ಕೇರಳದಲ್ಲಿ ಸಂಪೂರ್ಣ ಇ-ಆಡಳಿತ ಜಾರಿ: ಸರ್ಕಾರ ಸೇವೆಗಳ ಡಿಜಿಟಲೀಕರಣ!

ಕೇರಳದಲ್ಲಿ ನಾಳೆಯಿಂದ ಇ- ಆಡಳಿತ ಜಾರಿಯಾಗಲಿದೆ. ಸರ್ಕಾರದ ಎಲ್ಲಾ ಸೇವೆಗಳನ್ನು ಇನ್ನು ಡಿಜಿಟಲೀಕರಣಗೊಳ್ಳಲಿವೆ. ಸಮಾಜದ ಕಟ್ಟಕಡೆಯ ವ್ಯಕ್ತಿಗೂ ಸೌಲಭ್ಯ ಸಿಗಬೇಕು ಎಂಬುದು ಯೋಜನೆ ಉದ್ದೇಶ.

ತಿರುವನಂತಪುರಂ (ಕೇರಳ): ಅತಿ ಹೆಚ್ಚು ಸಾಕ್ಷರರನ್ನು ಹೊಂದಿರುವ ರಾಜ್ಯ ಕೇರಳದಲ್ಲಿ ಇನ್ನು ಮುಂದೆ 'ಸಂಪೂರ್ಣ ಇ- ಆಡಳಿತ' ಜಾರಿಯಾಗಲಿದೆ. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಅವರು ಇ-ಆಡಳಿತದ ಘೋಷಣೆ ಮಾಡಲಿದ್ದಾರೆ. ಇದಾದ ಬಳಿಕ ಇ- ಆಡಳಿತ ಜಾರಿ ಮಾಡಿದ ದೇಶದ ಮೊದಲ ರಾಜ್ಯ ಕೇರಳವಾಗಲಿದೆ ಎಂದು ಸರ್ಕಾರ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದೆ.

800 ಕ್ಕೂ ಹೆಚ್ಚು ಸರ್ಕಾರಿ ಸೇವೆಗಳನ್ನು ಆನ್‌ಲೈನ್‌ನಲ್ಲಿ ನೀಡುವ ಇ-ಸೇವನಂ ಎಂಬ ಏಕಗವಾಕ್ಷಿ ಕಾರ್ಯವಿಧಾನವನ್ನು ಸರ್ಕಾರ ರೂಪಿಸಿದೆ. ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ವೇದಿಕೆಗಳನ್ನು ಬಳಸಿಕೊಂಡು ಸರ್ಕಾರದ ಎಲ್ಲ ಸೇವೆಗಳನ್ನು ಸಂಪೂರ್ಣವಾಗಿ ಡಿಜಿಟಲೀಕರಣಗೊಳಿಸಲಾಗುವುದು ಎಂದು ಸರ್ಕಾರ ಹೇಳಿದೆ.

ಸಂಪೂರ್ಣ ಸಾಕ್ಷರತಾ ರಾಜ್ಯ: ದೇಶದಲ್ಲಿಯೇ ಕೇರಳವು ಮೊದಲ ಸಂಪೂರ್ಣ ಸಾಕ್ಷರತಾ ರಾಜ್ಯವಾಗಿದೆ. ಹೀಗಾಗಿ ಅಲ್ಲಿನ ರಾಜ್ಯ ಸರ್ಕಾರ ಇದನ್ನು ಬಳಸಿಕೊಳ್ಳಲು ಆಡಳಿತ ಡಿಜಿಲೀಕರಣಕ್ಕೆ ಪ್ರಯತ್ನಿಸುತ್ತಿದೆ. ಕಳೆದೊಂದು ದಶಕದಿಂದ ಇ- ಆಡಳಿತ ಜಾರಿಗೆ ಪ್ರಯತ್ನಿಸುತ್ತಿರುವ ಸರ್ಕಾರದ ದೂರದೃಷ್ಟಿಯ ಕ್ರಮಗಳು ಇದೀಗ ಸಾಕಾರಗೊಂಡಿವೆ. ಮಹತ್ವಾಕಾಂಕ್ಷಿ ನಿರ್ಧಾರ ಜಾರಿ ಬಳಿಕ ಸಶಕ್ತ ಸಮಾಜ ನಿರ್ಮಾಣವಾಗಲಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಜನರಿಗೆ ಸರ್ಕಾರಿ ಸೇವೆಗಳ ವಿತರಣೆಯಲ್ಲಿ ಪಾರದರ್ಶಕತೆ ಮತ್ತು ಅವರೆಲ್ಲರ ಒಳಗೊಳ್ಳುವಿಕೆಯನ್ನು ಇದು ಹೊಂದಿದೆ. ಡಿಜಿಟಲೀಕರಣಗೊಳಿಸುವುದರ ಜೊತೆಗೆ, ಸಂಪೂರ್ಣ ಇ-ಆಡಳಿತವು ಸೌಲಭ್ಯ ವಂಚಿತರು, ಸಮಾಜದ ಕಟ್ಟಕಡೆಯ ವ್ಯಕ್ತಿ, ಎಲ್ಲ ವರ್ಗಗಳಿಗೂ ನೆರವು ಸಿಗುವುದನ್ನು ಇದು ಖಚಿತಪಡಿಸುತ್ತದೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ: ನಗದು ರಹಿತವಾಗಿ ವಿದ್ಯಾರ್ಥಿ ವೇತನ ಪಾವತಿಗೆ ರಾಜ್ಯ ಸರ್ಕಾರದ ಡಿಜಿಟಲ್ ಪ್ಲಾನ್

ಆರೋಗ್ಯ, ಶಿಕ್ಷಣ, ಭೂ ಕಂದಾಯ, ಆಸ್ತಿಗಳ ದಾಖಲಾತಿ, ಸಾರ್ವಜನಿಕ ವಿತರಣಾ ವ್ಯವಸ್ಥೆ ಮತ್ತು ಸಾಮಾಜಿಕ ಭದ್ರತಾ ಪಾವತಿಗಳು ಸೇರಿದಂತೆ ಎಲ್ಲ ಪ್ರಮುಖ ಸೇವೆಗಳನ್ನು ಈಗಾಗಲೇ ಡಿಜಿಟಲೀಕರಣಗೊಳಿಸಲಾಗಿದೆ. ಡಿಜಿಟಲೀಕರಣ ಕ್ರಮದ ಅನುಷ್ಠಾನವನ್ನು ನೋಡಲ್ ಏಜೆನ್ಸಿಯಾದ 'ಕೇರಳ ಐಟಿ ಮಿಷನ್' ಮಾಡಿದೆ.

ಏನಿದು ಇ-ಆಡಳಿತ?: ಸರ್ಕಾರಿ ಸೇವೆಗಳನ್ನು ಒದಗಿಸಲು ಸಂವಹನ ಮತ್ತು ಮಾಹಿತಿ ತಂತ್ರಜ್ಞಾನದ ಅಪ್ಲಿಕೇಶನ್, ಮಾಹಿತಿ ವಿನಿಮಯ, ವಹಿವಾಟುಗಳು, ಹಿಂದೆ ಅಸ್ತಿತ್ವದಲ್ಲಿರುವ ಸೇವೆಗಳು ಮತ್ತು ಮಾಹಿತಿ ಪೋರ್ಟಲ್‌ಗಳ ಏಕೀಕರಣವನ್ನು ಇ-ಆಡಳಿತ ಎಂದು ವ್ಯಾಖ್ಯಾನಿಸಲಾಗುತ್ತದೆ.

ಮಹತ್ವದ ಉದಾಹರಣೆಗಳು..: ಸರ್ಕಾರಿ ಕಾರ್ಯಕ್ಕೆ ಇ-ಆಡಳಿತದ ಯಶಸ್ವಿ ಅನುಷ್ಠಾನದ ಕೆಲವು ಪರಿಣಾಮಕಾರಿ ಉದಾಹರಣೆಗಳೆಂದರೆ: ಇ-ಮಿತ್ರ ಯೋಜನೆ (ರಾಜಸ್ಥಾನ), ಇ-ಸೇವಾ ಯೋಜನೆ (ಆಂಧ್ರ ಪ್ರದೇಶ), CET (ಸಾಮಾನ್ಯ ಪ್ರವೇಶ ಪರೀಕ್ಷೆ). ತಂತ್ರಜ್ಞಾನವು ಸಂವಹನವನ್ನು ವೇಗವಾಗಿ ಮಾಡುತ್ತದೆ. ಇಂಟರ್ನೆಟ್, ಸ್ಮಾರ್ಟ್‌ಫೋನ್‌ಗಳು ಪ್ರಪಂಚದಾದ್ಯಂತ ಹೆಚ್ಚಿನ ಪ್ರಮಾಣದ ಡೇಟಾದ ತ್ವರಿತ ಪ್ರಸರಣವನ್ನು ಸಕ್ರಿಯಗೊಳಿಸುತ್ತವೆ.

ಅಧಿಕೃತ ಉದ್ದೇಶಗಳಿಗಾಗಿ ಲೇಖನ ಸಾಮಗ್ರಿಗಳನ್ನು ಖರೀದಿಸುವ ವೆಚ್ಚಕ್ಕೆ ಸರ್ಕಾರ ಸಾಕಷ್ಟು ಹಣ ಖರ್ಚು ಮಾಡುತ್ತದೆ. ಪತ್ರಗಳು ಮತ್ತು ಲಿಖಿತ ದಾಖಲೆಗಳು ಬಹಳಷ್ಟು ಲೇಖನ ಸಾಮಗ್ರಿಗಳನ್ನು ಬಳಸುತ್ತದೆ. ಆದಾಗ್ಯೂ, ಅವುಗಳನ್ನು ಸ್ಮಾರ್ಟ್‌ಫೋನ್‌ಗಳು ಮತ್ತು ಇಂಟರ್ನೆಟ್‌ನೊಂದಿಗೆ ಬದಲಾಯಿಸುವುದರಿಂದ ಪ್ರತಿ ವರ್ಷ ವೆಚ್ಚದಲ್ಲಿ ಕೋಟಿಗಟ್ಟಲೆ ಹಣವನ್ನು ಉಳಿಸಬಹುದು.

ಇದನ್ನೂ ಓದಿ: 'ನಾನೇ ಕ್ಷೇತ್ರಕ್ಕೆ ಬರುತ್ತೇನೆ, ಬೆಂಗಳೂರಿಗೆ ಬರಬೇಡಿ': ಕನಕಪುರ ಕ್ಷೇತ್ರದ ಅಭಿಮಾನಿಗಳಿಗೆ ಡಿಕೆಶಿ ಮನವಿ