ತಿರುವನಂತಪುರಂ (ಕೇರಳ): ಕೇರಳದ ಯುಡಿಎಫ್ ಮಹಿಳಾ ಶಾಸಕಿ ವಿರುದ್ಧದ ತಮ್ಮ ವಿವಾದಾತ್ಮಕ ಹೇಳಿಕೆಯನ್ನು ಸಿಪಿಐ(ಎಂ) ಶಾಸಕ ಎಂಎಂ ಮಣಿ ಹಿಂಪಡೆದಿದ್ದಾರೆ. ಯಾರನ್ನೂ ಅವಮಾನಿಸುವ ಉದ್ದೇಶವನ್ನು ಹೊಂದಿಲ್ಲ ಎಂದೂ ಅವರು ಸ್ಪಷ್ಟಪಡಿಸಿದರು.
ಹತ್ತು ವರ್ಷಗಳ ಹಿಂದೆ ಹತ್ಯೆಯಾದ ಟಿಪಿ ಚಂದ್ರಶೇಖರನ್ ಅವರ ಪತ್ನಿ ಹಾಗೂ ಹಾಲಿ ಶಾಸಕಿ ರಮಾ ವಿರುದ್ಧ ಆಡಳಿತಾರೂಢ ಪಕ್ಷದ ಎಂಎಂ ಮಣಿ ಆಕ್ಷೇಪಾರ್ಹ ಹೇಳಿಕೆ ನೀಡಿದ್ದರು. 'ರಮಾ ವಿಧವೆಯಾಗಿರುವುದು ಆಕೆಯ ವಿಧಿ ಲಿಖಿತ' ಎಂದು ಹೇಳಿದ್ದರು. ಇದು ಆಡಳಿತ ಮತ್ತು ಪ್ರತಿಪಕ್ಷಗಳ ನಡುವಿನ ವಾಗ್ವಾದಕ್ಕೆ ಕಾರಣವಾಗಿತ್ತು.
ಅಲ್ಲದೇ, ಮಣಿಯವರ ಈ ಹೇಳಿಕೆಗೆ ವಿಧಾನಸಭೆಯಲ್ಲೂ ಕೋಲಾಹಲ ಸೃಷ್ಟಿಸಿತ್ತು. ಶಾಸಕಿ ರಮಾ ಕ್ಷಮೆಯಾಚಿಸಬೇಕೆಂದು ಸದನದ ಬಾವಿಗಿಳಿದು ಪ್ರತಿಪಕ್ಷಗಳು ಒತ್ತಾಯಿಸಿದ್ದರು. ಇಂದು ಕೂಡ ಮಣಿಯವರ ಹೇಳಿಕೆ ಭಾರಿ ಗದ್ದಲವನ್ನೇ ಸೃಷ್ಟಿಸಿತ್ತು. ಈ ವೇಳೆ, ಮಧ್ಯಪ್ರವೇಶಿಸಿದ ಸ್ಪೀಕರ್ ಎಂ.ಬಿ.ರಾಜೇಶ್, ತಮ್ಮ ಆಕ್ಷೇಪಾರ್ಹ ಹೇಳಿಕೆಯನ್ನುಎಂ.ಎಂ.ಮಣಿ ಹಿಂಪಡೆಯುತ್ತಾರೆ ಎಂದು ನಾನು ನಿರೀಕ್ಷಿಸುತ್ತೇನೆ ಎಂದು ಹೇಳಿದರು.
ಇದಾದ ಕೆಲವೇ ಹೊತ್ತಿನಲ್ಲಿ ಮಣಿ, ತಮ್ಮ ಟೀಕೆಗಳನ್ನು ಹಿಂತೆಗೆದುಕೊಳ್ಳುವುದಾಗಿ ಸದನದಲ್ಲಿ ಘೋಷಿಸಿದರು. ಅಲ್ಲದೇ, ಯಾರನ್ನೂ ಅವಮಾನಿಸುವ ಉದ್ದೇಶ ಹೊಂದಿಲ್ಲ. ನನ್ನ ಯಾವ ಅರ್ಥದಲ್ಲಿ ಹೇಳಿದ್ದೇ ಎಂಬುವುದನ್ನೂ ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ ಎಂದು ಸಂಕ್ಷಿಪ್ತವಾಗಿ ಹೇಳಿದರು.
ಇನ್ನು, ಸಿಪಿಐ(ಎಂ) ಬಂಡಾಯ ನಾಯಕರಾಗಿದ್ದ ಚಂದ್ರಶೇಖರನ್ ಕ್ರಾಂತಿಕಾರಿ ಮಾರ್ಕ್ಸ್‌ವಾದಿ ಪಕ್ಷ (ಆರ್‌ಎಂಪಿ) ಎಂಬ ಪಕ್ಷ ಕಟ್ಟಿದ್ದರು. ಇದಾದ ನಂತರ 2012ರಲ್ಲಿ ಉತ್ತರ ಕೇರಳದ ಒಂಚಿಯಾಯಂನಲ್ಲಿ ಅವರನ್ನು ಕೊಚ್ಚಿ ಕೊಲೆ ಮಾಡಲಾಗಿತ್ತು. ಇವರ ಪತ್ನಿಯೇ ರಮಾ ಯುಡಿಎಫ್ನಿಂದ ಶಾಸಕಿ ಆಗಿ ಆಯ್ಕೆಯಾಗಿದ್ದಾರೆ.
ಇದನ್ನೂ ಓದಿ: ಅಗತ್ಯ ವಸ್ತುಗಳ ಜಿಎಸ್ಟಿ ಏರಿಕೆ: ಕೇಂದ್ರದ ವಿರುದ್ಧ ಪ್ರತಿಪಕ್ಷಗಳ ಪ್ರತಿಭಟನೆ, ಸರ್ಕಾರದ ವಿರುದ್ಧ ಘೋಷಣೆ
