ನವದೆಹಲಿ : ಕಾಂಗ್ರೆಸ್ಸಿನ ಹೊಸ ಸೋಷಿಯಲ್ ಮೀಡಿಯಾ ಚಾನೆಲ್ 'ಐಎನ್‌ಸಿ ಟಿವಿ' ಪಂಚಾಯತ್ ರಾಜ್ ದಿನಾಚರಣೆಯಂದು "ಸಾಮಾನ್ಯ ಜನರಿಗೆ ಧ್ವನಿ ನೀಡುವ" ಉದ್ದೇಶದಿಂದ ಜಾರಿಗೆ ತಂದಿದೆ.
ದೇಶದ ಮುಖ್ಯವಾಹಿನಿಯ ಮಾಧ್ಯಮಗಳು ಸರ್ಕಾರದ ವೈಫಲ್ಯಗಳನ್ನು ಎತ್ತಿ ತೋರಿಸುವುದಕ್ಕಿಂತ ಹೆಚ್ಚಾಗಿ ಮರೆಮಾಡಲು ಪ್ರಯತ್ನಿಸುತ್ತಿವೆ ಎಂದು ಕಾಂಗ್ರೆಸ್ ಪಕ್ಷ ಆರೋಪಿಸಿದೆ.
ಈಗ ಮಾಧ್ಯಮಗಳ ಒಂದು ಭಾಗವು ಸರ್ಕಾರದ ವೈಫಲ್ಯಗಳನ್ನು ಸಂಪೂರ್ಣವಾಗಿ ರಕ್ಷಿಸುತ್ತಿದೆ ಎಂಬುದಕ್ಕೆ ನಾವು ಸಾಕ್ಷಿಯಾಗಿದ್ದೇವೆ.
ಸರ್ಕಾರವನ್ನು ಪ್ರಶ್ನಿಸುವ ಬದಲು, ಇದು ಸರ್ಕಾರದ ವಕ್ತಾರರ ಗುಂಪಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಕೆ.ಸಿ.ವೇಣುಗೋಪಾಲ್ ಹೇಳಿದರು.
ಕೊರೊನಾ ಸಮಯದಲ್ಲಿ, ಮಾಧ್ಯಮಗಳ ಒಂದು ಭಾಗವು ಸರ್ಕಾರವನ್ನು ಪ್ರಶ್ನಿಸುವ ತನ್ನ ಪ್ರಧಾನ ಕರ್ತವ್ಯವನ್ನು ಮರೆತಿರುವುದನ್ನ ಕಾಣುತ್ತಿದ್ದೇವೆ. ಕೋವಿಡ್ ಪರಿಸ್ಥಿತಿ ನಿಭಾಯಿಸುವಲ್ಲಿ ಕೇಂದ್ರ ಸರ್ಕಾರದ ಅಸಮರ್ಥತೆ ಎಲ್ಲೆಡೆ ಸ್ಪಷ್ಟವಾಗಿದೆ.
ಸರ್ಕಾರ ಅಮೂಲ್ಯ ಸಮಯವನ್ನು ವ್ಯರ್ಥ ಮಾಡಿದೆ. ಹೀಗಾಗಿ, ಈಗ ಆಮ್ಲಜನಕ ಮತ್ತು ಔಷಧಿಗಳ ಕೊರತೆಯಿಂದ ಜನರು ಸಾಯುತ್ತಿದ್ದಾರೆ.
ದೆಹಲಿಯಲ್ಲಿ ಪರಿಸ್ಥಿತಿ ಹೆಚ್ಚು ಆತಂಕಕಾರಿಯಾಗಿದೆ. ಆರೋಗ್ಯ ಮೂಲಸೌಕರ್ಯಗಳನ್ನು ಬಲಪಡಿಸಲು ಸರ್ಕಾರ ಕಾಳಜಿ ವಹಿಸಲಿಲ್ಲ.
ವ್ಯಾಕ್ಸಿನೇಷನ್ ನೀತಿಯಲ್ಲಿಯೂ ತಾರತಮ್ಯ ನಿಲುವನ್ನು ಪ್ರದರ್ಶಿಸಿದೆ. ಜನರಿಗೆ ಉಚಿತವಾಗಿ ಲಸಿಕೆಗಳನ್ನು ನೀಡಲಿಲ್ಲ. ಆದರೆ, ಮಾಧ್ಯಮಗಳ ಒಂದು ಭಾಗವು ಕೇಂದ್ರದ ಅಸಮರ್ಥತೆಯನ್ನು ಸರಿದೂಗಿಸಲು ಪ್ರಯತ್ನಿಸುತ್ತಿದೆ ಎಂದು ಅಸಮಾಧಾನ ಹೊರ ಹಾಕಿದ್ದಾರೆ.
ಸಾರ್ವಜನಿಕ ಅಭಿಪ್ರಾಯವನ್ನು ರಚಿಸುವಲ್ಲಿ ಮಾಧ್ಯಮವು ಪರಿಣಾಮಕಾರಿ ಪಾತ್ರವನ್ನು ವಹಿಸುತ್ತದೆ. ನಮ್ಮ ಐಎನ್‌ಸಿ ಟಿವಿ ಅದಕ್ಕೆ ಒಂದು ಉತ್ತಮ ವೇದಿಕೆಯಾಗಲು ಉದ್ದೇಶಿಸಿದೆ. ಅಲ್ಲಿ ನಾವು ಪ್ರಾಮಾಣಿಕತೆಯೊಂದಿಗೆ ಸಾಮಾನ್ಯರ ಧ್ವನಿಯಾಗಬಹುದು ಎಂದು ಅವರು ಹೇಳಿದ್ರು.
