ಚೆನ್ನೈ(ತಮಿಳುನಾಡು): ಮಹಿಳೆಯೋರ್ವಳು ತಾನು ತಮಿಳುನಾಡಿನ ಮಾಜಿ ಸಿಎಂ, ಅಲ್ಲಿನ ಜನತೆಯ ಪಾಲಿನ 'ಅಮ್ಮ', ದಿವಂಗತ ಜಯಲಲಿತಾ ಪುತ್ರಿಯೆಂದು ಹೇಳಿಕೊಂಡಿದ್ದು ಸಾಕಷ್ಟು ಚರ್ಚೆಗಳಿಗೆ ಮತ್ತು ವಿವಾದಗಳಿಗೆ ಕಾರಣವಾಗಿದೆ.
ಚೆನ್ನೈ ಪಲ್ಲವರಂ ನಿವಾಸಿಯಾದ ಪ್ರೇಮಾ ಎಂಬಾಕೆ ತಾನು ಜಯಲಲಿತಾ ಪುತ್ರಿಯೆಂದು ಹೇಳಿಕೊಂಡಿದ್ದಾಳೆ. ಚೆನ್ನೈನ ಮೆರೀನಾ ಬೀಚ್ ಬಳಿಯಿರುವ ಜಯಲಲಿತಾ ಸ್ಮಾರಕ ಸ್ಥಳಕ್ಕೆ ಭೇಟಿ ನೀಡಿ ಪೂಜೆ ಸಲ್ಲಿಸಿದ್ದು, ನಂತರ ಮಾಧ್ಯಮಗಳಿಗೆ ತಾನು ಜಯಲಲಿತಾ ಪುತ್ರಿ ಎಂದು ಹೇಳಿಕೊಂಡಿದ್ದಾಳೆ.
ನಾನು ಹುಟ್ಟಿದ್ದು ಮೈಸೂರಿನಲ್ಲಿ. ಸುಮಾರು 30 ವರ್ಷಗಳಿಂದ ಚೆನ್ನೈನಲ್ಲಿ ವಾಸವಿದ್ದೇನೆ. ಸಮಯ ಬಂದಾಗ ನಾನು ಜಯಲಲಿತಾ ಪುತ್ರಿಯೆಂದು ಸಾಕ್ಷಿ ಸಮೇತ ಸಾಬೀತುಪಡಿಸುತ್ತೇನೆ ಎಂದು ಈ ವೇಳೆ ಪ್ರೇಮಾ ಹೇಳಿದ್ದಾರೆ.
ನಾಲ್ಕೈದು ದಿನದಲ್ಲಿ ನಾನು ಶಶಿಕಲಾ ಅವರನ್ನೂ ಭೇಟಿಯಾಗುತ್ತೇನೆ. ನನ್ನನ್ನು ಬೆಳೆಸಿದವರು ತೀರಿ ಹೋಗಿದ್ದಾರೆ. ಜಯಲಲಿತಾ ನನ್ನನ್ನು ಬೇಬಿ ಎಂದು ಕರೆಯುತ್ತಿದ್ದರು. ಅಮ್ಮ ಅಪೋಲೋ ಆಸ್ಪತ್ರೆಗೆ ದಾಖಲಾಗಿದ್ದಾಗ ಹಿಂದಿನ ಬಾಗಿಲಿನ ಮೂಲಕ ಅವರನ್ನು ಭೇಟಿಯಾಗಿದ್ದೆನು ಎಂದಿದ್ದಾರೆ.
ಜಯಲಲಿತಾ ಅವರ ಸಹಾಯಕ ಮುತ್ತುಸ್ವಾಮಿ ನನ್ನನ್ನು ಒಮ್ಮೆ ಕರೆದಿದ್ದರು. ಅವರನ್ನು ಒಮ್ಮೆ ಭೇಟಿಯಾಗಿದ್ದಾಗ ಜಯಲಲಿತಾ ನನಗೆ ಮುತ್ತು ಕೊಟ್ಟಿದ್ದರು. ಅವರನ್ನು ಪೊಯೇಸ್ ಗಾರ್ಡನ್ನಲ್ಲಿ ಭೇಟಿಯಾಗಿದ್ದೆನು ಎಂದು ಪ್ರೇಮಾ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ಮಹಾರಾಷ್ಟ್ರ ಮಾಜಿ ಗೃಹ ಸಚಿವ ದೇಶ್‌ಮುಖ್‌ಗೆ 14 ದಿನ ನ್ಯಾಯಾಂಗ ಬಂಧನ
