ಮುಂಬೈ: ಬಾಲಿವುಡ್ ನಟಿ ಶಿಲ್ಪಾಶೆಟ್ಟಿ ಹಾಗೂ ಪತಿ ರಾಜ್ಕುಂದ್ರಾ ಅವರ ಕಂಪನಿ ವಿಯಾನ್ ಇಂಡಸ್ಟ್ರೀಸ್ ಮಾಹಿತಿ ( ಪ್ರಿಫರೆಂಶಿಯಲ್ ಅಲಾಟ್ ಮೆಂಟ್) ನೀಡುವಲ್ಲಿ ವಿಳಂಬ ಮಾಡಿದ್ದಕ್ಕೆ ಸೆಬಿ ಮೂರು ಲಕ್ಷ ರೂ. ದಂಡ ವಿಧಿಸಿದೆ.
ಯಾವುದೇ ಕಂಪನಿಯು ಸ್ಟಾಕ್ ಎಕ್ಸ್ಚೇಂಜ್ಗಳನ್ನು ಕಡ್ಡಾಯವಾಗಿ ಬಹಿರಂಗಪಡಿಸಬೇಕು. ಆದರೆ, ವಿಯಾನ್ ಕಂಪನಿ ಮೂರು ವರ್ಷಗಳವರೆಗೆ ವಿಳಂಬ ಮಾಡಿದೆ. ಈ ಹಿನ್ನೆಲೆ ಸೆಬಿ ದಂಡ ವಿಧಿಸಿದ್ದು, 45 ದಿನಗಳೊಳಗೆ ಪಾವತಿಸುವಂತೆ ಸೂಚಿಸಿದೆ.
ತನಿಖೆ ಕೈಗೊಂಡಿದ್ದ ಲೆಕ್ಕ ಪರಿಶೋಧಕರು
ಸೆಕ್ಯುರಿಟೀಸ್ ಅಂಡ್ ಎಕ್ಸ್ಚೇಂಜ್ ಬೋರ್ಡ್ ಆಫ್ ಇಂಡಿಯಾ (ಸೆಬಿ), 2013 ಸೆಪ್ಟೆಂಬರ್ 01ರಿಂದ 2015 ರ ಡಿಸೆಂಬರ್ 23 ರ ಅವಧಿಯಲ್ಲಿ ವಿಯಾನ್ ಇಂಡಸ್ಟ್ರೀಸ್ ಲಿಮಿಟೆಡ್ (ಹಿಂದೆ ಹಿಂದೂಸ್ತಾನ್ ಸೇಫ್ಟಿ ಗ್ಲಾಸ್ ಇಂಡಸ್ಟ್ರೀಸ್ ಲಿಮಿಟೆಡ್ ಎಂದು ಕರೆಯಲಾಗುತ್ತಿತ್ತು) ನ ವ್ಯಾಪಾರ / ವ್ಯವಹಾರಗಳ ಬಗ್ಗೆ ತನಿಖೆ ನಡೆಸಿತ್ತು. ತನಿಖೆಯಲ್ಲಿ ವಿಯಾನ್ ಇಂಡಸ್ಟ್ರೀಸ್ ಲಿಮಿಟೆಡ್, ಸೆಬಿಯ (ಆಂತರಿಕ ವ್ಯಾಪಾರ ನಿಷೇಧ) ನಿಯಮಗಳ 7 (2) (ಎ) ಮತ್ತು 7 (2) (ಬಿ) ನಿಬಂಧನೆಗಳನ್ನು ಉಲ್ಲಂಘಿಸಿವೆ ಎಂದು ತಿಳಿದು ಬಂದಿತ್ತು.
ಸೆಬಿ ಪ್ರಕಾರ, 2015 ರಲ್ಲಿ, ವಿಯಾನ್ ಇಂಡಸ್ಟ್ರೀಸ್ ನಾಲ್ವರಿಗೆ 5 ಲಕ್ಷ ಈಕ್ವಿಟಿ ಷೇರುಗಳನ್ನು ಆದ್ಯತೆಯ ಮೇರೆಗೆ ಹಂಚಿಕೆ ಮಾಡಿದೆ. ಇದರಲ್ಲಿ, ಕಂಪನಿಯು ಕುಂದ್ರಾ ಮತ್ತು ಶೆಟ್ಟಿ ಅವರಿಗೆ ತಲಾ 128,800 ಈಕ್ವಿಟಿ ಷೇರುಗಳನ್ನು ಹಂಚಿದೆ. ಸೆಬಿಯ ಇನ್ಸೈಡರ್ ಟ್ರೇಡಿಂಗ್ ರೂಲ್ಸ್, 2015 ರ ರೆಗ್ಯುಲೇಶನ್ 7 (2) (ಎ) ಪ್ರಕಾರ, ಕಂಪನಿಯ ಪ್ರವರ್ತಕರು ಕಂಪನಿಗೆ ತಮ್ಮ ವಹಿವಾಟನ್ನು ಎರಡು ದಿನಗಳಲ್ಲಿ ಬಹಿರಂಗಪಡಿಸಬೇಕಿತ್ತು.
ಕ್ರೈಂ ಬ್ರಾಂಚ್ನಿಂದ ತನಿಖೆ ಮತ್ತಷ್ಟು ಚುರುಕು
ಅಶ್ಲೀಲ ಚಿತ್ರಗಳ ನಿರ್ಮಾಣ ಸಂಬಂಧ ಜುಲೈ 19 ರಂದು ಮುಂಬೈ ಪೊಲೀಸರು ರಾಜ್ಕುಂದ್ರಾ ಸೇರಿ 11 ಜನರನ್ನು ಬಂಧಿಸಿದ್ದರು. ಈ ಮಧ್ಯೆ ರಾಜ್ ಕುಂದ್ರಾ ಮತ್ತು ಶಿಲ್ಪಾಶೆಟ್ಟಿ ಅವರ ಆರ್ಥಿಕ ಮೂಲ ಮತ್ತು ಅಶ್ಲೀಲ ಚಿತ್ರಗಳ ದಂಧೆ ಪ್ರಕರಣದಲ್ಲಿ ಅವರು ಭಾಗಿಯಾಗಿರುವ ಬಗ್ಗೆ ತನಿಖೆ ನಡೆಸಲು ಮುಂಬೈ ಕ್ರೈಂ ಬ್ರಾಂಚ್ ಹಣಕಾಸು ಲೆಕ್ಕ ಪರಿಶೋಧಕರನ್ನು ನೇಮಿಸಿದೆ.
ತನಿಖೆಯಲ್ಲಿ ಶಿಲ್ಪಾಶೆಟ್ಟಿ ಮತ್ತು ರಾಜ್ಕುಂದ್ರಾ ಅವರ ಜಂಟಿ ಖಾತೆಯಿಂದ ಕೋಟ್ಯಂತರ ರೂಪಾಯಿ ವಹಿವಾಟು ನಡೆದಿದೆ ಎಂದು ತಿಳಿದು ಬಂದಿದೆ. ಅಶ್ಲೀಲ ವಿಡಿಯೋ ಅಪ್ಲೋಡ್ ಮಾಡುತ್ತಿದ್ದ ಆ್ಯಪ್ಗಳಿಂದ ಈ ಆದಾಯ ಬಂದಿದೆ ಎಂದು ಅಪರಾಧ ಶಾಖೆ ಶಂಕಿಸಿದೆ. ಆ್ಯಪ್ಗಳಿಂದ ಗಳಿಸಿದ ಹಣವನ್ನು ಬಿಟ್‌ಕಾಯಿನ್‌ಗಳಲ್ಲಿ ಹೂಡಿಕೆ ಮಾಡಲಾಗಿದೆಯೇ ಎಂದು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
