ಲಂಡನ್(ಬ್ರಿಟನ್): ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರು, ಕೊನೆಯ ವೈಸ್ರಾಯ್ ಲಾರ್ಡ್ ಮೌಂಟ್ಬ್ಯಾಟನ್ ಹಾಗೂ ಅವರ ಪತ್ನಿ ಎಡ್ವಿನಾ ಮೌಂಟ್ಬ್ಯಾಟನ್ ಅವರ ನಡುವಿನ ವೈಯಕ್ತಿಕ ಪತ್ರಗಳು ಮತ್ತು ಡೈರಿಗಳಲ್ಲಿನ ಕೆಲವು ಅಂಶಗಳನ್ನು ಬಹಿರಂಗಪಡಿಸುವ ಕೋರಿಕೆಯನ್ನು ಮಾಹಿತಿ ಹಕ್ಕುಗಳ ವಿಚಾರಣೆ ನಡೆಸುವ ಬ್ರಿಟನ್ನ ಪ್ರಥಮ ದರ್ಜೆ ನ್ಯಾಯಮಂಡಳಿ ತಿರಸ್ಕರಿಸಿದೆ.
ನ್ಯಾಯಾಧೀಶರಾದ ಸೋಫಿ ಬಕ್ಲೆ ಎಂಬುವವರು ಬ್ರಿಟನ್ನ ಪ್ರಥಮ ದರ್ಜೆ ನ್ಯಾಯಮಂಡಳಿಗೆ ಸಲ್ಲಿಸಲಾಗಿದ್ದ ಅರ್ಜಿ ವಿಚಾರಣೆಯ ಅಧ್ಯಕ್ಷತೆಯನ್ನು ವಹಿಸಿಕೊಂಡಿದ್ದರು. 1930ರ ದಶಕದ ಹಿಂದಿನ ಡೈರಿಗಳು ಮತ್ತು ಪತ್ರ ವ್ಯವಹಾರಗಳಲ್ಲಿನ ಕೆಲವು ಅಂಶಗಳನ್ನು ಬಹಿರಂಗಪಡಿಸಬೇಕೆಂದು ಖ್ಯಾತ ಬ್ರಿಟಿಷ್ ಇತಿಹಾಸಕಾರ ಆಂಡ್ರ್ಯೂ ಲೋನಿ ಅರ್ಜಿ ಸಲ್ಲಿಸಿದ್ದರು.
ಸೌತಾಂಪ್ಟನ್ ವಿಶ್ವವಿದ್ಯಾಲಯವು 2011ರಲ್ಲಿ 'ಬ್ರಾಡ್‌ಲ್ಯಾಂಡ್ಸ್ ಆರ್ಕೈವ್' ಹೆಸರಿನಲ್ಲಿ ಸುಮಾರು 27 ಕೋಟಿ ರೂಪಾಯಿಗಳಿಗೆ ಮೌಂಟ್ಬ್ಯಾಟನ್ ಕುಟುಂಬದಿಂದ ಪ್ರಮುಖ ದಾಖಲೆಗಳನ್ನು ಸಂಗ್ರಹಿಸಿತ್ತು. 19ನೇ ಮತ್ತು 20ನೇ ಶತಮಾನಗಳಲ್ಲಿ ಬ್ರಿಟಿಷ್ ರಾಜಕೀಯ ಇತಿಹಾಸ ಪ್ರಮುಖ ಮೂಲಗಳೆಂದು ಪರಿಗಣಿಸಲಾದ ಈ ಆರ್ಕೈವ್ನಲ್ಲಿರುವ ದಾಖಲೆಗಳನ್ನು ಬಹಿರಂಗಪಡಿಸಲು ಸೌತಾಂಪ್ಟನ್ ವಿಶ್ವವಿದ್ಯಾಲಯ ಉದ್ದೇಶಿಸಿತ್ತು. ಅದರಲ್ಲಿರುವ ವಿಷಯಗಳು ಪ್ರಮುಖವಾಗಿರುವ ಕಾರಣದಿಂದ ಅವುಗಳನ್ನು ಪರಿಶೀಲನೆಗೆ ಕ್ಯಾಬಿನೆಟ್ ಕಚೇರಿಗೆ ಕಳಿಸಿಕೊಡಲಾಗಿತ್ತು.
ಇನ್ನೂ ಖಾಸಗಿ ಒಡೆತನದಲ್ಲಿವೆ: ಇದೇ ವೇಳೆ ಬ್ರಿಟಿಷ್ ಇತಿಹಾಸಕಾರ ಆಂಡ್ರ್ಯೂ ಲೋನಿ ಅವರು ಆರ್ಕೈವ್ ಅನ್ನು ಬಹಿರಂಗಪಡಿಸಲು ಮಾಹಿತಿ ಆಯುಕ್ತರ ಕಚೇರಿಯನ್ನು ಸಂಪರ್ಕಿಸಿದ್ದಾರೆ. ಕಚೇರಿಯಿಂದ ಸಕಾರಾತ್ಮಕ ಪ್ರತಿಕ್ರಿಯೆ ಬಂದಿತ್ತು. ಬ್ರಾಡ್‌ಲ್ಯಾಂಡ್ಸ್ ಆರ್ಕೈವ್ ಅನ್ನು ಬಹಿರಂಗಪಡಿಸಲು ಸೌತಾಂಪ್ಟನ್ ವಿಶ್ವವಿದ್ಯಾಲಯಕ್ಕೆ 2019ರಲ್ಲಿ ಆದೇಶ ನೀಡಲಾಗಿತ್ತು. ಆರ್ಕೈವ್ಸ್‌ನಲ್ಲಿರುವ ಲೇಡಿ ಮೌಂಟ್ಬ್ಯಾಟನ್ ಮತ್ತು ನೆಹರೂ ನಡುವಿನ ಕೆಲವು ಪತ್ರಗಳು ಮತ್ತು ಡೈರಿಗಳು ಇನ್ನೂ ಖಾಸಗಿ ಒಡೆತನದಲ್ಲಿದೆ. ಆರ್ಕೈವ್ನಲ್ಲಿರುವ ಗೌಪ್ಯತೆಯಿದ್ದರೂ, ಅವುಗಳನ್ನು ಕೊಳ್ಳಲು ಮುಂದಾಗಿದ್ದು, ನಂತರ ನಿರ್ಧಾರದಿಂದ ಹಿಂದೆ ಸರಿಯಲಾಗಿದೆ ಎಂದು ವಿಶ್ವವಿದ್ಯಾಲಯ ಹೇಳಿಕೆ ನೀಡಿದೆ.
ಇದರಿಂದಾಗಿ ಆರ್ಕೈವ್ನಲ್ಲಿರುವ ವಿಚಾರಗಳನ್ನು ಬಹಿರಂಗಪಡಿಸುವ ಪ್ರಕ್ರಿಯೆ ನ್ಯಾಯಾಲಯದ ಮೆಟ್ಟಿಲೇರಿದೆ. ಇತಿಹಾಸಕಾರ ಲೋನಿ ಅವರು ನ್ಯಾಯಾಲಯದ ಮೆಟ್ಟಿಲೇರಿದ್ದು, ನಾಲ್ಕು ವರ್ಷಗಳಲ್ಲಿ ಕಾನೂನು ಹೋರಾಟಕ್ಕಾಗಿ 2.88 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದ್ದಾರೆ. ವಿಚಾರಣೆ ನಡೆದಿದ್ದು, ಸೌತಾಂಪ್ಟನ್ ವಿಶ್ವವಿದ್ಯಾಲಯವು ಈ ಪತ್ರಗಳ ಗೌಪ್ಯತೆ ಮೇಲೆ ಅಧಿಕಾರ ಹೊಂದಿಲ್ಲ. ಬ್ರಾಡ್ಲ್ಯಾಂಡ್ ಆರ್ಕೈವ್ ಮೂಲಕ ಪತ್ರಗಳು ಮತ್ತು ಡೈರಿಗಳನ್ನು ಭೌತಿಕವಾಗಿ ರಕ್ಷಣೆ ಮಾಡಲಾಗುತ್ತಿದೆ ಎಂದು ಬ್ರಿಟನ್ನ ಪ್ರಥಮ ದರ್ಜೆ ನ್ಯಾಯಮಂಡಳಿ ಅಭಿಪ್ರಾಯಪಟ್ಟಿದೆ.
ಭಾರತ, ಪಾಕಿಸ್ತಾನ, ಬ್ರಿಟನ್ ವಿಚಾರಗಳು ಅಡಕ: ಸೌತಾಂಪ್ಟನ್ ವಿಶ್ವವಿದ್ಯಾನಿಲಯವು ಲಾರ್ಡ್ ಮೌಂಟ್ಬ್ಯಾಟನ್ ಕುರಿತು 35,000 ಪೇಪರ್‌ಗಳನ್ನು ಇದುವರೆಗೆ ಬಿಡುಗಡೆ ಮಾಡಿದೆ. ಬ್ರಿಟನ್ನ ರಾಜಮನೆತನದ ಉಲ್ಲೇಖಗಳು ಹಾಗೂ ಭಾರತ ಮತ್ತು ಪಾಕಿಸ್ತಾನದೊಂದಿಗಿನ ಬ್ರಿಟನ್ ಸಂಬಂಧಗಳ ಬಗ್ಗೆ ಸೇರಿದಂತೆ ಸುಮಾರು 150 ಭಾಗಗಳನ್ನು ಅದು ರಹಸ್ಯವಾಗಿಟ್ಟಿದೆ. ಇವುಗಳನ್ನು ಬಹಿರಂಗಪಡಿಸಲು ನ್ಯಾಯಪೀಠ ನಿರಾಕರಿಸಿದೆ. ಎರಡು ಭಾಗಗಳನ್ನು ಹೊರತುಪಡಿಸಿ, ಉಳಿದ ಭಾಗಗಳನ್ನು ಬಹಿರಂಗಪಡಿಸಲು ನ್ಯಾಯಾಲಯ ಆದೇಶಿಸಿದೆ. ಈ ತೀರ್ಪನ್ನು ಸೌತಾಂಪ್ಟನ್ ವಿಶ್ವವಿದ್ಯಾಲಯ ಸ್ವಾಗತಿಸಿದೆ.
ಶೇ.99ರಷ್ಟು ಸಂಗತಿಗಳು ಬಹಿರಂಗ: ನ್ಯಾಯಾಧಿಕರಣದ ತೀರ್ಪಿಗೆ ಇತಿಹಾಸ ತಜ್ಞ ಆಂಡ್ರ್ಯೂ ಲೋನಿ ಪ್ರತಿಕ್ರಿಯಿಸಿದ್ದಾರೆ. ನಾನು ಅರ್ಜಿ ಸಲ್ಲಿಸಿದ ನಂತರ ಶೇಕಡಾ 99ರಷ್ಟು ಪ್ರಮುಖ ಐತಿಹಾಸಿಕ ಸಂಗತಿಗಳು ಬೆಳಕಿಗೆ ಬಂದಿವೆ. ಎಡ್ವಿನಾ ಅವರು ಅಲಿ ಜಿನ್ನಾ ಅವರ ಬಗ್ಗೆ ವಿಮರ್ಶಾತ್ಮಕ ಟೀಕೆಗಳನ್ನು ಮಾಡಿದ್ದಾರೆ. ಎಡ್ವಿನಾ ಅವರ ಡೈರಿಯಲ್ಲಿ ಜಿನ್ನಾ ಅವರನ್ನು ಮಾನಸಿಕ ರೋಗಿ ಎಂದು ಉಲ್ಲೇಖಿಸಲಾಗಿದೆ. ಇದರಿಂದ ನನಗೆ ಯಾವುದೇ ವೈಯಕ್ತಿಕ ಪ್ರಯೋಜನವಾಗುವುದಿಲ್ಲ ಎಂದು ನಾನು ಭಾವಿಸುತ್ತೇನೆ ಎಂದಿದ್ದಾರೆ. ಆಂಡ್ರ್ಯೂ ಲೋನಿ ಅವರ ಹೊಸ ಪುಸ್ತಕ 'ಟ್ರೇಟರ್ ಕಿಂಗ್: ದಿ ಸ್ಕ್ಯಾಂಡಲಸ್ ಎಕ್ಸೈಲ್ ಆಫ್ ದಿ ಡ್ಯೂಕ್ ಅಂಡ್ ಡಚೆಸ್ ಆಫ್ ವಿಂಡ್ಸರ್' ಮುಂದಿನ ತಿಂಗಳು ಬಿಡುಗಡೆಯಾಗಲಿದೆ.
ಇದನ್ನೂ ಓದಿ: ಹಿಂದೂ ಅನ್ನೋದು ಭೌಗೋಳಿಕ ಅಸ್ಮಿತೆ: ಕೇಂದ್ರ ಸಚಿವ ಅಶ್ವಿನಿ ಕುಮಾರ್ ಚೌಬೆ
