ಬಿಪಿನ್​ ರಾವತ್​ ಪಾರ್ಥಿವ ಶರೀರ ಸಾಗಿಸುತ್ತಿದ್ದ ಆ್ಯಂಬುಲೆನ್ಸ್​ಗೆ ಹೂಗಳ ಸುರಿಮಳೆ.. ಮೊಳಗಿದ ಭಾರತ್​ ಮಾತಾ ಕಿ ಜೈ ಘೋಷಣೆ

ಮದ್ರಾಸ್​ ರೆಜಿಮೆಂಟ್​ನಿಂದ ಸೂಳೂರುವರೆಗಿನ ಮಾರ್ಗಮಧ್ಯದ ರಸ್ತೆಗಳ ಇಕ್ಕೆಲಗಳಲ್ಲಿ ಕಿಕ್ಕಿರಿದು ತುಂಬಿದ್ದ ಜನರು ವೀರಯೋಧರಿಗೆ ಜೈಕಾರ ಕೂಗಿ, ಸೆಲ್ಯೂಟ್ ಮಾಡಿ, ಕೈ ಮುಗಿದು ಗೌರವ ಸಲ್ಲಿಸಿದ್ದಾರೆ. ಅಲ್ಲದೇ ದಾರಿಯುದ್ದಕ್ಕೂ ಭಾರತ್​ ಮಾತಾಕಿ ಜೈ ಕೂಗು ಪ್ರತಿಧ್ವನಿಸುತ್ತಿತ್ತು.

ತಮಿಳುನಾಡು: ಕೂನೂರು ಹೆಲಿಕಾಪ್ಟರ್ ಅಪಘಾತದಲ್ಲಿ ಮಡಿದ ಭಾರತೀಯ ಮೂರು ಸೇನಾ ಪಡೆಗಳ ಮುಖ್ಯಸ್ಥ(ಸಿಡಿಎಸ್) ಬಿಪಿನ್ ರಾವತ್, ಅವರ ಪತ್ನಿ ಮತ್ತು ಇತರ ಸಿಬ್ಬಂದಿಯ ಪಾರ್ಥಿವ ಶರೀರಗಳನ್ನು ಹೊತ್ತ ಆ್ಯಂಬುಲೆನ್ಸ್‌ ನೀಲಗಿರಿ ಜಿಲ್ಲೆಯ ಮದ್ರಾಸ್​ ರೆಜಿಮೆಂಟ್​ನಿಂದ ಸೂಳೂರು ವಾಯುನೆಲೆಗೆ ಬರುತ್ತಿದ್ದ ಮಾರ್ಗದಲ್ಲಿ ಜನರು ವಾಹನಗಳ ಮೇಲೆ ಹೂವು ಸುರಿದು, ಭಾರತ್​ ಮಾತಾಕಿ ಜೈ ಎಂದು ಕೂಗಿ ಗೌರವ ಸಲ್ಲಿಸಿದ್ದಾರೆ.

ಮದ್ರಾಸ್​ ರೆಜಿಮೆಂಟ್​ನಿಂದ ಸೂಳೂರುವರೆಗಿನ ಮಾರ್ಗಮಧ್ಯದ ರಸ್ತೆಗಳ ಇಕ್ಕೆಲಗಳಲ್ಲಿ ಕಿಕ್ಕಿರಿದು ತುಂಬಿದ್ದ ಜನರು ವೀರಯೋಧರಿಗೆ ಜೈಕಾರ ಕೂಗಿ, ಸೆಲ್ಯೂಟ್ ಮಾಡಿ, ಕೈ ಮುಗಿದು ಗೌರವ ಸಲ್ಲಿಸಿದ್ದಾರೆ. ಅಲ್ಲದೇ ದಾರಿಯುದ್ದಕ್ಕೂ ಭಾರತ್​ ಮಾತಾಕಿ ಜೈ ಕೂಗು ಪ್ರತಿಧ್ವನಿಸುತ್ತಿತ್ತು.

ಇದಲ್ಲದೇ, ಎಲ್ಲ 13 ದೇಹಗಳನ್ನು ಭಾರತೀಯ ವಾಯುಪಡೆಯ C-130J ಸೂಪರ್ ಹರ್ಕ್ಯುಲಸ್ ವಿಮಾನದಲ್ಲಿ ತಮಿಳುನಾಡಿನ ಸೂಳೂರಿನಿಂದ ದೆಹಲಿಗೆ ತರಲಾಗುತ್ತಿದೆ. ಐಎಎಫ್ ಮುಖ್ಯಸ್ಥರು ಈಗಾಗಲೇ ವಾಯುನೆಲೆಯಿಂದ ದೆಹಲಿಗೆ ಪ್ರಯಾಣ ಬೆಳೆಸಿದ್ದಾರೆ ಎಂದು ತಿಳಿದು ಬಂದಿದೆ.

ಪಾರ್ಥಿವ ಶರೀರಗಳು ದೆಹಲಿಗೆ ಬಂದ ಬಳಿಕ ಪ್ರಧಾನಿ ಮೋದಿ, ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ರಕ್ಷಣಾ ರಾಜ್ಯ ಸಚಿವ ಅಜಯ್ ಭಟ್ ಮತ್ತು ಅಜಿತ್ ದೋವಲ್ ಅವರು ಸಿಡಿಎಸ್ ಜನರಲ್ ಬಿಪಿನ್ ರಾವತ್, ಅವರ ಪತ್ನಿ ಮತ್ತು ಇತರ 11 ಸಿಬ್ಬಂದಿಯ ಪಾರ್ಥಿವ ಶರೀರಕ್ಕೆ ಗೌರವ ಸಲ್ಲಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಮೃತರ ಕುಟುಂಬ ಸದಸ್ಯರೂ ಕೂಡ ದೆಹಲಿಗೆ ಆಗಮಿಸುತ್ತಿದ್ದಾರೆ. ಅವರಿಗೆ ಅಗತ್ಯವಿರುವ ಎಲ್ಲ ನೆರವು ಮತ್ತು ಬೆಂಬಲವನ್ನು ನೀಡಲಾಗುತ್ತಿದೆ. ಅಪಘಾತದಲ್ಲಿ ದೇಹಗಳು ಛಿದ್ರವಾದ ಕಾರಣ ಪತ್ತೆ ಕಾರ್ಯ ಕಠಿಣವಾಗಿದೆ. ಇದರಿಂದ ಅವರ ಕುಟುಂಬಸ್ಥರ ಸಹಾಯ ಪಡೆದು ಮೃತ ದೇಹಗಳನ್ನು ಗುರುತಿಸಲಾಗುವುದು ಎಂದು ಭಾರತೀಯ ಸೇನಾಧಿಕಾರಿಗಳು ತಿಳಿಸಿದ್ದಾರೆ.