ಮುಂಬೈ: ಮರಾಠಿ ಮತ್ತು ಹಿಂದಿ ಚಿತ್ರಗಳಲ್ಲಿ ಅಭಿನಯಿಸಿದ್ದ ಹಿರಿಯ ನಟ ರಮೇಶ್ ದೇವ್ ಅವರು ಮಂಗಳವಾರ ಹೃದಯಾಘಾತದಿಂದ ಮುಂಬೈನ ಕೊಕಿನಾಬೆನ್ ಅಂಬಾನಿ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ.
ಜ.93 ರಂದು 93ನೇ ವರ್ಷ ಜನ್ಮ ದಿನ ಆಚರಿಸಿಕೊಂಡಿದ್ದ ರಮೇಶ್ ಅವರು ಪತ್ನಿ ಸೀಮಾ, ಮಕ್ಕಳಾದ ಅಜಿಂಕ್ಯಾ ಮತ್ತು ಅಭಿನಯ್ ಹಾಗೂ ಅಪಾರ ಬಂಧುಗಳನ್ನು ಅಗಲಿದ್ದಾರೆ.
ಬಹುಮುಖ ಪ್ರತಿಭೆಯ ರಮೇಶ್ ಅವರು 450ಕ್ಕೂ ಹೆಚ್ಚು ಹಿಂದಿ ಹಾಗೂ ಮರಾಠಿ ಚಿತ್ರಗಳಲ್ಲಿ ಅಭಿನಯಿಸಿ ಸೈ ಎನಿಸಿಕೊಂಡಿದ್ದರು. ನಾಯಕನಾಗಿ ಯಶಸ್ವಿಯಾಗದಿದ್ದರೂ, ಪೋಷಕ ಪಾತ್ರದಲ್ಲಿ ಮಿಂಚಿದವರು. ಇವರ ಪತ್ನಿ ಹಾಗೂ ಮಕ್ಕಳು ಕೂಡ ಚಿತ್ರರಂಗದಲ್ಲಿದ್ದಾರೆ. ರಮೇಶ್ ನಟನೆ ಜೊತೆ ಚಿತ್ರ ನಿರ್ಮಾಣ ಕೂಡ ಮಾಡಿದ್ದಾರೆ.
ಕೋಲ್ಹಾಪುರದಲ್ಲಿ ಬೆಳೆದ ರಮೇಶ್ 1951 ರಲ್ಲಿ ಮರಾಠಿ ಸಿನಿಮಾ ಪಾಟ್ಲಾಚಿ ಪೋರ್ ಚಿತ್ರದ ಮೂಲಕ ಮೊದಲ ಬಾರಿಗೆ ಬಣ್ಣ ಹಚ್ಚಿದರು. ಬಳಿಕ ಅಂಧಾಲಾ ಮಗ್ತೋ ಏಕ್ ದೋಲಾ ಸೇರಿ ಹಲವು ಸಿನಿಮಾಗಳಲ್ಲಿ ನಟಿಸಿದರು.
ಇನ್ನು 1962ರಲ್ಲಿ ಆರತಿ ಎಂಬ ಸಿನಿಮಾ ಮೂಲಕ ಹಿಂದಿಗೂ ಎಂಟ್ರಿ ಕೊಟ್ಟರು. ಬಳಿಕ ಜೀವನ್ ಮೃತ್ಯು, ಖಿಲೋನಾ, ಮೇರೆ ಅಪ್ನೆ, ಮಿ.ಇಂಡಿಯಾ, ಘಾಯಲ್ ಸೇರಿದಂತೆ ಪ್ರಮುಖ ಸಿನಿಮಾ ಮೂಲಕ ಖ್ಯಾತಿ ಗಳಿಸಿದರು.
ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
