ಕಠ್ಮಂಡು: ನೇಪಾಳದಲ್ಲಿ ಸಂಭವಿಸಿದ ಭೀಕರ ವಿಮಾನ ಅಪಘಾತದಲ್ಲಿ ಮೃತಪಟ್ಟ ಗಗನಸಖಿ ಒಶಿನ್ ಅಲೆ ಮಗರ್ ತಮ್ಮ ಕುಟುಂಬಕ್ಕೆ ಮಾಡಿದ್ದ ವಾಗ್ದಾನ ಈಡೇರಿಸಲಾಗದೆಯೇ ಮರಳಿ ಬಾರದ ಲೋಕಕ್ಕೆ ತೆರಳಿದ್ದಾರೆ. ಭಾರತದಲ್ಲಿ ವಿದ್ಯಾಭ್ಯಾಸ ಮಾಡಿದ್ದ ಗಗನಸಖಿ ಒಶಿನ್ ಅಲೆ ಮಗರ್ ಅವರು ಕೆಲಸ ಮುಗಿಸಿ ಪೊಖರಾದಿಂದ ಮಾಘ ಸಂಕ್ರಾಂತಿ ಹಬ್ಬವನ್ನು ಆಚರಿಸಲು ಬರುವುದಾಗಿ ಕುಟುಂಬಕ್ಕೆ ಭರವಸೆ ನೀಡಿ ಭಾನುವಾರ ಮನೆಯಿಂದ ತೆರಳಿದ್ದರು. ಆದರೆ ಮರಳಿ ಬಂದದ್ದು ಮಾತ್ರ ಆಕೆಯ ಮೃತ ದೇಹ. ಐವರು ಭಾರತೀಯರು ಸೇರಿದಂತೆ 72 ಜನರಿದ್ದ ಯೇತಿ ಏರ್‌ಲೈನ್ಸ್‌ನ 9N-ANC ATR-72 ವಿಮಾನವು ಭಾನುವಾರ ಮಧ್ಯ ನೇಪಾಳದ ರೆಸಾರ್ಟ್ ನಗರವಾದ ಪೋಖಾರಾದಲ್ಲಿ ಸೇತಿ ನದಿಯ ದಡದಲ್ಲಿ ಪತನಗೊಂಡಿತ್ತು. ಈ ಅಪಘಾತದಲ್ಲಿ ಸಾವನ್ನಪ್ಪಿದ 69 ಜನರಲ್ಲಿ 24 ವರ್ಷದ ಓಶಿನ್ ಕೂಡ ಸೇರಿದ್ದಾರೆ.
ಆಕೆಯ ಕುಟುಂಬ ಮನೆಯಲ್ಲಿ ಹಬ್ಬ ಆಚರಿಸಲು ಸಿದ್ಧತೆ ನಡೆಸಿರುವಾಗಲೇ ವಿಮಾನ ದುರಂತದ ಸುದ್ದಿ ಬರಸಿಡಿಲಿನಂತೆ ಅಪ್ಪಳಿಸಿತ್ತು. ಹಬ್ಬದ ದಿನದಂದು ಕೆಲಸಕ್ಕೆ ಹೋಗಬೇಡ ಎಂದು ತಾವು ಮಗಳಿಗೆ ಮುಂಜಾನೆಯಷ್ಟೇ ಹೇಳಿದ್ದನ್ನು ಭಾರತೀಯ ಸೇನೆಯ ನಿವೃತ್ತ ಅಧಿಕಾರಿ ಆಕೆಯ ತಂದೆ ಮೋಹನ್ ಅಲೆ ಮಗರ್ ನೆನಪಿಸಿಕೊಳ್ಳುತ್ತಾರೆ. ಆ ದಿನದಂದು ಎರಡು ವಿಮಾನಗಳಲ್ಲಿ ಕೆಲಸ ಮಾಡಿದ ನಂತರವೇ ಹಬ್ಬ ಆಚರಿಸುವುದಾಗಿ ಆಕೆ ಹೇಳಿದ್ದಳು ಎಂದು ಮೋಹನ್ ಮಾಧ್ಯಮಗಳಿಗೆ ತಿಳಿಸಿದರು.
ಓಶಿನ್ ಎರಡು ವರ್ಷಗಳಿಂದ ಯೇತಿ ಏರ್‌ಲೈನ್ಸ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಇವರು ಮೂಲತಃ ಚಿತ್ವಾನ್‌ನ ಮಡಿ ಮೂಲದವರು. ಉದ್ಯೋಗಕ್ಕೆ ಸೇರಿದ ನಂತರ ನಂತರ ಕಠ್ಮಂಡುವಿನಲ್ಲಿ ವಾಸಿಸುತ್ತಿದ್ದರು ಮತ್ತು ಕಳೆದ ಆರು ತಿಂಗಳಿನಿಂದ ಕಠ್ಮಂಡುವಿಗೆ ಬರುವಂತೆ ತನ್ನ ತಂದೆ ತಾಯಿಗೂ ಒತ್ತಾಯಿಸುತ್ತಿದ್ದರು. ಓಶಿನ್‌ಗೆ ಇಬ್ಬರು ಸಹೋದರಿಯರು ಮತ್ತು ಓರ್ವ ಸಹೋದರ ಇದ್ದಾರೆ. ನಾಲ್ವರು ಒಡಹುಟ್ಟಿದವರಲ್ಲಿ ಇವಳೇ ಹಿರಿಯ ಮಗಳು. ಸಹೋದರನಿಗೆ ಕೇವಲ ನಾಲ್ಕು ವರ್ಷ. ತನ್ನ ಸಹೋದರ ಮತ್ತು ಸಹೋದರಿಯರನ್ನು ಶಿಕ್ಷಣಕ್ಕಾಗಿ ಕಠ್ಮಂಡುವಿಗೆ ಕರೆದೊಕೊಂಡು ಬಂದಿದ್ದಳು.
ಇವರು ಗೈಂಡಕೋಟ್‌ನ ಆಕ್ಸ್‌ಫರ್ಡ್ ಕಾಲೇಜಿನಲ್ಲಿ ಮತ್ತು ಭಾರತದಲ್ಲಿ ಅಧ್ಯಯನ ಮಾಡಿದರು. ಕಠ್ಮಂಡುವಿನ ಸಹಾರಾ ಏರ್ ಹೋಸ್ಟೆಸ್ ಅಕಾಡೆಮಿಯಿಂದ ಗಗನಸಖಿಯಾಗಿ ಪದವಿ ಪಡೆದರು. ಒಶಿನ್ ಎರಡು ವರ್ಷಗಳ ಹಿಂದೆ ಪೋಖರಾದಲ್ಲಿ ವಿವಾಹವಾಗಿದ್ದರು. ಇವರ ಪತಿ ಪ್ರಸ್ತುತ ಯುಕೆಯಲ್ಲಿದ್ದಾರೆ. ಮಗಳ ಮೃತ ದೇಹವನ್ನು ಗುರುತಿಸಲು ಆಕೆಯ ತಂದೆ ಮೋಹನ್ ಮತ್ತು ತಾಯಿ ಸಬ್ನಮ್ ಅಲೆ ಮಗರ್ ಪೋಖರಾ ತಲುಪಿದ್ದಾರೆ ಎಂದು ವರದಿ ತಿಳಿಸಿದೆ.
ಯೇತಿ ಏರ್‌ಲೈನ್ಸ್‌ನ 9N-ANC ATR-72 ವಿಮಾನವು ಕಠ್ಮಂಡುವಿನ ತ್ರಿಭುವನ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಬೆಳಗ್ಗೆ 10:33 ಕ್ಕೆ ಹೊರಟಿತ್ತು ಮತ್ತು ಲ್ಯಾಂಡ್ ಆಗುವ ಕೆಲವೇ ನಿಮಿಷಗಳ ಮೊದಲು ಹಳೆಯ ವಿಮಾನ ನಿಲ್ದಾಣ ಮತ್ತು ಹೊಸ ವಿಮಾನ ನಿಲ್ದಾಣದ ನಡುವಿನ ಸೇತಿ ನದಿಯ ದಡದಲ್ಲಿ ಅಪಘಾತಕ್ಕೀಡಾಯಿತು ಎಂದು ನೇಪಾಳ ನಾಗರಿಕ ವಿಮಾನಯಾನ ಪ್ರಾಧಿಕಾರ ತಿಳಿಸಿದೆ. ವಿಮಾನದಲ್ಲಿ ಒಟ್ಟು 68 ಪ್ರಯಾಣಿಕರು ಮತ್ತು ನಾಲ್ವರು ಸಿಬ್ಬಂದಿ ಇದ್ದರು. ಮೌಂಟ್ ಎವರೆಸ್ಟ್ ಸೇರಿದಂತೆ ವಿಶ್ವದ 14 ಅತಿ ಎತ್ತರದ ಪರ್ವತಗಳ ಪೈಕಿ ಎಂಟು ಪರ್ವತಗಳಿಗೆ ನೆಲೆಯಾಗಿರುವ ನೇಪಾಳ ವಿಮಾನ ಅಪಘಾತಗಳ ಕರಾಳ ಇತಿಹಾಸವನ್ನು ಹೊಂದಿದೆ.
ಇದನ್ನೂ ಓದಿ: ಆಧಾರ್‌, ಪಾನ್‌ ಕಾರ್ಡ್‌, ಪಾಸ್‌ಪೋರ್ಟ್ ಎಲ್ಲವೂ ಅಕ್ರಮ: ಬೆಂಗಳೂರಿನಲ್ಲಿ ನೇಪಾಳಿ ಪ್ರಜೆ ಬಂಧನ
