ಎದೆ ಝಲ್​ ಎನಿಸುವ ಆ್ಯಕ್ಸಿಡೆಂಟ್​.. ಅಪಘಾತದಲ್ಲಿ ​ಬಾಲಕ ಪವಾಡ ಸದೃಶ್ಯ ಪಾರು! ವಿಡಿಯೋ

ಸೈಕಲ್​ ಮತ್ತು ಬೈಕ್​ ಮಧ್ಯೆ ಅಪಘಾತ ಸಂಭವಿಸಿದ್ದು, ಬಸ್​ ಚಕ್ರಕ್ಕೆ ಸಿಲುಕಬೇಕಾಗಿದ್ದ ಬಾಲಕ ಕೂದಲೆಳೆ ಅಂತರದಲ್ಲಿ ಪಾರಾಗಿರುವ ಘಟನೆ ಕೇರಳದ ಕಣ್ಣೂರಿನಲ್ಲಿ ಸಂಭವಿಸಿದೆ.

ಕಣ್ಣೂರು(ಕೇರಳ): ಕೇರಳ ರಾಜ್ಯದಲ್ಲಿ ಸಂಭವಿಸಿರುವ ಅಪಘಾತವೊಂದು ನೋಡುಗರ ಎದೆ ಝಲ್​ ಎನಿಸುವಂತಿದೆ. ಈ ಅಪಘಾತದಲ್ಲಿ ಸಿಲುಕಿದ ಎಂಟು ವರ್ಷದ ಬಾಲಕ ಪವಾಡ ಸದೃಶ್ಯ ರೀತಿಯಲ್ಲಿ ಬಚಾವ್​ ಆಗಿದ್ದಾನೆ. ಅಡ್ಡರಸ್ತೆಯಿಂದ ಸೈಕಲ್​ ತುಳಿದುಕೊಂಡು ಬರುತ್ತಿದ್ದ ಬಾಲಕ ರಸ್ತೆ ಮೇಲೆ ವೇಗವಾಗಿ ಚಲಿಸುತ್ತಿದ್ದ ಬೈಕ್​ಗೆ​ ಡಿಕ್ಕಿ ಹೊಡೆದಿದು ರಸ್ತೆಗೆ ಬಿದ್ದಿದ್ದಾನೆ. ಈ ವೇಳೆ ದಿಢೀರ್ ಆಗಿ​ ಬಸ್ಸೊಂದು ಆಗಮಿಸಿದೆ. ಆಗ ಬಾಲಕನು ತೂರಿಕೊಂಡು ರಸ್ತೆಯ ಮತ್ತೊಂದು ಬದಿಗೆ ಬಿದ್ದರೆ, ಸೈಕಲ್​ ಮೇಲೆ ಬಸ್​ ಹರಿದಿದೆ. ಬಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ.

ಓದಿ: ದಿನವೂ ಏರುತ್ತಿರುವ ಬೆಲೆ: ಬಿಜೆಪಿ ವಿರುದ್ಧ ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ

ಹೌದು, 8 ವರ್ಷದ ಶಾಧುರಹ್ಮಾನ್ ತನ್ನ ಮನೆಯ ಕಾಂಪೌಂಡ್‌ನಲ್ಲಿ ಹೊಸ ಸೈಕಲ್‌ನಲ್ಲಿ ಆಟವಾಡುತ್ತಿದ್ದ. ಅಡ್ಡರಸ್ತೆ ಮೂಲಕ ಸೈಕಲ್​ ತುಳಿದುಕೊಂಡು ತಳಿಪರಂಬ-ಇರಿಟ್ಟಿ ರಾಜ್ಯ ಹೆದ್ದಾರಿಗೆ ಬಂದಿದ್ದಾನೆ. ಇಳಿಜಾರು ಇರುವುದರಿಂದ ಸೈಕಲ್​ ವೇಗವಾಗಿಯೇ ಮುಖ್ಯರಸ್ತೆಗೆ ಬಂದಿದೆ. ಇದೇ ವೇಳೆ ಮುಖ್ಯರಸ್ತೆಯಲ್ಲಿ ವೇಗವಾಗಿ ಬೈಕ್​ವೊಂದು ಸಾಗುತ್ತಿತ್ತು. ತನ್ನ ಸೈಕಲ್​ ವೇಗವನ್ನು ನಿಯಂತ್ರಿಸಲ ಸಾಧ್ಯವಾಗದ ಹಿನ್ನೆಲೆ ಬಾಲಕ ಬೈಕ್​ಗೆ ಡಿಕ್ಕಿ ಹೊಡೆದಿದ್ದಾನೆ. ಡಿಕ್ಕಿ ರಭಸಕ್ಕೆ ಬಾಲಕ ರಸ್ತೆಯ ಇನ್ನೊಂದು ಬದಿಗೆ ತೂರಿಕೊಂಡು ಬಿದ್ದಿದ್ದಾನೆ. ಇದೇ ಸಮಯದಲ್ಲಿ ಬೈಕ್​ ಹಿಂಬದಿಯಲ್ಲೇ ವೇಗವಾಗಿ ಬಂದ ಬಸ್​ ಹೊಸ ಸೈಕಲ್​ ಮೇಲೆ ಹರಿದಿದೆ.

ಓದಿ: ಬಿಜೆಪಿಗೆ ಸೇರ್ಪಡೆಯಾದ ಮೂವರು 'ವಿಐಪಿ' ಶಾಸಕರು..

ಬಾಲಕ ರಸ್ತೆಯ ಇನ್ನೊಂದು ಬದಿಗೆ ಬಿದ್ದ ಪರಿಣಾಮ ಈ ಅಪಘಾತದಿಂದ ಪಾರಾಗಿದ್ದಾನೆ. ಇಲ್ಲವಾದಲ್ಲಿ ದುರಂತವೇ ನಡೆದು ಹೋಗುತ್ತಿತ್ತು. ಈ ಘಟನೆಯಲ್ಲಿ ಬೈಕ್​ ಸವಾರನಿಗೂ ಸಣ್ಣ-ಪುಟ್ಟ ಗಾಯಗಳಾಗಿವೆ ಎಂದು ತಿಳಿದುಬಂದಿದೆ. ಈ ಅಪಘಾತದ ದೃಶ್ಯ ಸ್ಥಳೀಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಭಯಾನಕವಾಗಿದೆ. ಈ ಕುರಿತಂತೆ ಯಾವುದೇ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾದ ಬಗ್ಗೆ ಮಾಹಿತಿ ಸಿಕ್ಕಿಲ್ಲ.