ಕಾಶಿ ವಿಶ್ವನಾಥನ ಸನ್ನಿಧಿಯಿಂದ ಕೊರೊನಾ ರೋಗಿಗಳಿಗೆ ಕಿಟ್​

ಬಡ ಜನರಿಗೆ ಸಹಾಯ ಮಾಡುವ ಉದ್ದೇಶದಿಂದ ಕೊರೊನಾ ವಿರುದ್ಧ ಹೋರಾಟ ನಡೆಸುವ ಸಲುವಾಗಿ, ಕಾಶಿಯ ವಿಶ್ವನಾಥ ದೇವಾಲಯದ ಆಡಳಿತವು ಔಷಧ ಕಿಟ್​ಗಳನ್ನು ವಿತರಿಸಲು ನಿರ್ಧರಿಸಿದೆ.

ವಾರಣಾಸಿ(ಉ.ಪ್ರದೇಶ): ಕೊರೊನಾ ಸಾಂಕ್ರಾಮಿಕ ರೋಗವು ದೇಶದಲ್ಲಿ ಅಲ್ಲೋಲ-ಕಲ್ಲೋಲ ಸೃಷ್ಟಿಸಿದೆ. ಇಂಥ ಪರಿಸ್ಥಿತಿ ನಡುವೆ ಕಾಶಿಯ ವಿಶ್ವನಾಥ ದೇವಾಲಯದ ಆಡಳಿತವು ಸೋಂಕಿನ ವಿರುದ್ಧ ಹೋರಾಡುವ ರೋಗಿಗಳಿಗೆ ಸಹಾಯ ನೀಡಲು ನಿರ್ಧರಿಸಿದೆ.

ಕೊರೊನಾ ಸೋಂಕಿತ ಜನರಿಗೆ ದೇವಾಲಯದ ಆಡಳಿತದಿಂದ ಔಷಧ ಕಿಟ್​ಗಳನ್ನು ವಿತರಿಸಲಾಗುವುದು. ಸದ್ಯಕ್ಕೆ 5 ಸಾವಿರ ಪ್ಯಾಕೆಟ್‌ಗಳನ್ನು ತಯಾರಿಸಲಾಗಿದ್ದು, ಬಡ ಜನರಿಗೆ ಸಹಾಯ ಮಾಡಲು ನಿರ್ಧರಿಸಲಾಗಿದೆ. ವಾರಣಾಸಿಯ ಮಂಡಲ ಆಯುಕ್ತ ದೀಪಕ್ ಅಗರ್ವಾಲ್ ಅವರ ಉಪಸ್ಥಿತಿಯಲ್ಲಿ ರೋಗಿಗಳ ಚಿಕಿತ್ಸೆಯನ್ನು ಪ್ರಾರಂಭಿಸಲಾಗುವುದು.

ಪ್ರಸ್ತುತ 5000 ಕಿಟ್​ ದೇವಾಲಯದ ಆಡಳಿತವು ಮೊದಲ ಹಂತದಲ್ಲಿ ಸಿದ್ಧಪಡಿಸಿದೆ. ಔಷಧಿಯನ್ನು ಮತ್ತು ಅದನ್ನು ಹೇಗೆ ಬಳಸುವುದು ಎಂಬುದನ್ನು ಕಿಟ್​ ಒಳಗೊಂಡಿದೆ. ಇದಕ್ಕಾಗಿ ದೇವಾಲಯ ಆಡಳಿತವು ಬಜೆಟ್ ಸಿದ್ಧಪಡಿಸಿದೆ ಎಂದು ದೀಪಕ್ ಅಗರ್ವಾಲ್ ಮಾಹಿತಿ ನೀಡಿದ್ದಾರೆ.