನ ಸೂಚನೆಯಂತೆ ಸರ್ಕಾರ ಪಟಾಕಿ ಬ್ಯಾನ್ ಆದೇಶವನ್ನು ಜಾರಿಗೊಳಿಸಿದ್ದರೂ ಸುಪ್ರೀಂಕೋರ್ಟ್ ಕೆಲವೊಂದು ತಿದ್ದುಪಡಿಗಳನ್ನು ಮಾಡಿ, ನಿಗದಿತ ಸಮಯದಲ್ಲಿ ಪಟಾಕಿ ಸಿಡಿಸಲು ಅನುವು ಮಾಡಿಕೊಟ್ಟಿದೆ.

ಹಸಿರು ನ್ಯಾಯಾಧೀಕರಣದ ಮಾರ್ಗಸೂಚಿಗಳ ಅನ್ವಯ ಸುಪ್ರೀಂಕೋರ್ಟ್ ಕೆಲವೊಂದು ತಿದ್ದುಪಡಿಗಳನ್ನು ಮಾಡಿದೆ. ಅವುಗಳೆಂದರೆ..

• ಪ್ರದೇಶದ ಗಾಳಿಯ ಗುಣಮಟ್ಟ ಆಧರಿಸಿ ಪಟಾಕಿ ಖರೀದಿಯ ಮೇಲೆ ನಿರ್ಬಂಧ
• ಪಟಾಕಿ ಸಿಡಿಸಲು ರಾತ್ರಿ 8ರಿಂದ 10 ಗಂಟೆಯವರೆಗೆ ಮಾತ್ರ ಅವಕಾಶ
• ಅತಿ ಹೆಚ್ಚು ವಾಯು ಮಾಲಿನ್ಯದ ಪ್ರದೇಶಗಳಲ್ಲಿ ಪಟಾಕಿಗೆ ನಿಷೇಧ
• ದೀಪಾವಳಿ ಮಾತ್ರವಲ್ಲದೆ ಕ್ರಿಸ್​ಮಸ್​​, ಹೊಸ ವರ್ಷದಂದೂ ಇದು ಅನ್ವಯ

ಈ ಮೊದಲು ಸಾರ್ವಜನಿಕರು ಪಟಾಕಿ ಸುಡದೆ ಪರಿಸರ ರಕ್ಷಿಸಬೇಕು, ಮಾಲಿನ್ಯವಾಗುವುದನ್ನು ತಪ್ಪಿಸಬೇಕೆಂದು ಮನವಿ ಮಾಡಲಾಗಿತ್ತು. ಈ ಸೂಚನೆಯಂತೆ ಸರ್ಕಾರ ಪಟಾಕಿ ನಿಷೇಧ ಮಾಡಿದೆ.

ಸರ್ಕಾರದ ಆದೇಶವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲು ರಾಜ್ಯದ ಡಿಜಿಪಿ, ಆಗ್ನಿಶಾಮಕ ದಳದ ಡಿಜಿ, ಎಲ್ಲಾ ಜಿಲ್ಲಾಧಿಕಾರಿಗಳು, ಪೊಲೀಸ್ ಆಯುಕ್ತರು, ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ ಸೂಚನೆ ನೀಡಲಾಗಿದ್ದು, ಎಲ್ಲಾ ಪಟಾಕಿ ಮಳಿಗೆ ಬಂದ್ ಮಾಡಲು ಕ್ರಮ ಕೈಗೊಳ್ಳಲಾಗುತ್ತಿದೆ.