ಬಾಲಿವುಡ್ ಭಾಯ್ಜಾನ್ ಸಲ್ಮಾನ್ ಖಾನ್ ತಮ್ಮ ಬಹು ನಿರೀಕ್ಷಿತ ಚಿತ್ರ 'ಸಿಕಂದರ್' ಮೂಲಕ 2025ರ ಈದ್ಗೆ ಪ್ರೇಕ್ಷಕರೆದುರು ಬರಲು ಸಜ್ಜಾಗಿದ್ದಾರೆ. ಎ.ಆರ್.ಮುರುಗದಾಸ್ ನಿರ್ದೇಶನದ ಸಿನಿಮಾದಲ್ಲಿ ಕನ್ನಡತಿ ರಶ್ಮಿಕಾ ಮಂದಣ್ಣ ಪ್ರಮುಖ ಪಾತ್ರ ವಹಿಸಿದ್ದಾರೆ. ಬಹುನಿರೀಕ್ಷಿತ ಪ್ರಾಜೆಕ್ಟ್ ಹಿಂದಿರುವ ಚಲನಚಿತ್ರ ನಿರ್ಮಾಣ ಸಂಸ್ಥೆ ನಾಡಿಯಾಡ್ವಾಲಾ ಗ್ರ್ಯಾಂಡ್‌ಸನ್ ಎಂಟರ್ಟೈನ್ಮೆಂಟ್ ಇಂದು ಟೀಸರ್ ಅನಾವರಣಗೊಳಿಸುವ ಮೂಲಕ ಅಭಿಮಾನಿಗಳಿಗೆ ಸಲ್ಮಾನ್ ಖಾನ್ ಬರ್ತ್ಡೇಯ ಟ್ರೀಟ್ ಕೊಟ್ಟಿದ್ದಾರೆ.
ಪ್ರಸ್ತುತ ವರ್ಷ ಸಲ್ಮಾನ್ ಖಾನ್ ನಾಯಕ ನಟನಾಗಿ ಯಾವುದೇ ಸಿನಿಮಾದಲ್ಲಿ ಕಾಣಿಸಿಕೊಂಡಿಲ್ಲ. ಅವರ ಚಿತ್ರ ತೆರೆಕಂಡು ಬಹಳ ದಿನಗಳಾಗಿದ್ದು, ಅಪಾರ ಸಂಖ್ಯೆಯ ಅಭಿಮಾನಿಗಳ ಜೊತೆಗೆ ಸಲ್ಮಾನ್ ಖಾನ್ ಕೂಡಾ ತಮ್ಮ ಸಿಕಂದರ್ ಸಿನಿಮಾ ಬಿಡುಗಡೆಗಾಗಿ ಎದುರು ನೋಡುತ್ತಿದ್ದಾರೆ. ಮುಂದಿನ ವರ್ಷ ಈದ್ಗೆ ಅದ್ಧೂರಿಯಾಗಿ ತೆರೆಕಾಣಲಿರುವ ಸಿನಿಮಾದ ಟೀಸರ್ ಇಂದು ಅನಾವರಣಗೊಂಡಿದೆ.
ಸಿಕಂದರ್ ಟೀಸರ್ ನಿನ್ನೆ, ಡಿಸೆಂಬರ್ 27 ರಂದು ಬಿಡುಗಡೆಯಾಗಬೇಕಿತ್ತು. ಆದ್ರೆ ಸಿಂಗ್ ಅವರ ನಿಧನದಿಂದಾಗಿ ಮುಂದೂಡಲ್ಪಟ್ಟಿತು. ಇಂದು ಬೆಳಗ್ಗೆ 11.07ಕ್ಕೆ ಸಮಯ ನಿಗದಿಯಾಗಿತ್ತಾದರೂ, ಸಂಜೆ 4.05ಕ್ಕೆ ಮುಂದೂಡಲಾಯಿತು. ಅಂತಿಮವಾಗಿ ಅಭಿಮಾನಿಗಳ ಕಾಯುವಿಕೆ ಪೂರ್ಣಗೊಂಡಿದೆ. ನಿನ್ನೆ ಸೂಪರ್ ಸ್ಟಾರ್ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದು, ಇಂದು ಅಭಿಮಾನಿಗಳು ಟೀಸರ್ ಕಣ್ತುಂಬಿಕೊಂಡಿದ್ದಾರೆ.
ಮೂಲತಃ ಸಿಕಂದರ್ ಟೀಸರ್ ಅನ್ನು ಸಲ್ಮಾನ್ ಖಾನ್ ಅವರ 59ನೇ ಹುಟ್ಟುಹಬ್ಬದ ಅಂಗವಾಗಿ ಕಳೆದ ದಿನ ಅಂದರೆ ಡಿಸೆಂಬರ್ 27ರಂದು ಬಿಡುಗಡೆ ಮಾಡಲು ನಿರ್ಧರಿಸಲಾಗಿತ್ತು. ಆದ್ರೆ, ಚಿತ್ರದ ಹಿಂದಿರುವ ನಾಡಿಯಾಡ್ವಾಲಾ ಗ್ರ್ಯಾಂಡ್‌ಸನ್ ಎಂಟರ್ಟೈನ್ಮೆಂಟ್ ಒಂದು ದಿನ ಮುಂದೂಡಲ್ಪಟ್ಟಿತು. ಡಾ.ಮನಮೋಹನ್ ಸಿಂಗ್ ಅವರ ನಿಧನ ಹಿನ್ನೆಲೆ ರಾಷ್ಟ್ರೀಯ ಶೋಕಾಚರಣೆಯಿಂದಾಗಿ ಬಿಡುಗಡೆಯನ್ನು ವಿಳಂಬಗೊಳಿಸಲಾಗುವುದು ಎಂದು ಪ್ರೊಡಕ್ಷನ್ ಹೌಸ್ ಘೋಷಿಸಿತು. ಇದೀಗ ಟೀಸರ್ ಅನಾವರಣಗೊಂಡಿದ್ದು, ಅದರಲ್ಲಿರುವ ಡೈಲಾಗ್ ಕೇಳಿದ್ರೆ ತಮ್ಮ ಹಿಂದೆ ಬಿದ್ದಿರುವವರಿಗೆ ಟಾಂಗ್ ಕೊಟ್ಟಂತೆ ಕಂಡಿದೆ.
1 ನಿಮಿಷ 41 ಸೆಕೆಂಡುಗಳುಳ್ಳ ಟೀಸರ್ ಆ್ಯಕ್ಷನ್-ಪ್ಯಾಕ್ಡ್ ಚಿತ್ರದ ಒಂದು ನೋಟವನ್ನು ಒದಗಿಸಿದೆ. ಸಲ್ಮಾನ್ ಖಾನ್ ಆ್ಯಕ್ಷನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಂಪೂರ್ಣ ಟೀಸರ್ನಲ್ಲಿ ಬಂದಿರುವ ಒಂದೇ ಒಂದು ಡೈಲಾಗ್ ಸಕತ್ ಪವರ್ಫುಲ್ ಆಗಿದೆ. "ಅನೇಕ ಜನರು ನನ್ನ ಹಿಂದೆ ಬಿದ್ದಿದ್ದಾರೆಂಬುದನ್ನು ಕೇಳಿದೆ. ನಾನು ಹಿಂತಿರುಗುವುದೊಂದೇ.. " ಎಂದು ಹೇಳುತ್ತಾ ನಾಯಕ ನಟ ತಮ್ಮನ್ನು ಕೊಲ್ಲಲು ಬಂದ ಮುಸುಕುಧಾರಿಗಳ ಮೇಲೆ ತಿರುಗಿಬಿದ್ದಿದ್ದಾರೆ.
ಇದನ್ನೂ ಓದಿ: ಅಮಿತಾಭ್, ಶಾರುಖ್ To ದೀಪಿಕಾ: ನಯಾ ಪೈಸೆ ಪಡೆಯದೇ ನಟಿಸಿದ ಸೂಪರ್ ಸ್ಟಾರ್ಗಳಿವರು
ಸಲ್ಮಾನ್ ಡೈಲಾಗ್ಸ್ ಮತ್ತು ಮುಖವಾಡ ಧರಿಸಿರುವ ದಾಳಿಕೋರರ ಗುಂಪನ್ನು ನೋಡಿದ್ರೆ ಸೂಪರ್‌ಸ್ಟಾರ್ ಎದುರಿಸುತ್ತಿರುವ ಮಾರಣಾಂತಿಕ ಬೆದರಿಕೆಗಳಿಗೆ ಕೊಟ್ಟ ತಿರುಗೇಟಿನಂತೆ ಕಾಣುತ್ತಿದೆ. ಈ ವರ್ಷ ನಟ ಕೆಲವು ಬಾರಿ ಜೀವ ಬೆದರಿಕೆ ಸ್ವೀಕರಿಸಿರೋದು ನಿಮಗೆ ತಿಳಿದಿರುವ ವಿಚಾರವೇ. ಈ ಹಿನ್ನೆಲೆ ಹೆಸರಾಂತ ನಟನ ಭದ್ರತೆಯನ್ನೂ ಹೆಚ್ಚಿಸಲಾಗಿದೆ.
ಇದನ್ನೂ ಓದಿ: ಬ್ರಹ್ಮಗಂಟು ನಟಿ ಶೋಭಿತಾ To ಶ್ಯಾಮ್ ಬೆನಗಲ್: 2024ರಲ್ಲಿ ನಾವು ಕಳೆದುಕೊಂಡ ಭಾರತೀಯ ಸೆಲೆಬ್ರಿಟಿಗಳಿವರು
2023ರಲ್ಲಿ ಬಿಡುಗಡೆಯಾದ ಟೈಗರ್ 3 ನಂತರ ಬರುತ್ತಿರುವ ಸಲ್ಮಾನ್ ಖಾನ್ ಮುಖ್ಯಭೂಮಿಕೆಯ ಬಹುನಿರೀಕ್ಷಿತ ಚಿತ್ರವಿದು. ಗಜಿನಿ, ತುಪ್ಪಕ್ಕಿ ಮತ್ತು ಸರ್ಕಾರ್‌ಗೆ ಹೆಸರುವಾಸಿಯಾಗಿರುವ ತಮಿಳು ನಿರ್ದೇಶಕ ಎಆರ್ ಮುರುಗದಾಸ್ ನಿರ್ದೇಶನದ ಈ ಚಿತ್ರವು ಸಲ್ಮಾನ್ ಅಭಿಮಾನಿಗಳಿಗೆ ಭರ್ಜರಿ ಟ್ರೀಟ್ ಆಗಲಿದೆ ಎಂದು ನಿರೀಕ್ಷಿಸಲಾಗಿದೆ.
ಸಿಕಂದರ್ನಲ್ಲಿ ರಶ್ಮಿಕಾ ಮಂದಣ್ಣ, ವತ್ಸನ್ ಚಕ್ರವರ್ತಿ, ಕಾಜಲ್ ಅಗರ್ವಾಲ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಾಜಿದ್ ನಾಡಿಯಾಡ್ವಾಲಾ ಅವರು ತಮ್ಮ ನಾಡಿಯಾಡ್ವಾಲಾ ಗ್ರ್ಯಾಂಡ್‌ಸನ್ ಎಂಟರ್ಟೈನ್ಮೆಂಟ್ ಬ್ಯಾನರ್ ಅಡಿಯಲ್ಲಿ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.
