ನೋಯ್ಡಾ( ಉತ್ತರಪ್ರದೇಶ): ಮನಸೊಂದಿದ್ದರೆ ಮಾರ್ಗ ತನ್ನಿಂದ ತಾನೆ ತೆರೆದುಕೊಳ್ಳುತ್ತದೆ. ಜೀವನದಲ್ಲಿ ಯಾವುದು ಅಸಾಧ್ಯವಲ್ಲ. ಸಾಧಿಸುವ ಛಲ ಬೇಕೇಬೇಕು. ಆಗ ಮಾತ್ರ ಸಾಧನೆ ಸಾಧ್ಯ. ಈ ಮಾತಿಗೆ ಇಂಬು ನೀಡುವಂತೆ, ಉತ್ತರ ಪ್ರದೇಶದ ನೋಯ್ಡಾದಲ್ಲಿ 27 ವರ್ಷದ ಮಹಿಳೆ ಚಂಚಲ್ ಶರ್ಮಾ ಎನ್ನುವವರು ಇ-ರಿಕ್ಷಾ ಓಡಿಸುವ ಮೂಲಕ ಅನೇಕ ಮಹಿಳೆಯರಿಗೆ ಸ್ಫೂರ್ತಿಯ ಚಿಲುಮೆ ಆಗಿದ್ದಾರೆ.
ಹೆಚ್ಚಿನ ದಿನಗಳಲ್ಲಿ ಅವಳು ತಮ್ಮ ಇ-ರಿಕ್ಷಾದಲ್ಲಿ ಪ್ರಯಾಣಿಕರನ್ನು ಕರೆದೊಯ್ಯುವಾಗ ತಮ್ಮ ಒಂದು ವರ್ಷದ ಮಗನನ್ನು ಬೇಬಿ ಕ್ಯಾರಿಯರ್‌ನಲ್ಲಿ ಇಟ್ಟುಕೊಂಡು ಆಟೋ ಚಲಾವಣೆ ಮಾಡಿದ್ದಾರೆ. ಚಾಲನೆ ಅಷ್ಟೇ ಅಲ್ಲ ಮಗುವನ್ನು ಪಾಲನೆ ಪೋಷಣೆ ಮಾಡಿ ಜೀವನ ನಿರ್ವಹಣೆ ಮಾಡುತ್ತಿದ್ದಾರೆ.
ನಿತ್ಯದ ಕೆಲಸ ಆರಂಭವಾಗುವುದು ಯಾವಾಗ: ಆಟೋ ಓಡಿಸಿ ಜೀವನ ನಿರ್ವಹಣೆ ಮಾಡುತ್ತಿರುವ ಚಂಚಲ್, ಬೆಳಗ್ಗೆ 6.30 ಕ್ಕೆ ಕೆಲಸ ಆರಂಭಿಸುತ್ತಾರೆ. ಮಗ ಅಂಕುಶ್‌ಗೆ ಸ್ನಾನ ಮತ್ತು ಊಟ ಮಾಡಿಸಲು ಮಧ್ಯಾಹ್ನ ಅವರು ಸ್ಪಲ್ಪ ಸಮಯ ಬಿಡುವು ತೆಗೆದುಕೊಳ್ತಾರೆ. ಮಧ್ಯಾಹ್ನದ ವಿರಾಮದ ಬಳಿಕ ಮತ್ತೆ ಕೆಲಸ ಆರಂಭಿಸುವ ಅವರು ಸಂಜೆವರೆಗೂ ಆಟೋ ಓಡಿಸ್ತಾರೆ.
ದಿನದ ದುಡಿಮೆ ಎಷ್ಟು: ಇ- ರಿಕ್ಷಾವನ್ನು ಬಾಡಿಗೆ ಪಡೆಯುವ ಚಂಚಲ್ ಅದಕ್ಕಾಗಿ 300 ರೂ ಪಾವತಿಸುತ್ತಾರೆ. ಇನ್ನು ದಿನಕ್ಕೆ 600 ರೂ. ದಿಂದ 700 ರೂ. ಸಂಪಾದನೆ ಮಾಡ್ತಾರೆ. ಇನ್ನು ಇವರು ಗಂಡನಿಂದ ದೂರವಾಗಿದ್ದು, ಮಗುವಿನೊಂದಿಗೆ ಏಕಾಂಗಿಯಾಗಿ ಜೀವನ ನಡೆಸುತ್ತಿದ್ದಾರೆ.
ಯಾವುದೇ ಕೆಲಸ ಕೀಳಲ್ಲ: ಯಾರ ಸಹಾಯಕ್ಕೆ ಕೈ ಚಾಚದೇ ಸ್ವಂತ ಕಾಲಿನ ಮೇಲೆ ನಿಂತುಕೊಂಡಿರುವ ಚಂಚಲ್ ಶರ್ಮಾ, ಈಟಿವಿ ಭಾರತ್ ಜೊತೆ ಮಾತನಾಡಿದ್ದಾರೆ. ತಮ್ಮ ಬುದುಕಿನ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಪ್ರಾಮಾಣಿಕತೆ ಮತ್ತು ಕಠಿಣ ಪರಿಶ್ರಮದಿಂದ ಮಾಡುವ ಯಾವುದೇ ಕೆಲಸವನ್ನು ಕೀಳು ಎಂದು ಪರಿಗಣಿಸಲಾಗುವುದಿಲ್ಲ ಎನ್ನುವುದು ಚಂಚಲ್ ಅವರ ಸ್ಪಷ್ಟವಾದ ನುಡಿ.
ಮಗು ತೀರಾ ಚಿಕ್ಕವನಾಗಿದ್ದಾಗ ಎಲ್ಲೂ ಕೆಲಸ ಮಾಡಲಿಲ್ಲ. ಯಾಕೆಂದರೆ ಮಗುವನ್ನು ನನ್ನ ಸಹೋದರಿಯರ ಬಳಿ ಬಿಟ್ಟು ಹೋಗುವುದು ತುಂಬಾ ಕಷ್ಟ. ಹೀಗಾಗಿ ಮಗು ಸ್ಪಲ್ಪ ದೊಡ್ಡದಾಗುವವರೆಗೂ ಮನೆಯಲ್ಲೇ ಇದ್ದೆ, ಈಗ ಕಳೆದೆರಡು ವರ್ಷಗಳಿಂದ, ನಾನು ಇ-ರಿಕ್ಷಾ ಚಾಲಕನಾಗಿ ಕೆಲಸ ಮಾಡುತ್ತಿದ್ದೇನೆ ಎಂದು ಅವರು ತಮ್ಮ ಬದುಕಿನ ಚಿತ್ರಣವನ್ನು ಬಿಚ್ಚಿಟ್ಟಿದ್ದಾರೆ.
ಇದನ್ನು ಓದಿ: ಅನಾರೋಗ್ಯ ಪೀಡಿತ ಪ್ರಾಣಿಗಳಿಗೆ ಮನೆಯಲ್ಲೇ ಆರೈಕೆ.. ಮೂಕ ಜೀವಿಗಳ ರಕ್ಷಕಿ ಈ ರೈತ ಕುಟುಂಬದ ನಿಧಿ..
