ತೆಲಂಗಾಣದಲ್ಲಿ ಬಿಆರ್​ಎಸ್-​ಬಿಜೆಪಿ ಮೈತ್ರಿ: ಮಲ್ಲಿಕಾರ್ಜುನ ಖರ್ಗೆ ವಾಗ್ದಾಳಿ

ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ತೆಲಂಗಾಣದ ರಂಗಾರೆಡ್ಡಿ ಜಿಲ್ಲೆಯಲ್ಲಿ ಮಾತನಾಡುತ್ತಾ, ಸಿಎಂ ಕೆ.ಚಂದ್ರಶೇಖರ ರಾವ್ ಮತ್ತು ಬಿಜೆಪಿ ರಹಸ್ಯ ಮೈತ್ರಿ ಮಾಡಿಕೊಂಡಿದ್ದಾರೆ ಎಂದು ಆರೋಪಿಸಿದರು.

ರಂಗಾರೆಡ್ಡಿ (ತೆಲಂಗಾಣ): ತೆಲಂಗಾಣ ಮುಖ್ಯಮಂತ್ರಿ ಕೆ.ಚಂದ್ರಶೇಖರ ರಾವ್ (ಕೆಸಿಆರ್) ಮತ್ತು ಬಿಜೆಪಿ ನಡುವೆ ಮೈತ್ರಿ ನಡೆದಿದೆ ಎಂದು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಟೀಕಿಸಿದರು. ಎರಡು ಪಕ್ಷಗಳ ಮೌನ ಅವರ ನಡುವಿನ ರಹಸ್ಯ ಒಪ್ಪಂದಕ್ಕೆ ಪುಷ್ಠಿ ನೀಡುತ್ತಿದೆ ಎಂದು ಟೀಕಾಸಮರ ನಡೆಸಿದ್ದಾರೆ.

ರಂಗಾರೆಡ್ಡಿಯಲ್ಲಿ ಶನಿವಾರ ಸಾರ್ವಜನಿಕ ಸಭೆ ಉದ್ದೇಶಿಸಿ ಮಾತನಾಡಿದ ಖರ್ಗೆ, ಕಾಂಗ್ರೆಸ್ ಪಕ್ಷದ ಹಲವು ವರ್ಷಗಳ ಸಾಧನೆಗಳನ್ನು ವಿವರಿಸಿದರು. ಇದಾದ ನಂತರ, ಬಿಜೆಪಿ ಮತ್ತು ಬಿಆರ್​ಎಸ್ ಸ್ನೇಹಿತರಾಗಿದ್ದಾರೆ. ಅವರೊಳಗೆ ಕೆಲವು ಒಳಒಪ್ಪಂದಗಳಿದ್ದಾಗ ಪರಸ್ಪರರ ವಿರುದ್ಧ ಮಾತನಾಡಲು ಸಾಧ್ಯವಿಲ್ಲ ಎಂದು ಟಾಂಗ್​ ಕೊಟ್ಟರು.

ಬಿಜೆಪಿಯವರು ನಾವು (ಕಾಂಗ್ರೆಸ್​) ಕಳೆದ 53 ವರ್ಷಗಳಲ್ಲಿ ಏನೂ ಮಾಡಿಲ್ಲ ಎಂದು ಆಪಾದಿಸುತ್ತಾರೆ. ರಿಪೋರ್ಟ್​ ಕಾರ್ಡ್​ ತೋರಿಸುವಂತೆ ನಮಗೆ ಕೇಳುತ್ತಾರೆ. ಈ ಪ್ರಶ್ನೆಯನ್ನು ಮಧ್ಯಪ್ರದೇಶ ಮತ್ತು ಛತ್ತೀಸ್‌ಗಢದಲ್ಲಿಯೂ ಕೇಳಿದ್ದಾರೆ. ಆದರೆ ತೆಲಂಗಾಣದಲ್ಲಿ ಕೆಸಿಆರ್ ಮತ್ತು ಬಿಜೆಪಿ ದೋಸ್ತಿ ಮಾಡಿಕೊಂಡಿರುವುದರಿಂದ ಈ ಪ್ರಶ್ನೆ ಕೇಳುತ್ತಾರೋ ಇಲ್ಲವೋ ಗೊತ್ತಿಲ್ಲ. ಇದು ಅವರ ಆಂತರಿಕ ಸ್ನೇಹವಾಗಿರುವುದರಿಂದ ಅವರು ಗಟ್ಟಿಯಾಗಿ ಮಾತನಾಡಲು ಸಾಧ್ಯವಿಲ್ಲ ಎಂದು ಲೇವಡಿ ಮಾಡಿದರು.

ತೆಲಂಗಾಣ ಸಿಎಂ ಕೆಸಿಆರ್ ಅವರು ಇಂಡಿಯನ್ ನ್ಯಾಷನಲ್ ಡೆವಲಪ್‌ಮೆಂಟ್ ಇನ್‌ಕ್ಲೂಸಿವ್ ಅಲೈಯನ್ಸ್ ಬ್ಲಾಕ್‌ಗೆ (I.N.D.I.A) ಸೇರದಿರುವ ಬಗ್ಗೆ ಖರ್ಗೆ ಮತ್ತಷ್ಟು ಟೀಕಿಸಿ ಮಾತನಾಡಿದರು. ನಮ್ಮ ಭಾರತ ಮೈತ್ರಿಕೂಟದ 26 ಪಕ್ಷಗಳು ಕೇಂದ್ರದಲ್ಲಿರುವ ಪ್ರಧಾನಿ ಮೋದಿ ನೇತೃತ್ವದ ಸರ್ಕಾರವನ್ನು ಕಿತ್ತೆಸೆಯಲು ಸಿದ್ಧವಾಗಿದೆ. ಆದರೆ ಬಿಆರ್​ಎಸ್​ ಇದುವರೆಗೂ ಯಾವುದೇ ಸಭೆಗಳಿಗೆ ಹಾಜರಾಗಿಲ್ಲ. ಕೇಂದ್ರದಲ್ಲಿ ಬಿಜೆಪಿ ಸರ್ಕಾರವನ್ನು ತೆಗೆದುಹಾಕಲು ಎಂದಿಗೂ ಪ್ರಯತ್ನಿಸಲಿಲ್ಲ ಎಂದು ಖಾರವಾಗಿ ನುಡಿದರು.

ನಮ್ಮ ಗುರಿ ಬಿಜೆಪಿ ನಿರ್ಮೂಲನೆ -ಖರ್ಗೆ: ಬಿಆರ್​ಎಸ್​ ಪಕ್ಷದವರು ನಾವು ಜಾತ್ಯಾತೀತರು ಎಂದು ಹೇಳುತ್ತಾರೆ. ಆದರೆ ಇಲ್ಲಿ ಬಿಜೆಪಿಯೊಂದಿಗೆ ವಿಚಾರಗಳನ್ನು ಚರ್ಚಿಸುತ್ತಾರೆ. ಆದರೆ ನಾವು ಎಲ್ಲ ಬಿಜೆಪಿ ವಿರೋಧ ಪಕ್ಷಗಳನ್ನು ಒಗ್ಗೂಡಿಸುತ್ತಿದ್ದೇವೆ. ಈ ಕುರಿತು ಪಾಟ್ನಾದಲ್ಲಿ ಸಭೆಗಳನ್ನು ನಡೆಸಿದ್ದೇವೆ. ನನ್ನ ಮನೆಯಲ್ಲೂ ಕೂಡ ಅನೇಕ ಸಭೆಗಳು ನಡೆಯುತ್ತಿರುತ್ತವೆ. ನಮ್ಮ ಗುರಿ ಬಿಜೆಪಿಯನ್ನು ಕೇಂದ್ರದಿಂದ ತೊಲಗಿಸುವುದು ಮತ್ತು ಬಿಜೆಪಿ ಬೆಂಬಲಿತ ಕೆಸಿಆರ್‌ ಅವರಂಥ ಪಕ್ಷಗಳನ್ನು ಅಧಿಕಾರದಿಂದ ಕೆಳಗಿಳಿಸುವುದು ಎಂದರು.

ಮುಂದುವರೆದು ಮಾತನಾಡಿ, ಮಾಜಿ ಪ್ರಧಾನಿ ಜವಾಹರಲಾಲ್ ನೆಹರು ಮತ್ತು ಸರ್ದಾರ್ ಪಟೇಲ್ 1947ರ ನಂತರ ಛಿದ್ರಗೊಂಡ ಭಾರತವನ್ನು ಒಂದುಗೂಡಿಸಿದರು. ಈ ದೇಶಕ್ಕೆ ಸಂವಿಧಾನ, ಐಐಟಿ, ಐಐಎಂ, ಎಐಐಎಂಎಸ್, ಇಸ್ರೋ, ಡಿಆರ್‌ಡಿಒ, ಸೈಲ್, ಎಚ್‌ಎಎಲ್, ಬಿಇಎಲ್, ಒಎನ್‌ಜಿಸಿ ಕೊಟ್ಟವರು ಕಾಂಗ್ರೆಸ್​ನವರು. ನಮ್ಮ ಪಕ್ಷವು ಬಲಿಷ್ಠ ಮತ್ತು ಐಕ್ಯ ದೇಶವನ್ನು ನೀಡಿದೆ. ನಾವು ಹೈದರಾಬಾದ್, ಮುಂಬೈ, ದೆಹಲಿ, ಕೋಲ್ಕತ್ತಾ ಮತ್ತು ಕಾನ್ಪುರದಲ್ಲಿ ದೊಡ್ಡ ಕಾರ್ಖಾನೆಗಳನ್ನು ಸ್ಥಾಪಿಸಿದ್ದೇವೆ. ಆದರೆ ಬಿಜೆಪಿ ಸಾಧನೆ ಏನು?. ಆದರೆ ಇಂದು ಎಲ್ಲವನ್ನೂ ಮಾಡಿದ್ದಾಗಿ ಹೇಳುತ್ತಿದ್ದಾರೆ ಎಂದು ದೂರಿದರು.

ಈ ವರ್ಷಾಂತ್ಯದಲ್ಲಿ ತೆಲಂಗಾಣ ರಾಜ್ಯ ವಿಧಾನಸಭೆಗೆ ಚುನಾವಣೆ ನಡೆಯಲಿದೆ. ಕೆಸಿಆರ್ ನೇತೃತ್ವದ ಬಿಆರ್​ಎಸ್​ ಚುನಾವಣೆ ಘೋಷಣೆಗೂ ಮುನ್ನವೇ ಆಗಸ್ಟ್ 21ರಂದು ಎಲ್ಲ 115 ಕ್ಷೇತ್ರಗಳಿಗೂ ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ ಮಾಡಿ ಅಚ್ಚರಿ ಮೂಡಿಸಿದೆ. (ಎಎನ್ಐ)

ಇದನ್ನೂ ಓದಿ: 'ವಿಕ್ರಮ್ ಲ್ಯಾಂಡರ್ ಸ್ಪರ್ಶಿಸಿದ ಸ್ಥಳಕ್ಕೆ ಅಬ್ದುಲ್ ಕಲಾಂ ಹೆಸರು ಸೂಕ್ತ': 'ಶಿವಶಕ್ತಿ ಪಾಯಿಂಟ್​'ಗೆ ಎಸ್‌ಪಿ ಸಂಸದ ವಿರೋಧ