ಬಣ್ಣ ಬಣ್ಣದ ಫ್ರಾಕ್, ಚಂದದ ಅಂಗಿಯನ್ನು ತೊಟ್ಟು ಓಡಾಡುತ್ತಿರುವ ಶ್ವಾನಗಳು.. ಇದನ್ನು ಕಂಡು ಹಿರಿ ಹಿರಿ ಹಿಗ್ಗುವ ಶ್ವಾನ ಪ್ರಿಯರು. ಹೈದ್ರಾಬಾದ್ನಲ್ಲೀಗ ಹೊಸ ಫ್ಯಾಶನ್ ಶುರುವಾಗಿದೆ.
ಹಬ್ಬದ ಸಮಯದಲ್ಲಿ ತಾವು ಹೊಸ ಬಟ್ಟೆಗಳನ್ನು ಖರೀದಿಸುವುದು ಮಾತ್ರವಲ್ಲದೇ ತಮ್ಮ ನಾಯಿಗಳಿಗೂ ಹೊಸ ಬಟ್ಟೆಗಳನ್ನು ಖರೀದಿಸುತ್ತಿದ್ದಾರೆ ಶ್ವಾನ ಪ್ರಿಯರು.
ಹೈದ್ರಾಬಾದ್ನಲ್ಲಿ ಶ್ವಾನಗಳಿಗಾಗಿಯೇ ಬಟ್ಟೆ ತಯಾರಿಕಾ ಮಳಿಗೆಗಳನ್ನು ಆರಂಭಿಸಿ ಸುಂದರವಾದ ವಿವಿಧ ವಿನ್ಯಾಸದ ಬಟ್ಟೆಗಳನ್ನು ತಯಾರಿಸುತ್ತಿದ್ದಾರೆ ಮಹಾರಾಷ್ಟ್ರದ ಫ್ಯಾಷನ್ ಡಿಸೈನರ್ ನಿಮಿಷಾ ದೀಕ್ಷಿತ್.
2018ರಲ್ಲಿ 'ಡಾಗ್ ಓ ಬೌ' ಎಂಬ ಸ್ಟಾರ್ಟಪ್ ಕಂಪನಿ ಆರಂಭಿಸಿದ ನಿಮಿಷಾ ದೀಕ್ಷಿತ್ ಅವರು ಹೈದರಾಬಾದ್ನ ಬಂಜಾರಾ ಹಿಲ್ಸ್ ಮತ್ತು ಕೂಕಟ್ಪಲ್ಲಿಯಲ್ಲಿ ಎರಳು ಮಳಿಗೆಯನ್ನು ಹೊಂದಿದ್ದಾರೆ.
50 ಜನ ಸಿಬ್ಬಂದಿಯನ್ನು ಹೊಂದಿರುವ ಅವರು, ವಿವಿಧ ಮೆಟ್ರೋ ಸಿಟಿಗಳಿಗೆ ಶ್ವಾನಗಳ ವಿವಿಧ ವಿನ್ಯಾಸದ ಬಟ್ಟೆಗಳನ್ನು ಸರಬರಾಜು ಮಾಡುತ್ತಿದ್ದಾರೆ. ವರ್ಷಕ್ಕೆ 1 ಕೋಟಿ ರೂಪಾಯಿ ವಹಿವಾಟು ನಡೆಯುತ್ತಿದೆ ಎಂದು ನಿಮಿಷಾ ದೀಕ್ಷಿತ್ ತಿಳಿಸಿದ್ದಾರೆ.
ಸಾಕು ಪ್ರಾಣಿಗಳಿಗಾಗಿ ಗ್ರಾಹಕರ ಅಭಿರುಚಿಗೆ ಅನುಗುಣವಾಗಿ ಟ್ಯಾಂಗ್ರಿಸ್, ಟಕ್ಸೆಡೋಸ್, ಶೇರ್ವಾನಿ, ಫ್ರಾಕ್‌ಗಳಂತಹ ಬಟ್ಟೆ ಮತ್ತು ಹಾಸಿಗೆಗಳನ್ನು ತಯಾರಿಸುತ್ತೇವೆ. ಚೆನ್ನೈನಲ್ಲಿಯೂ ಕಂಪನಿಯ ಶಾಖೆ ಇದೆ. ಅಲ್ಲಿಯೂ ಉತ್ತಮ ವಹಿವಾಟು ನಡೆಯುತ್ತಿದೆ ಎಂದರು.
