ಇಂದೋರ್ (ಮಧ್ಯಪ್ರದೇಶ): ಮಧ್ಯಪ್ರದೇಶದ ಇಂದೋರ್ ನಗರ ದೇಶದಲ್ಲೇ ಅತಿ ಪ್ರಸಿದ್ಧಿ. ತನ್ನ ಸ್ವಚ್ಛತೆಯಿಂದಲೇ ಹೆಸರುವಾಸಿಯಾಗಿರುವ ಈ ನಗರದ ವರ್ತಕರು ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಹೊಸ ಆಫರ್ ಘೋಷಿಸಿದ್ದಾರೆ. ಇದೇನಪ್ಪಾ ರಾಜಕೀಯ ಪಕ್ಷಗಳ ಹಾಗೆ ಇವರೂ ಕೂಡ ಭರವಸೆಗಳನ್ನು ಘೋಷಿಸಿದ್ರಾ ಅಂತೀರಾ.. ಒಂದು ರೀತಿ ಹಾಗೆಯೇ ಆದರೆ, ಅದರ ಹಿಂದೆ ಒಳ್ಳೆಯ ಕಾರಣವಿದೆ.
ರಾಜಸ್ಥಾನ, ಹರಿಯಾಣ, ತೆಲಂಗಾಣ, ಮಿಜೋರಾಂ ಮತ್ತು ಮಧ್ಯಪ್ರದೇಶದ ವಿಧಾನಸಭಾ ಚುನಾವಣೆ ನವೆಂಬರ್ 7 ರಿಂದ ಆರಂಭವಾಗಲಿದೆ. ಚುನಾವಣೆಯ ಜ್ವರ ಏರಿರುವ ಮಧ್ಯಪ್ರದೇಶದಲ್ಲಿ ಕಾಂಗ್ರೆಸ್, ಬಿಜೆಪಿ ಮಧ್ಯೆ ನೇರ ಪೈಪೋಟಿ ಇದೆ. ಹೀಗಾಗಿ ಮತದಾನ ಹೆಚ್ಚಳಕ್ಕಾಗಿ ಸರ್ಕಾರ ಸೇರಿದಂತೆ ಸಂಘಸಂಸ್ಥೆಗಳು ಅಭಿಯಾನ ನಡೆಸಿವೆ. ಇದೀಗ ಇಂದೋರ್‌ನಲ್ಲಿರುವ ವರ್ತಕರ ಸಂಘವೂ ಅಭಿಯಾನದ ಭಾಗವಾಗಿದ್ದು, ವಿಶೇಷ ಆಫರ್ ಪ್ರಕಟಿಸಿದೆ.
ಅವಲಕ್ಕಿ, ಜಿಲೇಬಿ ಫ್ರೀ: ರಾಜಕೀಯ ಪಕ್ಷಗಳು ಈಗಾಗಲೇ ಮತದಾರರನ್ನು ಸೆಳೆಯಲು ಹಲವು 'ಉಚಿತ'ಗಳನ್ನು ಘೋಷಿಸಿವೆ. ಅದರಂತೆ ವರ್ತಕರ ಸಂಘವೂ ಫ್ರೀ ಆಫರ್ ನೀಡಿದೆ. ಮತದಾನ ದಿನದಂದು ಯಾರು ಬೆಳಗ್ಗೆ 9 ಗಂಟೆಯೊಳಗೆ ಬಂದು ಮತದಾನ ಮಾಡುತ್ತಾರೋ ಅವರಿಗೆ ಒಗ್ಗರಣೆ ಅವಲಕ್ಕಿ ಮತ್ತು ಜಿಲೇಬಿಯನ್ನು ಉಚಿತವಾಗಿ ನೀಡಲಿದೆ. 6 ರ ಬಳಿಕ ಮತದಾನ ಮಾಡಿದಲ್ಲಿ ಅವರಿಗೆ ಶೇ.10 ರಿಯಾಯಿತಿ ದರದಲ್ಲಿ ತಿಂಡಿ, ಸ್ವೀಟ್ ಸಿಗಲಿದೆ ಎಂದು ಹೇಳಿದೆ.
ಇಂದೋರ್‌ನ ಫುಡ್ ಹಬ್ '56 ದುಕಾನ್' ಆವರಣದಲ್ಲಿರುವ ಅಂಗಡಿಗಳ ಮಾಲೀಕರು ಈ ವಿನೂತನ ಕೊಡುಗೆಯನ್ನು ಘೋಷಿಸಿದ್ದಾರೆ. ಮತದಾನ ಮಾಡಿ ಬೆರಳಿನ ಶಾಯಿ ತೋರಿಸಿದವರಿಗೆ ಉಚಿತವಾಗಿ ಒಗ್ಗರಣೆ ಅವಲಕ್ಕಿ ಮತ್ತು ಜಿಲೇಬಿ ಸಿಗಲಿದೆ. 9 ಗಂಟೆಯೊಳಗೆ ನೀವು ಮತದಾನ ಮಾಡಬೇಕು ಎಂದು ವರ್ತಕರ ಸಂಘದ ಅಧ್ಯಕ್ಷ ಗುಂಜನ್ ಶರ್ಮಾ ಹೇಳಿದರು. ಸ್ವಚ್ಛತೆಯಲ್ಲಿ ದೇಶದಲ್ಲೇ ಮುಂಚೂಣಿಯಲ್ಲಿರುವ ಇಂದೋರ್ ನಗರ ಇದೀಗ ಶೇಕಡವಾರು ಮತದಾನದಲ್ಲೂ ಅಗ್ರಸ್ಥಾನದಲ್ಲಿಡಲು ಈ ಪ್ರಯತ್ನ ಎಂದು ಅವರು ಹೇಳಿದರು.
ಇಂದೋರ್ ಜಿಲ್ಲೆಯಲ್ಲಿ ಐದು ಅಸೆಂಬ್ಲಿ ಸ್ಥಾನಗಳಿವೆ. 2018 ರಲ್ಲಿ 14.72 ಲಕ್ಷ ಮತದಾರರಲ್ಲಿ 67 ಪ್ರತಿಶತ ಮತದಾರರು ತಮ್ಮ ಹಕ್ಕನ್ನು ಚಲಾಯಿಸಿದ್ದಾರೆ. ಈ ಬಾರಿ 15.55 ಲಕ್ಷ ಅರ್ಹ ಮತದಾರರಿದ್ದಾರೆ. ರಾಜ್ಯದ 230 ಸ್ಥಾನಗಳಿಗೆ ನವೆಂಬರ್ 17 ರಂದು ಒಂದೇ ಹಂತದಲ್ಲಿ ಚುನಾವಣೆ ನಡೆಯಲಿದೆ.
ಇದನ್ನೂ ಓದಿ: ರಾಜಕೀಯ ಪಕ್ಷಗಳ ಯೋಜನೆಗಳು 'ಉಚಿತ'ವಲ್ಲ: ಫ್ರೀ ಯೋಜನೆಗಳ ಬಗ್ಗೆ ಚುನಾವಣಾ ಆಯೋಗ ಅಸಮಾಧಾನ
