ಮೂರು ವರ್ಷಗಳಿಂದ ಆಸ್ತಿ ತೆರಿಗೆ ಪಾವತಿಸದ ಅಸಾರಾಂ ಆಶ್ರಮ ಜಪ್ತಿಗೆ ಮುಂದಾದ ನಗರಸಭೆ

ಕಳೆದ ಮೂರು ವರ್ಷದಿಂದ ತೆರಿಗೆ ಬಾಕಿ - ಅಸಾರಾಂ ಆಶ್ರಮ ಆಸ್ತಿ ಜಪ್ತಿಗೆ ಮುನ್ಸಿಪಲ್ ಕಾರ್ಪೊರೇಷನ್ ಚಿಂತನೆ - ಅಧಿಕಾರಿಗಳಿಂದ ಪರಿಶೀಲನೆ

ಚಿಂದ್ವಾರ (ಮಧ್ಯಪ್ರದೇಶ): ಆಸ್ತಿ ತೆರಿಗೆ ಪಾವತಿಸದ ಕಾರಣ ಇಲ್ಲಿಯ ಅಸಾರಾಂ ಬಾಪುಗೆ ಸೇರಿದ ಆಶ್ರಮದ ಆಸ್ತಿಯನ್ನು ಜಪ್ತಿ ಮಾಡುವ ಬಗ್ಗೆ ನಗರಸಭೆ ಆಯುಕ್ತ ರಾಹುಲ್ ಸಿಂಗ್ ಕಂದಾಯ ಇಲಾಖೆಯ ಪರಿಶೀಲನಾ ಸಭೆಯಲ್ಲಿ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. ಅಸಾರಾಂ ಆಶ್ರಮ ಹಾಗೂ ಗುರುಕುಲ ಆಸ್ತಿ ತೆರಿಗೆ ಬಾಕಿ ಉಳಿಸಿಕೊಂಡಿದೆ. ಈ ಹಿನ್ನೆಲೆ ನಗರಸಭೆ ಅಸಾರಾಂ ಆಸ್ತಿ ಜಪ್ತಿಗೆ ಮುಂದಾಗಿದೆ.

ಈ ಬಗ್ಗೆ ಕಂದಾಯ ಅಧಿಕಾರಿ ಸಾಜಿದ್ ಖಾನ್ ಮಾತನಾಡಿ, ಚಿಂದ್ವಾರ ನಗರದ ವಾರ್ಡ್ ನಂ.46 ಮತ್ತು ವಾರ್ಡ್ ನಂ.3ರಲ್ಲಿ ಅಸಾರಾಂ ಅವರಿಗೆ ಸೇರಿದ ಜಮೀನು ಮತ್ತು ಆಸ್ತಿ ಇದೆ. ವಾರ್ಡ್ ನಂ.3ರಲ್ಲಿ ರೂ 4,80986 ಆಸ್ತಿ ತೆರಿಗೆ ಬಾಕಿ ಇದ್ದು, ವಾರ್ಡ್ ನಂ.46ರಲ್ಲಿ ರೂ, 9,88401 ರೂ. ಆಸ್ತಿ ತೆರಿಗೆ ಬಾಕಿ ಇದೆ. ವಾರ್ಡ್​ ನಂ46ರಲ್ಲಿ ಅಜಯ್ ರಸಿಕಲಾಲ್ ಶಾ ಶಕ್ತಿ ಟ್ರೇಡರ್ಸ್ ಹೆಸರಿನಲ್ಲಿದೆ. ಈ ವಾರ್ಡಗಳಲ್ಲಿ ಸುಮಾರು 3 ವರ್ಷಗಳಿಂದ ಆಸ್ತಿ ತೆರಿಗೆ ಬಾಕಿ ಉಳಿದಿದ್ದು, ಇದಕ್ಕಾಗಿ ನಗರಸಭೆ ಲೆಕ್ಕಪರಿಶೋಧನಾ ವರದಿಯನ್ನು ಕೇಳಿದೆ ಎಂದು ಹೇಳಿದರು.

ಶಿಕ್ಷಣ ಅಥವಾ ಸಾಮಾನ್ಯ ಜನರ ಅನುಕೂಲಕ್ಕಾಗಿ ಸಾಮಾಜಿಕ ಕಾರ್ಯಗಳನ್ನು ಮಾಡಿದರೆ ಸರ್ಕಾರವು ತೆರಿಗೆಯಲ್ಲಿ ವಿನಾಯಿತಿ ನೀಡುತ್ತದೆ. ಹಾಗಾಗಿ ಲೆಕ್ಕಪರಿಶೋಧನಾ ವರದಿಯನ್ನು ಕೇಳಲಾಗಿದೆ. ಸರ್ಕಾರದಿಂದ ತೆರಿಗೆಯಲ್ಲಿ ವಿನಾಯಿತಿ ನೀಡುವ ಯಾವುದೇ ಅವಕಾಶವಿದ್ದರೆ ನೀಡಿ ಉಳಿದ ತೆರಿಗೆ ವಸೂಲಿ ಮಾಡಲಾಗುತ್ತದೆ. ಇವೆಲ್ಲವನ್ನು ಪರಿಶೀಲಿಸಿ 1 ತಿಂಗಳ ನಂತರ ಆಸ್ತಿ ಜಪ್ತಿಗೆ ನೋಟಿಸ್​ ಲಗತ್ತಿಸಲಾಗುವುದು. ಈಗಾಗಲೇ ಅಸಾರಾಂ ಆಶ್ರಮ ಮತ್ತು ಗುರುಕುಲವನ್ನು 1 ತಿಂಗಳ ಕಾಲ ನಗರಸಭೆಗೆ ಹಸ್ತಾಂತರಿಸಲಾಗಿದ್ದು, ತೆರಿಗೆ ಜಮಾ ಮಾಡುವಂತೆ ನೋಟಿಸ್ ಸಹ ನೀಡಲಾಗಿದೆ. ಕಾಲಮಿತಿಯೊಳಗೆ ಆಶ್ರಮದಿಂದ ತೆರಿಗೆ ಜಮಾ ಮಾಡದಿದ್ದರೆ ಆಸ್ತಿ ಜಪ್ತಿಗೆ ಕ್ರಮ ಕೈಗೊಳ್ಳಲಾಗುವುದು ಎಂದು ಅಧಿಕಾರಿ ತಿಳಿಸಿದ್ದಾರೆ.

ಸುಮಾರು 65 ಎಕರೆ ಜಾಗದಲ್ಲಿ ಅಸಾರಾಂ ಆಶ್ರಮ ವ್ಯಾಪಿಸಿದ್ದು, ಇದರಲ್ಲಿ ಗುರುಕುಲದ ಮಕ್ಕಳಿಗೆ ವಸತಿ ನಿಲಯಗಳು, ಸೇವಕರಿಗೆ ಮನೆಗಳು ಮತ್ತು ಉಳಿದ ಭೂಮಿಯಲ್ಲಿ ಸಾವಯವ ಮತ್ತು ನೈಸರ್ಗಿಕ ಕೃಷಿ ಮಾಡಲಾಗುತ್ತಿದೆ. ಮತ್ತೊಂದೆಡೆ, ಅಸಾರಾಂ ಗುರುಕುಲವು ಪ್ಯಾರಾಸಿಯಾ ರಸ್ತೆಯಲ್ಲಿ ಸುಮಾರು 15 ರಿಂದ 20 ಎಕರೆ ಪ್ರದೇಶದಲ್ಲಿದ್ದು, ಇದಕ್ಕೂ ತೆರಿಗೆ ಪಾವತಿಸಬೇಕಾಗಿದೆ ಎಂದು ಸಾಜಿದ್ ಖಾನ್ ಹೇಳಿದರು.

ಅತ್ಯಾಚಾರ ಪ್ರಕರಣ: ಇನ್ನು 2013 ರಲ್ಲಿ ಸ್ವಯಂ ಘೋಷಿತ ದೇವಮಾನವ ಅಸಾರಾಂ​ ಬಾಪುರನ್ನು ಅತ್ಯಾಚಾರ ಪ್ರಕರಣದಲ್ಲಿ ಪೊಲೀಸರು ಬಂಧಿಸಿದ್ದರು. 2001ರಿಂದ 2006ರ ನಡುವೆ ಗುಜರಾತ್​ನ ಅಹಮದಾಬಾದ್ ಬಳಿಯ ಮೊಟೆರಾದಲ್ಲಿರುವ ಅಸಾರಾಂ ಬಾಪು ಆಶ್ರಮದಲ್ಲಿ ವಾಸಿಸುತ್ತಿದ್ದ ಸೂರತ್‌ ಮೂಲದ ಶಿಷ್ಯೆಯ ಮೇಲೆ ಹಲವಾರು ಬಾರಿ ಅತ್ಯಾಚಾರವೆಸಗಿದ ಆರೋಪವು ಅಸಾರಾಂ ಮೇಲಿತ್ತು. ಈ ಕುರಿತಂತೆ 2013ರಲ್ಲಿ ಅತ್ಯಾಚಾರ ಪ್ರಕರಣ ದಾಖಲಾಗಿತ್ತು.

ಈ ಪ್ರಕರಣದಲ್ಲಿ ಗುಜರಾತ್​ನ ಗಾಂಧಿನಗರದ ಸೆಷನ್ಸ್ ಕೋರ್ಟ್ಅಸಾರಾಂ ಅವರನ್ನು ದೋಷಿ ಎಂದು ತೀರ್ಪು ನೀಡಿತ್ತು. ಅಲ್ಲದೇ ಜೀವಾವಧಿ ಶಿಕ್ಷೆಯನ್ನು ಸಹ ವಿಧಿಸಿತ್ತು. ಭಾರತೀಯ ದಂಡ ಸಂಹಿತೆ 376 - 2 (ಸಿ) (ಅತ್ಯಾಚಾರ), 377 (ಅಸ್ವಾಭಾವಿಕ ಅಪರಾಧಗಳು), 342 (ಕಾನೂನುಬಾಹಿರ ಬಂಧನ), 354 (ಕೆರಳಿಸುವ ಉದ್ದೇಶದಿಂದ ಹಲ್ಲೆ ಅಥವಾ ಕ್ರಿಮಿನಲ್ ಪ್ರಹಾರ), 357 (ಹಲ್ಲೆ) ಮತ್ತು ಮತ್ತು 506 (ಬೆದರಿಕೆ) ಅಡಿಯಲ್ಲಿ ಅಸಾರಾಂ ಅವರನ್ನು ನ್ಯಾಯಾಲಯವು ದೋಷಿ ಎಂದು ತೀರ್ಪು ನೀಡಿತ್ತು.

ಇದನ್ನೂ ಓದಿ: ಅತ್ಯಾಚಾರ ಪ್ರಕರಣ: ಸ್ವಯಂಘೋಷಿತ ದೇವಮಾನವ ಅಸಾರಾಂ ಬಾಪುಗೆ ಜೀವಾವಧಿ ಶಿಕ್ಷೆ