ಭುವನೇಶ್ವರ : ಒಡಿಶಾದ ಬಾಲಂಗೀರ್ ಜಿಲ್ಲೆಯ ಸುದ್ಪಾಡಾದಲ್ಲಿರುವ ಕಾಂಗ್ರೆಸ್ ಸಂಸದ ಧೀರಜ್ ಪ್ರಸಾದ್ ಸಾಹು ಅವರಿಗೆ ಸೇರಿದ ಡಿಸ್ಟಿಲರಿ ಘಟಕದಿಂದ ವಶಪಡಿಸಿಕೊಳ್ಳಲಾದ ಹಣದ ಎಣಿಕೆ ಐದನೇ ದಿನವೂ ಮುಂದುವರೆದಿದೆ ಎಂದು ಮೂಲಗಳು ಭಾನುವಾರ ತಿಳಿಸಿವೆ. ಅಗಾಧ ಪ್ರಮಾಣದ ಹಣ ಎಣಿಕೆಯಿಂದ ಕೆಟ್ಟು ಹೋಗುತ್ತಿರುವ ಎಣಿಕೆ ಯಂತ್ರಗಳನ್ನು ತಕ್ಷಣ ಸರಿಪಡಿಸಲು ಕೆಲ ಮೆಕ್ಯಾನಿಕ್ಗಳನ್ನು ಬ್ಯಾಂಕಿನಲ್ಲಿ ಇರಿಸಲಾಗಿದೆ ಎಂದು ವರದಿಯಾಗಿದೆ.
ಸಂಬಲ್ಪುರ ಮತ್ತು ತಿತಿಲಾಘರ್ ಶಾಖೆಗಳಲ್ಲಿ ನೋಟುಗಳ ಎಣಿಕೆ ಮುಗಿದಿದೆ ಎಂದು ಎಸ್ಬಿಐ ಅಧಿಕಾರಿಗಳು ಮಾಧ್ಯಮಗಳಿಗೆ ಮಾಹಿತಿ ನೀಡಿದರು. ತಿತಿಲಾಘರ್ನಿಂದ 11 ಕೋಟಿ ರೂ., ಸಂಬಲ್ಪುರದಲ್ಲಿ 37.50 ಕೋಟಿ ರೂ.ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. 176 ಚೀಲಗಳಲ್ಲಿ ಶಾಖೆಗೆ ತಂದ ಹಣವನ್ನು ಎಣಿಸಲು ಬಾಲಂಗೀರ್ನ ಎಸ್ಬಿಐ ಶಾಖೆಯಲ್ಲಿ ಸುಮಾರು 60 ಸಿಬ್ಬಂದಿ ಮತ್ತು ಹಲವಾರು ಯಂತ್ರಗಳನ್ನು ನಿಯೋಜಿಸಲಾಗಿದೆ. ಅಧಿಕಾರಿಗಳು ಶನಿವಾರ ರಾತ್ರಿಯವರೆಗೆ 102 ಚೀಲಗಳಲ್ಲಿ ಸಂಗ್ರಹಿಸಿದ ಸುಮಾರು 140 ಕೋಟಿ ರೂ. ಹಣ ಎಣಿಸಿದ್ದಾರೆ ಎಂದು ವರದಿಯಾಗಿದೆ.
ಏತನ್ಮಧ್ಯೆ, ಇನ್ನೂ 40 ಚೀಲಗಳಲ್ಲಿ ಇರಿಸಲಾದ ಹಣದ ಎಣಿಕೆ ಭಾನುವಾರ ಮಧ್ಯಾಹ್ನದವರೆಗೆ ಪೂರ್ಣಗೊಂಡಿದೆ ಎಂದು ದೃಢೀಕರಿಸದ ಮೂಲಗಳು ತಿಳಿಸಿವೆ. ಇದು ವಶಪಡಿಸಿಕೊಳ್ಳಲಾದ ಮೊತ್ತವನ್ನು ಸುಮಾರು 180 ಕೋಟಿ ರೂ.ಗೆ ಹೆಚ್ಚಿಸಿದೆ. ಭಾನುವಾರ ಸಂಜೆ ವೇಳೆಗೆ ಹಣದ ಎಣಿಕೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ. ಮತ್ತೊಂದೆಡೆ, ಹೈದರಾಬಾದ್ನಿಂದ ಆದಾಯ ತೆರಿಗೆ ಅಧಿಕಾರಿಗಳ ತಂಡವೊಂದು ತನಿಖೆಗೆ ಸಹಾಯ ಮಾಡಲು ಬಾಲಂಗೀರ್ ತಲುಪಿದೆ.
ಒಡಿಶಾ ಮೂಲದ ಡಿಸ್ಟಿಲರಿ ಸಂಸ್ಥೆ ಬೌಧ್ ಡಿಸ್ಟಿಲರಿ ಪ್ರೈವೇಟ್ ಲಿಮಿಟೆಡ್ ಮತ್ತು ಸಂಸ್ಥೆಗೆ ಸಂಬಂಧಿಸಿದ ಇತರ ಮದ್ಯ ಉದ್ಯಮಗಳಿಗೆ ಸಂಬಂಧಿಸಿದ ವಿವಿಧ ಸ್ಥಳಗಳಲ್ಲಿ ಆದಾಯ ತೆರಿಗೆ ಅಧಿಕಾರಿಗಳು ಬುಧವಾರ ಏಕಕಾಲದಲ್ಲಿ ದಾಳಿ ನಡೆಸಿದ್ದರು.
ಬಾಲಂಗೀರ್ ಜಿಲ್ಲೆಯ ಸುದ್ಪಾಡಾ ಡಿಸ್ಟಿಲರಿ ಘಟಕದಲ್ಲಿ ಎರಡು ಅಲ್ಮೇರಾಗಳಲ್ಲಿ ಸಂಗ್ರಹಿಸಿಟ್ಟಿದ್ದ ಭಾರಿ ಮೊತ್ತದ ಹಣ ಪತ್ತೆಯಾಗಿತ್ತು. ನಂತರ ಅಧಿಕಾರಿಗಳು ಈ ಹಣವನ್ನು 156 ಚೀಲಗಳಲ್ಲಿ ತುಂಬಿ ಹತ್ತಿರದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ (ಎಸ್ಬಿಐ) ಶಾಖೆಗೆ ಎಣಿಕೆಗಾಗಿ ತೆಗೆದುಕೊಂಡು ಹೋಗಿದ್ದಾರೆ. ಡಿಸ್ಟಿಲರಿ ಸಂಸ್ಥೆಯಿಂದ ವಶಪಡಿಸಿಕೊಳ್ಳಲಾದ ನಗದು 200 ಕೋಟಿ ರೂ.ಗಿಂತ ಹೆಚ್ಚು ಎಂದು ಮೂಲಗಳು ತಿಳಿಸಿವೆ. ನಂತರ, ಐಟಿ ಅಧಿಕಾರಿಗಳು ಶುಕ್ರವಾರ ಸುದ್ಪಾಡಾ ಡಿಸ್ಟಿಲರಿ ಘಟಕದ ವ್ಯವಸ್ಥಾಪಕ ಬಂಟಿ ಸಾಹು ಅವರ ಮನೆಯಲ್ಲಿ ಶೋಧ ನಡೆಸಿ ಮತ್ತಷ್ಟು ನಗದು ವಶಪಡಿಸಿಕೊಂಡಿದ್ದಾರೆ. (IANS)
ಇದನ್ನೂ ಓದಿ : ಒಡಿಶಾ ಐಟಿ ದಾಳಿ ಪ್ರಕರಣ: ಮತ್ತೆ 20 ಬ್ಯಾಗ್ ವಶಕ್ಕೆ, ಜಪ್ತಿ ಹಣ ₹ 290 ಕೋಟಿಗೆ ತಲುಪುವ ಸಾಧ್ಯತೆ
