2 ಕಿಮೀ ಉದ್ದದ ರೈಲ್ವೆ ಹಳಿಯನ್ನೇ ಕದ್ದೊಯ್ದ ಕಳ್ಳರು.. ಮೂವರು ಸಿಬ್ಬಂದಿ ಅಮಾನತು

ಬಿಹಾರದಲ್ಲಿ ರೈಲು ಕಂಬಿ ಕದ್ದೊಯ್ದ ಕಳ್ಳರು - ಕಂಬಿ ದರೋಡೆಗೆ ಅಧಿಕಾರಿಗಳಿಂದ ನೆರವು - ಮೂವರು ರೈಲ್ವೆ ಸಿಬ್ಬಂದಿಗಳ ಅಮಾನತು - ಬಿಹಾರದ ಸಮಷ್ಟಿಪುರದಲ್ಲಿ ನಡೆದ ಘಟನೆ- 2 ಕಿಮೀ ಉದ್ದದ ರೈಲು ಕಂಬಿ ಕಳವು

ಸಮಷ್ಟಿಪುರ(ಬಿಹಾರ): ಬಿಹಾರದಲ್ಲಿ ರೈಲ್ವೆ ಇಲಾಖೆಗೆ ಸೇರಿದ ವಸ್ತುಗಳನ್ನು ಕಳ್ಳತನ ಮಾಡುತ್ತಿರುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಕೆಲ ದಿನಗಳ ಹಿಂದಷ್ಟೇ ಸಮಷ್ಟಿಪುರದ ಪೂರ್ಣಿಮಾ ಕೋರ್ಟ್​ ನಿಲ್ದಾಣದಲ್ಲಿ ರೈಲಿನ ಕೋಚನ್ನೇ ಕದಿಯಲಾಗಿತ್ತು. ಇದೀಗ ಪಂಡೋಲ್ ನಿಲ್ದಾಣದಿಂದ ಸಾಗುವ ಮಾರ್ಗದ 2 ಕಿಮೀ ದೂರದ ರೈಲು ಕಂಬಿಗಳನ್ನೆ ಕಿತ್ತು ಕದ್ದೊಯ್ದ ಘಟನೆ ನಡೆದಿದೆ. ಈ ಬಗ್ಗೆ ಪ್ರಕರಣ ದಾಖಲಾಗಿದ್ದು, ರೈಲ್ವೆ ವಿಭಾಗದ ಭದ್ರತಾ ಆಯುಕ್ತರು ಸೇರಿದಂತೆ ಇಬ್ಬರನ್ನು ಅಮಾನತುಗೊಳಿಸಲಾಗಿದೆ.

ಸಮಷ್ಟಿಪುರ ಜಿಲ್ಲೆಯ ಪಂಡೋಲ್ ನಿಲ್ದಾಣದಿಂದ ಲೋಹತ್ ಸಕ್ಕರೆ ಕಾರ್ಖಾನೆಯಿಂದ ಮಧುಬನಿವರೆಗಿನ 2 ಕಿಲೋಮೀಟರ್ ಉದ್ದದ ರೈಲ್ವೆ ಹಳಿಯನ್ನು ಕಳವು ಮಾಡಲಾಗಿದೆ. ಸಕ್ಕರೆ ಕಾರ್ಖಾನೆ ಮುಚ್ಚಿದ ನಂತರ ಈ ರೈಲು ಮಾರ್ಗ ವರ್ಷಗಳಿಂದ ಬಳಕೆಯಾಗಿರಲಿಲ್ಲ. ಇದನ್ನೇ ದುರುಪಯೋಗ ಮಾಡಿಕೊಂಡ ಖದೀಮರು 2 ಕಿಮೀವರೆಗೂ ರೈಲು ಕಂಬಿಗಳನ್ನೇ ಕಿತ್ತೊಯ್ದಿದ್ದಾರೆ ಎಂದು ರೈಲ್ವೆ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಕಳ್ಳತನಕ್ಕೆ ಅಧಿಕಾರಿಗಳ ನೆರವು: ವಿಚಿತ್ರ ಎಂದರೆ ಕಂಬಿಗಳನ್ನು ಕಿತ್ತುಕೊಂಡು ಹೋದ ಕಳ್ಳರಿಗೆ ರೈಲ್ವೆ ಇಲಾಖೆ ಅಧಿಕಾರಿಗಳೇ ನೆರವು ನೀಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಬಳಕೆಯಾದ ರೈಲ್ವೇ ಟ್ರ್ಯಾಕ್​ ಅನ್ನು ಕಿತ್ತು ಮಾರಾಟ ಮಾಡಲು ಕಳ್ಳರು ಮತ್ತು ಅಧಿಕಾರಿಗಳ ಮಧ್ಯೆ ಒಪ್ಪಂದ ನಡೆದಿದೆ ಎಂದು ಹೇಳಲಾಗಿದೆ. ಟ್ರ್ಯಾಕ್​ ಕಳ್ಳತನ ಪ್ರಕರಣ ಬೆಳಕಿಗೆ ಬಂದ ಬಳಿಕ ರೈಲ್ವೆ ವಿಭಾಗದ ಭದ್ರತಾ ಆಯುಕ್ತ ಸೇರಿದಂತೆ ಇಬ್ಬರನ್ನು ಅಮಾನತುಗೊಳಿಸಲಾಗಿದೆ. ಇವರ ವಿರುದ್ಧ ಇಲಾಖಾ ವಿಚಾರಣೆ ನಡೆಸಲು ಸೂಚಿಸಲಾಗಿದೆ. ಪ್ರಕರಣ ದಾಖಲಿಸಿಕೊಂಡಿರುವ ವಿಜಿಲೆನ್ಸ್​ ತಂಡ ಆರೋಪಿಗಳ ಪತ್ತೆಗೆ ಜಾಲ ಬೀಸಿದೆ.

ಇನ್ನೊಂದು ಪ್ರಕರಣದಲ್ಲಿ, ಪಾಟ್ನಾದ ಸಬ್ಜಿಬಾಗ್​ ಪ್ರದೇಶದಲ್ಲಿ ಮೊಬೈಲ್​ ಟವರ್​ ಅನ್ನೇ ಕದ್ದೊಯ್ಯಲಾಗಿದೆ. ಕಂಪನಿಯ ಸೇವಾ ಸಿಬ್ಬಂದಿ ಎಂದು ಹೇಳಿಕೊಂಡು ಬಂದ ಖದೀಮರು ಟವರ್​ ನವೀಕರಣ ಮಾಡಲಾಗುವುದು ಎಂದು ಜನರನ್ನು ನಂಬಿಸಿ ಕಿತ್ತೊಯ್ದಿದ್ದರು. ಕಂಪನಿಯ ನಿಜವಾದ ಸಿಬ್ಬಂದಿ ಟವರ್​ ಎಣಿಕೆಯ ವೇಳೆ ಕಳುವಾಗಿದ್ದು, ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಈ ಹಿಂದೆಯೂ ನಡೆದಿತ್ತು ಟವರ್​ ಕಳ್ಳತನ: ಈ ಹಿಂದೆಯೂ ಪಾಟ್ನಾದ ಪಿರ್ಬೋರ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಅಳವಡಿಸಲಾಗಿದ್ದ ಮೊಬೈಲ್ ಟವರ್ ಅನ್ನು ಖದೀಮರು ಕಳ್ಳತನ ಮಾಡಿದ್ದ ಪ್ರಕರಣ ನಡೆದಿದ್ದವು. ಈ ಬಗ್ಗೆ ಜನರು ನೀಡಿದ ದೂರಿನ ಮೇರೆಗೆ ಪರಿಶೀಲನೆ ನಡೆಸಿದಾಗ ಕಳ್ಳತನ ಪ್ರಕರಣ ಬೆಳಕಿಗೆ ಬಂದಿತ್ತು.

ಮಾಹಿತಿಯ ಪ್ರಕಾರ, 2006ರಲ್ಲಿ ಏರ್​ಸೆಲ್​ ಕಂಪನಿಗೆ ಸೇರಿದ್ದ ಮೊಬೈಲ್ ಟವರ್ ಅನ್ನು ಜಿಟಿಎಲ್ ಕಂಪನಿ ಖರೀದಿಸಿತ್ತು. ಲಿಖಿತ ಎಫ್‌ಐಆರ್‌ನಲ್ಲಿ ಜಿಟಿಎಲ್ ಕಂಪನಿಯ ಉದ್ಯೋಗಿಗಳು ಎಂದು ಹೇಳಿಕೊಂಡು ಕೆಲವರು ಮೊಬೈಲ್ ಟವರ್ ಅಳವಡಿಸಿದ ಮನೆಗೆ ಬಂದಿದ್ದರು. ಬಳಿಕ ಮೊಬೈಲ್ ಟವರ್ ಅನ್ನು ಅಲ್ಲಿಂದ ಕಿತ್ತುಕೊಂಡು ಹೋಗಿದ್ದರು.

ಅನುಮಾನದ ಮೇಲೆ ಜನರು ದೂರು ನೀಡಿದ ಬಳಿಕ ವಿಚಾರಣೆ ನಡೆಸಿದಾಗ ಕಳ್ಳತನವಾಗಿದ್ದು ಗೊತ್ತಾಗಿದೆ. ಜಿಟಿಎಲ್ ಕಂಪನಿಯ ಅಧಿಕಾರಿಗಳು ಈ ಬಗ್ಗೆ ಪೊಲೀಸರಿಗೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಸಿಸಿಟಿವಿ ದೃಶ್ಯಾವಳಿ ಆಧರಿಸಿ ಕಳ್ಳರ ಪತ್ತೆಗೆ ಯತ್ನಿಸುತ್ತಿದ್ದಾರೆ. ಮೊಬೈಲ್ ಟವರ್‌ನ ಒಟ್ಟು ವೆಚ್ಚ 8 ಲಕ್ಷ 32 ಸಾವಿರ ರೂ ಎಂದು ಅಂದಾಜಿಸಲಾಗಿದೆ.

ಓದೀ: ಕೇರಳ ಪೊಲೀಸರ ಆಪರೇಷನ್ ಆಗ್ ಕಾರ್ಯಾಚರಣೆ: 2500 ಗ್ಯಾಂಗ್​​ಸ್ಟರ್​ಗಳ ಬಂಧನ