ಪುಣೆ (ಮಹಾರಾಷ್ಟ್ರ): ಮಹಾರಾಷ್ಟ್ರದ ಪುಣೆಯಲ್ಲಿ ಆತಂಕದ ಮತ್ತು ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಮೊಬೈಲ್ನಲ್ಲಿ ಹಾರರ್ ವಿಡಿಯೋಗಳನ್ನು ನೋಡಿ ಅದರಿಂದಲೇ ಪ್ರಭಾವಿತನಾದ ಎಂಟು ವರ್ಷದ ಬಾಲಕನೋರ್ವ ಗೊಂಬೆಗೆ ನೇಣು ಬಿಗಿದು ನಂತರ ತಾನೂ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಪುಣೆಯ ಪಿಂಪ್ರಿ-ಚಿಂಚ್‌ವಾಡ್‌ ಪ್ರದೇಶದಲ್ಲಿ ಎರಡು ದಿನಗಳ ಹಿಂದೆ ಈ ಬೆಚ್ಚಿಬೀಳಿಸುವ ಘಟನೆ ನಡೆದಿದೆ.
ಮನೆಯಲ್ಲಿ ತಾಯಿ ತನ್ನ ಕೆಲಸದಲ್ಲಿ ತೊಡಗಿದ್ದಾಗ ಈ ಬಾಲಕ ಆಟವಾಡುವಾಗ ಮೊದಲು ತನ್ನ ಬಳಿಯಿದ್ದ ಗೊಂಬೆಗೆ ಬಟ್ಟೆಯಿಂದ ಕುತ್ತಿಗೆ ಬಿಗಿದಿದ್ದಾನೆ. ಇದರಿಂದ ಆ ಗೊಂಬೆ ಸತ್ತಿದೆ ಎಂದು ತಿಳಿದು, ನಂತರ ಅದೇ ಬಟ್ಟೆಯನ್ನು ತನ್ನ ಬಾಯಿಯಲ್ಲಿ ತುರುಕಿಕೊಂಡು ಹಾಗೂ ಮುಖಕ್ಕೆ ಸುತ್ತಿಕೊಂಡಿದ್ದಾನೆ. ಪರಿಣಾಮ ಅಲ್ಲಿಯೇ ಉಸಿರುಗಟ್ಟಿ ಬಾಲಕ ಮೃತಪಟ್ಟಿದ್ದಾನೆ ಎನ್ನಲಾಗ್ತಿದೆ.
ಈ ಘಟನೆಯಿಂದ ಪೊಲೀಸರೇ ಶಾಕ್ ಆಗಿದ್ದಾರೆ. ಮೊಬೈಲ್ನಲ್ಲಿ ಹಾರರ್ ವಿಡಿಯೋಗಳನ್ನು ಬಾಲಕ ನೋಡುತ್ತಿದ್ದ. ಅದರಿಂದಲೇ ಪ್ರಭಾವಿತನಾಗಿ ಆತ ಹೀಗೆ ಮಾಡಿದ್ದಾನೆ ಎಂದು ವಾಕಾಡ್ ಪೊಲೀಸ್ ಠಾಣೆಯ ಇನ್ಸ್‌ಪೆಕ್ಟರ್ ಸತ್ಯವಾನ್ ಮಾನೆ ತಿಳಿಸಿದ್ದಾರೆ. ಅಲ್ಲದೇ, ಮಕ್ಕಳ ಮೇಲೆ ಪೋಷಕರು ನಿಗಾ ಇಡುತ್ತಲೇ ಇರಬೇಕೆಂದೂ ಅವರು ಸಲಹೆ ನೀಡಿದ್ದಾರೆ.
ಇದನ್ನೂ ಓದಿ: 14ರ ಬಾಲೆ ಮೇಲೆ ಮಾಂತ್ರಿಕನಿಂದ ಅತ್ಯಾಚಾರ: ನೀಚ ಕೃತ್ಯಕ್ಕೆ ತಾಯಿಯಿಂದಲೇ ಸಹಕಾರ!?
