ನವದೆಹಲಿ: ವಿಮಾ ಪಾಲಿಸಿಯಲ್ಲಿ ಬೋನಸ್ ನೀಡುವುದಾಗಿ ಹೇಳಿ ವಂಚಕರು, ವ್ಯಕ್ತಿಯೊಬ್ಬರಿಗೆ ಒಂದು ಕೋಟಿ ರೂಪಾಯಿಗೂ ಹೆಚ್ಚು ಹಣವನ್ನು ವಂಚಿಸಿದ್ದಾರೆ. ಸುಮಾರು ಒಂದೂವರೆ ವರ್ಷದಲ್ಲಿ ವ್ಯಕ್ತಿಗೆ ಇಷ್ಟು ಹಣವನ್ನು ವಂಚಿಸಿದ್ದಾರೆ. ಪ್ರತಿ ಬಾರಿ ವಿಮಾ ಪಾಲಿಸಿಯ ಬೋನಸ್ ಹೆಚ್ಚಿದೆ ಎಂದು ಹೇಳಿದಾಗೆಲ್ಲಾ ಹಣ ಜಮಾ ಮಾಡುತ್ತಲೇ ಇದ್ದರು.
ಆರೋಪಿಗಳು ಅವರ ಕೆಲಸವನ್ನು ತ್ವರಿತವಾಗಿ ಮಾಡುವ ಸಲುವಾಗಿ ಅವರಿಂದಲೇ ಮೂರು ಮೊಬೈಲ್ ಫೋನ್‌ಗಳನ್ನು ಉಡುಗೊರೆಯಾಗಿ ತೆಗೆದುಕೊಂಡಿದ್ದರು. ಕೊನೆಗೆ ವಂಚನೆಗೊಳಗಾದ ವ್ಯಕ್ತಿ ನೀಡಿದ ದೂರಿನ ಮೇರೆಗೆ ರೋಹಿಣಿ ಸೈಬರ್ ಸೆಲ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳಿಗಾಗಿ ಶೋಧ ಆರಂಭಿಸಿದ್ದಾರೆ. ಈ ರೀತಿಯ ವಂಚನೆಯನ್ನು ಸೋಷಿಯಲ್ ಎಂಜಿನಿಯರಿಂಗ್ ವಂಚನೆ ಎಂದು ಕರೆಯಲಾಗುತ್ತದೆ ಎಂದು ಸೈಬರ್ ತಜ್ಞ ಮೋಹಿತ್ ಯಾದವ್ ಹೇಳಿದ್ದಾರೆ.
ಮಾಹಿತಿ ಪ್ರಕಾರ, ಶೇರ್ ಸಿಂಗ್ ಅವರು ಕುಟುಂಬ ಸಮೇತ ಕಂಝಾವಾಲಾದ ಕರಾಲಾ ಗ್ರಾಮದಲ್ಲಿ ವಾಸವಾಗಿದ್ದಾರೆ. ಅಕ್ಟೋಬರ್ 2019 ರಲ್ಲಿ, ಸುಷ್ಮಾ ತಿವಾರಿ ಎಂಬ ಯುವತಿ ಅವರಿಗೆ ಕರೆ ಮಾಡಿ, ನಾನು ಐಜಿಎಂಎಸ್ ಮುಂಬೈನಿಂದ ಮಾತನಾಡುತ್ತಿದ್ದೇನೆ ಎಂದು ಹೇಳಿದ್ದಳು. ಬಳಿಕ Max Life Insurance ಪಾಲಿಸಿಯ ಮೇಲೆ ಬೋನಸ್ ಬಂದಿದೆ. ಇದಕ್ಕಾಗಿ ನೀವು 8,234 ರೂ. ಜೊತೆಗೆ ಆಧಾರ್ ಕಾರ್ಡ್, ರದ್ದಾದ ಚೆಕ್, ಪ್ಯಾನ್ ಕಾರ್ಡ್ ಮತ್ತು ಫೋಟೋವನ್ನು ನೀಡಬೇಕು ಎಂದು ತಿಳಿಸಿದ್ದಳು. ಅಕ್ಟೋಬರ್ 2019 ರಲ್ಲಿ, ಶೇರ್ ಸಿಂಗ್ ಹಣವನ್ನು ಬ್ಯಾಂಕ್ ಖಾತೆಗೆ ಜಮಾ ಮಾಡಿದ್ದರು. ಇದಾದ ನಂತರ ಮುಖೇಶ್ ಮೋಹನ್ ನೇಗಿ ಎಂಬ ವ್ಯಕ್ತಿ ಕರೆ ಮಾಡಿದ್ದ.
ಇದನ್ನೂ ಓದಿ: ಕಾಲ್ತುಳಿತಕ್ಕೆ ಮೂವರು ಸಾವು, ಹಲವರಿಗೆ ಗಂಭೀರ ಗಾಯ.. ಶಿವನ ಪೂಜೆ ವೇಳೆ ದುರಂತ
ವಿವಿಧ ಔಪಚಾರಿಕತೆಗಳ ಹೆಸರಿನಲ್ಲಿ, ಶೇರ್ ಸಿಂಗ್ ಅವರಿಂದ ಹಣವನ್ನು ಪಡೆಯಲು ವಂಚಕರು ಪ್ರಾರಂಭಿಸಿದ್ದಾರೆ. ಪ್ರತಿ ಬಾರಿ ಹಣ ಠೇವಣಿ ಇಟ್ಟರೂ ಬೋನಸ್ ಸಿಗುತ್ತಿರಲಿಲ್ಲ. ಆರೋಪಿಗಳು ಕೆಲಸ ಬೇಗ ಮಾಡಿಸುವುದಾಗಿ ಅವರಿಂದ ಮೂರು ಬೆಲೆಬಾಳುವ ಮೊಬೈಲ್ಗಳನ್ನೂ ಸಹ ಪಡೆದಿದ್ದರು. ಈ ರೀತಿಯಾಗಿ ಕಳೆದ ಒಂದೂವರೆ ವರ್ಷದಲ್ಲಿ ವಿವಿಧ ಬ್ಯಾಂಕ್ ಖಾತೆಗಳಿಗೆ ಒಂದು ಕೋಟಿ ರೂಪಾಯಿಗೂ ಹೆಚ್ಚು ಜಮೆ ಮಾಡಿಸಿಕೊಂಡಿದ್ದರು. ಇದಾದ ನಂತರವೂ ಬೋನಸ್ ಸಿಗದೇ ಇದ್ದಾಗ ಮೋಸ ಹೋಗಿರುವುದು ಶೇರ್ ಸಿಂಗ್ ಅವರಿಗೆ ಅರಿವಾಗಿದೆ. ಆಗ ಅವರು ಪೊಲೀಸರಿಗೆ ವಿಷಯ ತಿಳಿಸಿದ್ದಾರೆ. ಈ ಸಂಬಂಧ ರೋಹಿಣಿ ಸೈಬರ್ ಸೆಲ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಶುರುವಾಗಿದೆ.
ಪ್ರತಿದಿನ ನೂರಾರು ಜನರು ಫೋನ್, ಮೆಸ್ಸೇಜ್ಗಳನ್ನು ಕಳುಹಿಸಿ ಆಫರ್ಗಳಿಂದ ಸೆಳೆದು ವಂಚಿಸುವ ಪ್ರಕರಗಳು ಹೆಚ್ಚುತ್ತಲೇ ಇವೆ. ಆದ್ರೆ ಇಂತಹ ವಂಚಕರನ್ನು ನಂಬುವುದರಿಂದ ನೀವು ಮೋಸದ ಜಾಲಕ್ಕೆ ಸಿಲುಕಿದಂತಾಗುತ್ತದೆ ಎಂಬುದನ್ನು ಜನರು ಅರಿಯಬೇಕಿದೆ. ಉಚಿತವಾಗಿ ಯಾವುದೂ ಸಿಗೊಲ್ಲ. ಸಿಕ್ಕರೆ ಜೀವನಕ್ಕೆ ಅದೇ ದುಬಾರಿಯಾಗಿ ಪರಿಣಮಿಸಬಹುದು ಎಂಬ ಎಚ್ಚರಿಕೆ ಗಮನದಲ್ಲಿರಬೇಕು.
