ಭಾರತ ಸ್ವಾತಂತ್ರ್ಯಗೊಂಡು ನಾಳೆಗೆ 75 ವರ್ಷಗಳನ್ನು ಪೂರೈಸುತ್ತಿದೆ. 1947 ರಲ್ಲಿ ಬ್ರಿಟೀಷರ ಗುಲಾಮಗಿರಿಯಿಂದ ಹೊರಬಂದ ದೇಶದ ಮುಂದೆ ಪ್ರತಿ ಕ್ಷೇತ್ರದಲ್ಲೂ ದೊಡ್ಡ ದೊಡ್ಡದಾದ ಸಾಲು ಸಾಲು ಸವಾಲುಗಳಿದ್ದವು. ಆದ್ರೆ ರಾಷ್ಟ್ರೀಯ ನಾಯಕರ ದೂರದೃಷ್ಟಿಯಿಂದಾಗಿ ಸಾಮಾಜಿಕ, ಆರ್ಥಿಕ, ತಂತ್ರಜ್ಞಾನ ಸೇರಿದಂತೆ ಎಲ್ಲ ರಂಗಗಳಲ್ಲಿಯೂ ಪ್ರಗತಿ ಸಾಧಿಸುವ ಜೊತೆಗೆ ಹೊಸ ಹೊಸ ಸಾಧನೆಗಳನ್ನೂ ಮಾಡುತ್ತಾ ಇಂದು ಜಗತ್ತಿನೆದುರು ಭಾರತ ತನ್ನ ಶಕ್ತಿ ಸಾಬೀತುಪಡಿಸಿದೆ.
1947ರ ನಂತರದ 75 ವರ್ಷಗಳಲ್ಲಿ ದೇಶವು ಹಲವು ಮಹತ್ವದ ಸಾಧನೆಗಳನ್ನು ಮಾಡಿತು. ಜಾಗತಿಕ ಮಟ್ಟದಲ್ಲಿ ದೊರೆತ ಮನ್ನಣೆಯೂ ಒಂದು ದೊಡ್ಡ ಸಾಧನೆಯೇ. ಹಲವು ಸವಾಲುಗಳನ್ನು ಎದುರಿಸಿ ಇಂದು ದೇಶವು ತಲೆ ಎತ್ತಿ ನಿಂತಿದೆ. ಕೋಟ್ಯಂತರ ಜನರನ್ನು ಬಡತನದಿಂದ ಮೇಲಕ್ಕೆ ತಂದಿದೆ, ಅಕ್ಷರಸ್ಥರನ್ನಾಗಿಸಿದೆ ಮತ್ತು ವಿವಿಧ ರಂಗಗಳಲ್ಲಿ ದಾಪುಗಾಲಿರಿಸಿದೆ. ಸೂಪರ್‌ ಪವರ್‌ ಆಗುವ ಆಕಾಂಕ್ಷೆಯನ್ನೂ ತನ್ನೊಳಗೆ ಹುದುಗಿಸಿಕೊಂಡಿದೆ.
1. ಆರ್ಥಿಕ ಕ್ಷೇತ್ರದಲ್ಲಾದ ಬದಲಾವಣೆಗಳೇನು?: ಬ್ರಿಟೀಷರು ಭಾರತಕ್ಕೆ ಬಂದ ನಂತರ ಕೊಹಿನೂರು ವಜ್ರ ಸೇರಿದಂತೆ ಒಟ್ಟು 45 ಟ್ರಿಲಿಯನ್ ಡಾಲರ್ ಅನ್ನು ದೇಶದಿಂದ ಲೂಟಿ ಹೊಡೆದರು. ಭಾರತ ಸ್ವಾತಂತ್ರಗೊಂಡಾಗ ದೇಶದ ತಲಾದಾಯ 230 ರೂಪಾಯಿ ಆಗಿತ್ತು. ಬಡತನ, ಹಸಿವು ತಾಂಡವವಾಡುತ್ತಿತ್ತು. ತ್ವರಿತ ಕೈಗಾರಿಕೀಕರಣದಿಂದಾಗಿ ಅದರಲ್ಲೂ 1960 ರಲ್ಲಿ ಹಸಿರು ಕ್ರಾಂತಿ, 1970 ರಲ್ಲಾದ ಶ್ವೇತ ಕ್ರಾಂತಿ ಮತ್ತು ನೀಲಿ ಕ್ರಾಂತಿಯ ಬಳಿಕ ಮಹತ್ವದ ಬದಲಾವಣೆಯ ಶಖೆ ಉದಯಿಸಿತು. 1991 ರಲ್ಲಿ ವಿದೇಶಿ ವ್ಯಾಪಾರ, ಬ್ಯಾಂಕ್ಗಳ ಖಾಸಗೀಕರಣದತ್ತ ಮುಖ ಮಾಡಲಾಯಿತು. 75 ವರ್ಷಗಳ ಬಳಿಕ ವಿಶ್ವದ ಪ್ರಮುಖ ಆರ್ಥಿಕ ರಾಷ್ಟ್ರವಾಗಿ ಹೊರ ಹೊಮ್ಮಿ, ಅಭಿವೃದ್ಧಿ ಹೊಂದುತ್ತಿದೆ. 1947 ರಲ್ಲಿ 2.89 ಡಾಲರ್ ಆಗಿದ್ದ ತಲಾ ಆದಾಯ 75 ವರ್ಷಗಳ ಬಳಿಕ 1,980 ಡಾಲರ್ ತಲುಪಿದೆ. ಅಂದು ವಿದೇಶದಿಂದ ಹೆಚ್ಚಿನ ವಸ್ತುಗಳನ್ನು ಆಮದು ಮಾಡಿಕೊಳ್ಳಲಾಗುತ್ತಿತ್ತು. ಆದ್ರೆ ಇಂದು ಭಾರತದ ಕಂಪನಿಗಳು ಜಾಗತಿಕ ಮಾರುಕಟ್ಟೆಯಲ್ಲಿ ಸದ್ದು ಮಾಡುತ್ತಿವೆ.
2. ಭೌಗೋಳಿಕ ಬದಲಾವಣೆ: 1978 ರಲ್ಲಿ ಕಾಶ್ಮೀರಕ್ಕೆ ಪಾಕಿಸ್ತಾನ ಉಗ್ರರ ಒಳನುಸುಳುವಿಕೆ ಪ್ರಾರಂಭವಾಯಿತು. 1962 ರಲ್ಲಿ ಇಂಡೋ-ಚೀನಾ ಯುದ್ದ, 1999 ರಲ್ಲಿ ಕಾರ್ಗಿಲ್ ಯುದ್ಧ, ಪ್ರಸ್ತುತ ಲಡಾಖ್ ಗಡಿ ವಿವಾದ ನಡೆಯುತ್ತಿದ್ದರೂ ಸಹ ಪ್ರತಿ ಬಾರಿಯೂ ಭಾರತ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಸಮರ್ಥವಾಗಿದೆ ಎಂದು ಇಡೀ ಜಗತ್ತಿಗೆ ತೋರಿಸಿಕೊಟ್ಟಿದೆ.
3. ಸಾಮಾಜಿಕ ಪ್ರಗತಿ: ಬ್ರಿಟನ್ ಪ್ರಧಾನಿ ವಿನ್ಸ್ಟನ್ ಚರ್ಚಿಲ್ ಅಂದು ಸ್ವಯಂ ಆಡಳಿತದ ಭಾರತೀಯ ಪ್ರಯೋಗವನ್ನು ತಳ್ಳಿಹಾಕಿದರು. ಯಾಕಂದ್ರೆ ದೇಶ 22 ಭಾಷೆಗಳು, 2000ಕ್ಕೂ ಹೆಚ್ಚು ಉಪಭಾಷೆಗಳನ್ನು ಹೊಂದಿತ್ತು. ಭಾರತವೆಂದರೆ ಒಂದು ಭೂ ಪ್ರದೇಶ ಮಾತ್ರ. ಅದೊಂದು ದೇಶ ಅಲ್ಲವೇ ಅಲ್ಲ. ಸಾಬೀತು ಮಾಡಬೇಕಾದುದು ಇನ್ನೂ ಬಹಳಷ್ಟಿದೆ ಎಂದಿದ್ದರು. ಆದ್ರೆ 75 ವರ್ಷಗಳ ಬಳಿಕ ಭಾರತದ ಸಾಧನೆ ನೋಡುವುದಾರೆ, ವಿನ್ಸ್ಟನ್ ಚರ್ಚಿಲ್ ಮಾತನ್ನು ತಳ್ಳಿ ಹಾಕಿ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಾಮಾಜಿಕ ಪ್ರಗತಿ ಸಾಧಿಸಿದೆ.
4. ಆರೋಗ್ಯ ಕ್ಷೇತ್ರದಲ್ಲಿ ಅಗಾಧ ಬದಲಾವಣೆ: ದೇಶ ಸ್ವಾತಂತ್ರ್ಯಗೊಂಡಾಗ ಅನೇಕ ಬಗೆಯ ರೋಗಗಳು ಉಲ್ಬಣಗೊಂಡಿದ್ದವು. ಅಂದು ಭಾರತೀಯ ವ್ಯಕ್ತಿಯ ಸರಾಸರಿ ಜೀವಿತಾವಧಿ ಕೇವಲ 32 ವರ್ಷವಾಗಿತ್ತು. ಮಲೇರಿಯಾ, ಟ್ಯೂಬರ್ ಕ್ಯುಲೋಸಿಸ್ ತಾಂಡವವಾಡುತ್ತಿತ್ತು. 1947 ರಲ್ಲಿ ದೇಶದಲ್ಲಿ 75 ಮಿಲಿಯನ್ ಮಲೇರಿಯಾ ಪ್ರಕರಣಗಳು ವರದಿಯಾಗಿದ್ದವು. ಆದ್ರೆ 1964 ರಲ್ಲಿ ಪ್ರಕರಣಗಳು ಇಳಿಕೆಯಾಯಿತು. ಇನ್ನೊಂದು ಮಹತ್ವದ ಬೆಳವಣಿಗೆಯೆಂದರೆ 2014 ರಲ್ಲಿ ಪೋಲಿಯೋ ಲಸಿಕೆ ಉಚಿತ ಎಂದು ಘೋಷಿಸಲಾಯಿತು. 1947 ರಲ್ಲಿ ಒಂದು ಲಕ್ಷ ಮಕ್ಕಳಿಗೆ ಜನ್ಮ ನೀಡಿದ್ರೆ ಅದರಲ್ಲಿ 2000 ಮಂದಿ ತಾಯಂದಿರು ಮರಣ ಹೊಂದುತ್ತಿದ್ದರು. ಆದ್ರೆ 75 ವರ್ಷದ ಬಳಿಕ ಕೇವಲ 130 ಮಂದಿ ಸಾವನ್ನಪ್ಪುತ್ತಿದ್ದಾರೆ. ಅಷ್ಟೇ ಅಲ್ಲದೇ, ಇಂದು ಭಾರತದ ಜನರ ಜೀವಿ ಜೀವಿತಾವಧಿ 70.19 ವರ್ಷಗಳು!. ಭಾರತ ಬೇರೆ ಬೇರೆ ದೇಶಗಳಿಗೂ ಔಷಧಿ ಸೇರಿದಂತೆ ವೈದ್ಯಕೀಯ ಉಪಕರಣಗಳನ್ನು ರಪ್ತು ಮಾಡುತ್ತಿದೆ.
5. ತಂತ್ರಜ್ಞಾನ ಕ್ಷೇತ್ರದಲ್ಲೂ ಭಾರತದ ಹಿರಿಮೆ: ಇವತ್ತು ನಾವು ISRO ಮತ್ತು ಚಂದ್ರಯಾನದ ಬಗ್ಗೆ ಹೆಮ್ಮೆಪಡುತ್ತಿದ್ದೇವೆ. ಬಾಹ್ಯಾಕಾಶ ವಿಜ್ಞಾನ ಅಧ್ಯಯನ ಮತ್ತು ತಂತ್ರಜ್ಞಾನ ಅಭಿವೃದ್ಧಿಗಾಗಿ ಇಸ್ರೋ ಹುಟ್ಟಿಕೊಂಡಿದ್ದು 1969ರಲ್ಲಿ. 1963 ರಲ್ಲಿ ಭಾರತದ ಮೊದಲ ರಾಕೆಟ್ ಉಡಾವಣೆ ಮಾಡಲಾಯಿತು. 1983 ಬಾಹ್ಯಾಕಾಶದ ಮಹಾತ್ವಾಕಾಂಕ್ಷಿ ಯೋಜನೆ ಇಂಡಿಯನ್ ನ್ಯಾಷನಲ್ ಸ್ಯಾಟಲೈಟ್ ಸಿಸ್ಟಮ್‌ಗೆ ಚಾಲನೆ ನೀಡಲಾಯಿತು. ಅಷ್ಟೇ ಅಲ್ಲದೇ ಭಾರತೀಯ ರೈಲ್ವೆಯೂ ಸಹ ಕಂಪ್ಯೂಟರೀಕರಣಗೊಂಡಿದೆ. ಕಲೆ, ಸಾಹಿತ್ಯ, ಸಂಗೀತ, ಪ್ರಜಾಪ್ರಭುತ್ವ, ಶಿಕ್ಷಣ, ಉದ್ಯೋಗ, ಮನರಂಜನೆ ಕ್ಷೇತ್ರದಲ್ಲಿ ಅದ್ವಿತೀಯ ಸಾಧನೆ ಮಾಡಿದೆ.
ಇದನ್ನೂ ಓದಿ: ಮಲ್ಪೆ ಕಡಲ ಕಿನಾರೆಯಲ್ಲಿ ಗಮನ ಸೆಳೆದ ಹರ್ ಘರ್ ತಿರಂಗಾ
