ಮುಂಬೈ: ಮುಂಬೈ ಮಹಾನಗರ ಮತ್ತು ಇಡೀ ಮಹಾರಾಷ್ಟ್ರವು ಕಳೆದ ಒಂದೂ ಕಾಲು ವರ್ಷದಿಂದ ಕೊರೊನಾ ಬಿಕ್ಕಟ್ಟನ್ನು ಎದುರಿಸುತ್ತಿದೆ. ಈ ಮಧ್ಯೆ ಕೊರೊನಾ ಬಿಕ್ಕಟ್ಟಿನ ಜೊತೆಗೆ ಮ್ಯುಕೊಮೈಕೊಸಿಸ್ ಎಂಬ ಮತ್ತೊಂದು ಆರೋಗ್ಯದ ಸಮಸ್ಯೆ ಈಗ ಎದುರಾಗಿದೆ. ಕೊರೊನಾ ಮತ್ತು ಇತರ ದೀರ್ಘಕಾಲೀನ ರೋಗಗಳಿಂದ ಚೇತರಿಸಿಕೊಂಡ ರೋಗಿಗಳು ಹೆಚ್ಚಾಗಿ ಈ ಸೋಂಕಿಗೆ ಒಳಗಾಗುವ ಸಾಧ್ಯತೆಯಿದೆ. ಪ್ರಸ್ತುತ ಮ್ಯುಕೊಮೈಕೊಸಿಸ್ ಪೀಡಿತ 26 ರೋಗಿಗಳನ್ನು ಮುಂಬೈ ಮಹಾನಗರ ಪಾಲಿಕೆಯ ಕೆಇಎಂ ಆಸ್ಪತ್ರೆಗೆ ಹಾಗೂ 25 ರೋಗಿಗಳನ್ನು ಪರೇಲ್ ಗ್ಲೋಬಲ್ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ಎರಡೂ ಆಸ್ಪತ್ರೆಗಳಲ್ಲಿ ದಾಖಲಾಗಿರುವ ಒಟ್ಟು ರೋಗಿಗಳ ಪೈಕಿ ಏಳು ಜನ ಕಣ್ಣು ಕಳೆದುಕೊಂಡಿದ್ದಾರೆ. ಈ ತೀವ್ರ ಆರೋಗ್ಯ ಬಿಕ್ಕಟ್ಟನ್ನು ಗಮನದಲ್ಲಿಟ್ಟುಕೊಂಡು, ರಾಜ್ಯ ಸರ್ಕಾರ ಮತ್ತು ಕೋವಿಡ್ ಕಾರ್ಯಪಡೆ ಈ ರೋಗವನ್ನು ತಕ್ಷಣ ನಿಯಂತ್ರಣಕ್ಕೆ ತರಲು ಕ್ರಮ ತೆಗೆದುಕೊಳ್ಳುವ ಅವಶ್ಯಕತೆಯಿದೆ ಎಂದು ಗ್ಲೋಬಲ್ ಆಸ್ಪತ್ರೆಯ ಮೂಗು-ಕಿವಿ-ಗಂಟಲು ತಜ್ಞ ಡಾ. ಮಿಲಿಂದ್ ನವಲಖೆ ಈಟಿವಿ ಭಾರತ್‌ಗೆ ಮಾಹಿತಿ ನೀಡಿದರು.
ಆಕ್ರಮಣಕಾರಿ ಶಿಲೀಂಧ್ರಗಳು ಮಾರಣಾಂತಿಕವಾಗಿ ಬದಲಾಗುತ್ತಿವೆ. ಮ್ಯುಕೊಮೈಕೊಸಿಸ್ ಇದೊಂದು ಸಾಂಕ್ರಾಮಿಕ, ಶಿಲೀಂಧ್ರ ರೋಗ. ಈ ರೋಗವು ಬಹಳ ಹಿಂದಿನಿಂದಲೂ ಅಸ್ತಿತ್ವದಲ್ಲಿದ್ದು ಎರಡು ರೀತಿಯ ಶಿಲೀಂಧ್ರಗಳನ್ನು ಒಳಗೊಂಡಿದೆ. ದುರ್ಬಲಗೊಂಡ ರೋಗನಿರೋಧಕ ಶಕ್ತಿಯನ್ನು ಹೊಂದಿರುವ ಕೊರೊನಾದಿಂದ ಚೇತರಿಸಿಕೊಂಡ ರೋಗಿಗಳ ಮೂಗಿಗೆ ಈ ಶಿಲೀಂಧ್ರ ಪ್ರವೇಶಿಸುತ್ತದೆ. ನಂತರ ಸೋಂಕು ಕಿವಿ, ಕಣ್ಣು ಮತ್ತು ಮೆದುಳಿಗೆ ಹರಡುತ್ತದೆ.
ಮೂಗಿನ ಉರಿಯೂತ, ಸೈನಸ್ ತೊಂದರೆಗಳು, ಕಣ್ಣು ಕೆಂಪಾಗುವುದು ಮುಂತಾದ ಲಕ್ಷಣಗಳು ಕಾಣಿಸಿಕೊಂಡ ತಕ್ಷಣ ವೈದ್ಯರ ಬಳಿಗೆ ಹೋಗುವುದು ಬಹಳ ಮುಖ್ಯ. ಇಲ್ಲದಿದ್ದರೆ, ರೋಗಿಗಳು ಕಣ್ಣು, ಮೂಗುಗಳನ್ನು ಕಳೆದುಕೊಳ್ಳಬೇಕಾಗುತ್ತದೆ. ಚಿಕಿತ್ಸೆಯು ಇನ್ನೂ ವಿಳಂಬವಾದಲ್ಲಿ ಮೆದುಳಿಗೆ ಸಂಬಂಧಿಸಿದ ಸಮಸ್ಯೆಗಳು ಉದ್ಭವಿಸಿ ಸಾವಿಗೆ ಕಾರಣವಾಗಬಹುದು. ಈ ಕಾಯಿಲೆಯ ಮರಣ ಪ್ರಮಾಣವು ಶೇ 50 ರಷ್ಟಿರುವುದು ಚಿಂತೆಯ ವಿಷಯವಾಗಿದೆ.
