ಬೆಂಗಳೂರು ಸೇರಿದಂತೆ ನಾಲ್ಕು ನಗರಗಳಿಗೆ ಜೆಮ್​ಶೆಡ್​ಪುರದಿಂದ ಆಕ್ಸಿಜನ್ ರವಾನೆ

ಆಕ್ಸಿಜನ್ ಕೊರತೆ ಎದುರಿಸುತ್ತಿರುವ ದೇಶದ ನಾಲ್ಕು ನಗರಗಳಿಗೆ ಜಾರ್ಖಂಡ್​ನ ಜೆಮ್​ಶೆಡ್​ಪುರದಿಂದ ಪ್ರಾಣವಾಯು ರವಾನೆ ಮಾಡಲಾಗಿದೆ.

ಜೆಮ್​ಶೆಡ್​​ಪುರ್​ (ಜಾರ್ಖಂಡ್): ಇಲ್ಲಿಂದ ಬೆಂಗಳೂರು, ದೆಹಲಿ, ಕಾನ್ಪುರ ಮತ್ತು ಡೆಹ್ರಾಡೂನ್​ ನಗರಗಳಿಗೆ ರೈಲಿನ ಮೂಲಕ ಮೆಡಿಕಲ್ ಆಕ್ಸಿಜನ್ ಕಳುಹಿಸಲಾಗಿದೆ.

ಕೋವಿಡ್ ಸೋಂಕು ಉಲ್ಬಣಗೊಂಡು ವಿವಿಧ ನಗರಗಳಲ್ಲಿ ಉಂಟಾಗಿರುವ ಆಕ್ಸಿಜನ್ ಕೊರತೆ ನೀಗಿಸಲು ವಿಶೇಷ ರೈಲಿನ ಮೂಲಕ ಆಕ್ಸಿಜನ್ ಪೂರೈಕೆ ಮಾಡಲಾಗ್ತಿದೆ. ಭಾನುವಾರ ರಾತ್ರಿ ಜೆಮ್​ಶೆಡ್​​ಪುರದ ಬಾರ್ಮಮೈನ್ಸ್​​ನ ಲಿಂಡೆ ಆಕ್ಸಿಜನ್​ ಪ್ಲಾಂಟ್​​ನಿಂದ ಟಾಟಾನಗರದ ಗೂಡ್ಸ್​ ಯಾರ್ಡ್​ ರೈಲ್ವೆ ನಿಲ್ದಾಣದ ಮೂಲಕ ಬೆಂಗಳೂರು, ದೆಹಲಿ, ಕಾನ್ಪುರ ಮತ್ತು ಡೆಹ್ರಾಡೂನ್​ಗೆ ಆಕ್ಸಿಜನ್ ರವಾನೆಯಾಗಿದೆ.

ಇದನ್ನೂ ಓದಿ: ಕೇಂದ್ರದ ಕೋವಿಡ್‌ ನಿರ್ವಹಣೆ ಟೀಕಿಸಿ ಸಲಹಾ ಸಮಿತಿಯಿಂದ ಹೊರಬಂದ ವೈರಾಣು ತಜ್ಞ ಶಾಹಿದ್ ಜಮೀಲ್

ಡೆಹ್ರಾಡೂನ್​ ಮತ್ತು ಕಾನ್ಪುರಕ್ಕೆ ಇದು ಮೊದಲನೇ ಹಂತದ ಆಕ್ಸಿಜನ್ ರವಾನೆಯಾಗಿದೆ. ಡೆಹ್ರಾಡೂನ್​ಗೆ 120 ಮೆಟ್ರಿಕ್ ಟನ್ ಮತ್ತು ಕಾನ್ಪುರಕ್ಕೆ 40 ಮೆಟ್ರಿಕ್ ಟನ್ ಕಳುಹಿಸಲಾಗಿದೆ. ಇನ್ನುಳಿದಂತೆ ದೆಹಲಿ ಮತ್ತು ಬೆಂಗಳೂರಿಗೆ ತಲಾ 120 ಮೆಟ್ರಿಕ್ ಟನ್ ಕಳುಹಿಸಿಕೊಡಲಾಗಿದೆ. ಇದುವರೆಗೆ ಜೆಮ್​​ಶೆಡ್​ಪುರದಿಂದ ದೇಶದ ವಿವಿಧ ನಗರಗಳಿಗೆ 400 ಮೆಟ್ರಿಕ್ ಟನ್ ಆಕ್ಸಿಜನ್ ಸಾಗಣಿಕೆಯಾಗಿದೆ. ಆಕ್ಸಿಜನ್ ರವಾನೆಯ ನೇತೃತ್ವವನ್ನು ಆರ್​ಪಿಎಫ್​ ವಹಿಸಿಕೊಂಡಿತ್ತು.