ಧನ್‌ಬಾದ್ (ಜಾರ್ಖಂಡ್): ಇಲ್ಲಿನ ಪಂಚೇಟ್ ಅಣೆಕಟ್ಟನ್ನು ಉದ್ಘಾಟಿಸಿದ್ದ, ಮಾಜಿ ಪ್ರಧಾನಿ ಜವಾಹರ್ಲಾಲ್ ನೆಹರೂ ಅವರ ಪತ್ನಿ ಎಂದೇ ಹಣೆಪಟ್ಟಿ ಕಟ್ಟಿಕೊಂಡು ಶಿಕ್ಷೆಗೆ ಗುರಿಯಾಗಿದ್ದ ಬುಡಕಟ್ಟು ಸಮುದಾಯದ ಬುಧ್ನಿ ಮಾಂಜಿಯಾನ್ ಅವರು ಅನಾರೋಗ್ಯದಿಂದ ಶುಕ್ರವಾರ ರಾತ್ರಿ ನಿಧನರಾದರು. ಸಿಐಎಸ್ಎಫ್ ಯೋಧರು ಅವರ ಪಾರ್ಥಿವ ಶರೀರಕ್ಕೆ ಪುಷ್ಪನಮನ ಸಲ್ಲಿಸುವ ಮೂಲಕ ಶ್ರದ್ಧಾಂಜಲಿ ಸಲ್ಲಿಸಿದರು. ಬಳಿಕ ಪಾರ್ಥಿವ ಶರೀರದ ಮೆರವಣಿಗೆ ನಡೆಸಿ, ಪಂಚೇಟ್ ಘಾಟ್ನಲ್ಲಿ ಅಂತ್ಯಕ್ರಿಯೆ ನಡೆಸಲಾಯಿತು.
ಬುಡಕಟ್ಟು ಸಮುದಾಯದ ಬುಧ್ನಿ ಅವರು ಮಾಡದ ತಪ್ಪಿಗೆ 60 ವರ್ಷಗಳಿಂದ ಶಿಕ್ಷೆ ಅನುಭವಿಸುತ್ತಿದ್ದರು. ಬಹು ದಿನಗಳಿಂದ ಅನಾರೋಗ್ಯಕ್ಕೀಡಾಗಿ ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಜಾರ್ಖಂಡ್ನ ನಿರ್ಸಾದ ಪಂಚೇಟ್ ಹಿಲ್ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು. ಅವರು ಓರ್ವ ಪುತ್ರ, ಪುತ್ರಿಯನ್ನು ಅಗಲಿದ್ದಾರೆ.
ಮಾಂಜಿಯಾನ್ ನೆಹರೂ ಪತ್ನಿಯೇ?: ಪಶ್ಚಿಮಬಂಗಾಳದ ಮೂಲದ ಬುಧ್ನಿ ಮಾಂಜಿಯಾನ್ ಅವರು 17 ವರ್ಷದವರಾಗಿದ್ದಾಗ, ಮಾಜಿ ಪ್ರಧಾನಿ ದಿವಂಗತ ಜವಾಹರ್ಲಾಲ್ ನೆಹರೂ ಅವರ ಕೋರಿಕೆಯ ಮೇರೆಗೆ ಪಂಟೇಲ್ ಅಣೆಕಟ್ಟನ್ನು ಉದ್ಘಾಟಿಸಿದ್ದರು. ಈ ವೇಳೆ ನೆಹರೂ ಅವರು ಆಕೆಯ ಕೊರಳಿಗೆ ಹೂವಿನ ಹಾರ ಹಾಕಿ ಸನ್ಮಾನಿಸಿದ್ದರು. ಇದು ಅವರ ಬಾಳಿನಲ್ಲಿ ಬಿರುಗಾಳಿಯನ್ನೇ ಎಬ್ಬಿಸಿತ್ತು. ಆದಿವಾಸಿಗಳ ಸಂಪ್ರದಾಯದಲ್ಲಿ ಕೊರಳಿಗೆ ಹಾರ ಹಾಕಿಸಿಕೊಂಡಲ್ಲಿ ಅವರ ಪತ್ನಿಯಾಗುತ್ತಾರೆ.
ಪಂಚಾಯಿತಿ ಸೇರಿದ ಬುಡಕಟ್ಟು ಸಮುದಾಯ ಅಂದಿನಿಂದ (1959ರಿಂದ) ಬುಧ್ನಿ ಅವರನ್ನು ಜವಾಹರ್ಲಾಲ್ ನೆಹರೂ ಅವರ ಪತ್ನಿ ಎಂದು ಘೋಷಿಸಿತು. ಆದಿವಾಸಿಗಳಲ್ಲದ ವ್ಯಕ್ತಿಯನ್ನು ವಿವಾಹವಾಗಿದ್ದಕ್ಕೆ ಸಮುದಾಯದಿಂದಲೇ ಆಕೆಯನ್ನು ಬಹಿಷ್ಕಾರ ಹಾಕಲಾಗಿತ್ತು. ಬಳಿಕ ಅವರು ಜಾರ್ಖಂಡ್ಗೆ ಬಂದು ನೆಲೆಸಿದ್ದರು.
ಬಳಿಕ ವ್ಯಕ್ತಿಯೊಬ್ಬರ ಜೊತೆ ಜೀವನ ಸಾಗಿಸಿದ ಅವರಿಗೆ ಓರ್ವ ಪುತ್ರ ಮತ್ತು ಪುತ್ರಿ ಇದ್ದಾರೆ. ಸಮುದಾಯದಿಂದ ಶಿಕ್ಷೆಗೆ ಒಳಗಾಗಿದ್ದನ್ನು ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಅವರ ಗಮನಕ್ಕೂ ಈ ವಿಚಾರವನ್ನು ತರಲಾಗಿತ್ತು. ಅಲ್ಲದೇ ತಾವು ಕೆಲಸ ಮಾಡುತ್ತಿದ್ದ ಕಂಪನಿಯಿಂದ ಹೊರಹಾಕಿದ್ದನ್ನು ತಿಳಿಸಿದ್ದರು. ಆಕೆಗೆ ನೆರವು ನೀಡಿದ ರಾಜೀವ್ ಗಾಂಧಿ ಅವರು ಅದೇ ಕಂಪನಿಯಲ್ಲಿ ವಾಪಸ್ ಕೆಲಸಕ್ಕೆ ಸೇರಿಸಿದ್ದರು.
ಇದಾದ ಬಳಿಕ ಬುಧ್ನಿ ಮಾಂಜಿಯನ್ ಅವರು ಈಚೆಗೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಬಳಿ ಮನೆ ಮತ್ತು ಮಗಳಿಗೆ ಉದ್ಯೋಗ ಕೊಡಿಸಬೇಕು ಎಂದು ನೆರವು ಕೋರಿದ್ದರು. ಬಳಿಕ ಅನಾರೋಗ್ಯಕ್ಕೆ ತುತ್ತಾಗಿದ್ದರು.
ಇದನ್ನೂ ಓದಿ: ವಾಯು ಮಾಲಿನ್ಯ: ಉಸಿರಾಟದ ತೊಂದರೆ ಮಾತ್ರವಲ್ಲ, ಮಾನಸಿಕ ಆರೋಗ್ಯ ಸಮಸ್ಯೆಗಳಿಗೂ ಕಾರಣ - ತಜ್ಞರು
