ಹಾವು ಕಚ್ಚಿ ಪ್ರಾಣ ಕಳೆದುಕೊಂಡ ಅಕ್ಕ-ತಮ್ಮ.. ಸಾಂಗ್ಲಿಯಲ್ಲಿ ದಾರುಣ ಘಟನೆ

ಮನೆಯಲ್ಲಿ ಮಲಗಿದ್ದ ವೇಳೆ ಒಡಹುಟ್ಟಿದ ಸಹೋದರಿ - ಸಹೋದರನಿಗೆ ಹಾವು ಕಚ್ಚಿರುವ ಪರಿಣಾಮ ಇಬ್ಬರು ಪ್ರಾಣ ಕಳೆದುಕೊಂಡಿರುವ ಘಟನೆ ಸಾಂಗ್ಲಿಯಲ್ಲಿ ನಡೆದಿದೆ.

ಸಾಂಗ್ಲಿ(ಮಹಾರಾಷ್ಟ್ರ): ಒಡಹುಟ್ಟಿದ ಸಹೋದರ ಹಾಗೂ ಸಹೋದರಿ ವಿಷ ಸರ್ಪ ಕಚ್ಚಿರುವ ಪರಿಣಾಮ ಸಾವನ್ನಪ್ಪಿರುವ ಘಟನೆ ಮಹಾರಾಷ್ಟ್ರದ ಸಾಂಗ್ಲಿಯಲ್ಲಿ ನಡೆದಿದೆ. ಇವರಿಬ್ಬರು ಖಾನಾಪುರ ತಾಲೂಕಿನ ಆಲಸಂದ್​​ದವರು ಎಂದು ವರದಿಯಾಗಿದೆ.

ಮೃತರನ್ನ ವಿರಾಜ್​ ಕದಂ ಹಾಗೂ ಸಯಾಲಿ ಎಂದು ಗುರುತಿಸಲಾಗಿದೆ. ಪೊಲೀಸರು ತಿಳಿಸಿರುವ ಮಾಹಿತಿ ಪ್ರಕಾರ ಆಲಸಂದ್​​ ನಿವಾಸಿ ವಿರಾಜ್​​ ಮನೆಯಲ್ಲಿ ಮಲಗಿದ್ದ ವೇಳೆ ಅಕ್ಟೋಬರ್​​​ 6ರ ಮಧ್ಯರಾತ್ರಿ ಹಾವಿನಿಂದ ಕಡಿತಕ್ಕೊಳಗಾಗಿದ್ದಾನೆ. ಈ ವೇಳೆ, ಆಸ್ಪತ್ರೆಗೆ ಕರೆದೊಯ್ಯುವಾಗ ಪ್ರಾಣ ಕಳೆದುಕೊಂಡಿದ್ದಾನೆ. ಇದಾದ ನಂತರ ಆತನ ಸಹೋದರಿ ಸಯಾಲಿ, ತಮ್ಮನ ಅಂತ್ಯಕ್ರಿಯೆಯಲ್ಲಿ ಭಾಗಿಯಾಗಲು ಆಲಸಂದ್​​ಗೆ ಬಂದಿದ್ದಳು.

ರಾತ್ರಿ ಮನೆಯಲ್ಲಿ ಮಗಲಿರುವ ವೇಳೆ ಅಕ್ಟೋಬರ್​​ 8ರಂದು ಆಕೆಗೂ ಹಾವು ಕಚ್ಚಿದೆ. ಚಿಕಿತ್ಸೆಗಾಗಿ ಸಾಂಗ್ಲಿ ಆಸ್ಪತ್ರೆಗೆ ದಾಖಲು ಮಾಡಲು ಕರೆದುಕೊಂಡು ಹೋಗಿದ್ದಾರೆ. ಆದರೆ, ಚಿಕಿತ್ಸೆ ಫಲಕಾರಿಯಾಗದೇ ಅವಳು ಸಾವನ್ನಪ್ಪಿದ್ದಾಳೆ.

ಮಗನ ಕಳೆದುಕೊಂಡು ಶೋಕ ಸಾಗರದಲ್ಲಿ ಮುಳುಗಿದ್ದ ಕುಟುಂಬಕ್ಕೆ ಇದೀಗ ಮಗಳನ್ನು ಕಳೆದುಕೊಂಡಿರುವ ಶಾಕ್​ನಿಂದ ಹೊರಬರಲು ಸಾಧ್ಯವಾಗದಂತಹ ಪರಿಸ್ಥಿತಿ ನಿರ್ಮಾಣಗೊಂಡಿದೆ. ಘಟನೆಯಿಂದ ಇಡೀ ಗ್ರಾಮದಲ್ಲಿ ಆತಂಕದ ವಾತಾವರಣ ನಿರ್ಮಾಣಗೊಂಡಿದೆ.