ಜೋಧ್‌ಪುರ(ರಾಜಸ್ಥಾನ): ಪಾಕಿಸ್ತಾನದ 90 ಸಾವಿರ ಸೈನಿಕರನ್ನು ಸದೆಬಡಿದು ವಿಜಯ ಕಹಳೆ ಮೊಳಗಿಸಿದ 'ವಿಜಯ್ ದಿವಸ್'ಗೆ 50 ವಸಂತಗಳು ಕಳೆದಿವೆ. 1971 ಡಿಸೆಂಬರ್ 16 ರಂದು ಪಾಕಿಸ್ತಾನ ಸೇನೆಯ ವಿರುದ್ಧ ಸಿಕ್ಕ ವಿಜಯದ ಸಂಭ್ರಮಾಚರಣೆ ಕಳೆದ ವಾರವಷ್ಟೇ ನಡೆಸಲಾಗಿತ್ತು. ಈ ಮಧ್ಯೆಯೇ ರಣಭೂಮಿಯಲ್ಲಿ ಹೋರಾಡಿ ಜಯ ತಂದಿದ್ದ ವೀರಯೋಧ ಭೈರೋನ್ ಸಿಂಗ್ ರಾಥೋಡ್(81) ಅವರು ಅನಾರೋಗ್ಯದಿಂದ ಸೋಮವಾರ ಹುತಾತ್ಮರಾಗಿದ್ದಾರೆ.
1971 ರ ಯುದ್ಧದಲ್ಲಿ ಧೀರೋದಾತ್ತವಾಗಿ ಹೋರಾಡಿದ ರಾಥೋಡ್ ಅವರು ಕೆಲ ದಿನಗಳಿಂದ ಅನಾರೋಗ್ಯಕ್ಕೆ ಒಳಗಾಗಿದ್ದರು. ವಿಜಯ್ ದಿವಸ್ 50 ರ ಸಂಭ್ರಮದ ಎರಡು ದಿನದ ಮೊದಲು ಅವರನ್ನು ಏಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಸೋಮವಾರ ತೀವ್ರ ಅನಾರೋಗ್ಯದಿಂದ ವೀರಯೋಧ ಕೊನೆಯುಸಿರೆಳೆದಿದ್ದಾರೆ.
ಬಾರ್ಡರ್ನಲ್ಲಿ ಎದೆಯೊಡ್ಡಿದ್ದ ಜವಾನ್: ಪಶ್ಚಿಮ ಪಾಕಿಸ್ತಾನದಿಂದ(ಈಗಿನ ಪಾಕಿಸ್ತಾನ) ಪೂರ್ವ ಪಾಕಿಸ್ತಾನವನ್ನು (ಈಗಿನ ಬಾಂಗ್ಲಾದೇಶ) ವಿಮುಕ್ತಿಗೊಳಿಸಲು ಪಾಕ್ ಮೇಲೆ ಯುದ್ಧ ಸಾರಿತು. 1971 ರಲ್ಲಿ ನಡೆದ ರಣದಲ್ಲಿ ಭಾರತ ವಿಜಯದುಂದುಬಿ ಮೊಳಗಿಸಿತು. ರಾಜಸ್ಥಾನದ ಲಾಂಗೆವಾಲಾ ಪೋಸ್ಟ್ನಲ್ಲಿ ಭೈರೋನ್ ಸಿಂಗ್ ರಾಥೋಡ್ ಅವರು ತೋರಿದ ಶೌರ್ಯ ಅಜರಾಮರ. ಅವರ ಸಾಹಸದಿಂದ ಪಾಕ್ ಪಡೆಗಳು ಮಂಡಿಯೂರಿದವು.
ಭೈರೋನ್ ಸಿಂಗ್ರ ಧೈರ್ಯ, ಸಾಹಸಗಳನ್ನು ಬಾಲಿವುಡ್ ನಟ ಸುನೀಲ್ ಶೆಟ್ಟಿ ಅವರ ಬಾರ್ಡರ್ ಸಿನಿಮಾದಲ್ಲಿ ಕಾಣಬಹುದಾಗಿದೆ. 1987ರಲ್ಲಿ ಗಡಿ ಭದ್ರತಾ ಪಡೆಯಿಂದ(ಬಿಎಸ್ಎಫ್) ಇವರು ನಿವೃತ್ತರಾಗಿದ್ದರು. ರಾಥೋಡ್ರ ಸೇವಾ ಸಾಹಸಕ್ಕೆ 1972 ರಲ್ಲಿ ಸೇನಾ ಪದಕ ನೀಡಿ ಗೌರವಿಸಲಾಗಿದೆ.
ಮಾತನಾಡಲು ಬಯಸಿದ್ದ ಪ್ರಧಾನಿ ಮೋದಿ: ವಿಜಯ್ ದಿವಸ್ 50 ರ ಸಂಭ್ರಮದಂದು ಪ್ರಧಾನಿ ನರೇಂದ್ರ ಮೋದಿ ಅವರು ವೀರಯೋಧ ಭೈರೋನ್ ಸಿಂಗ್ ಅವರ ಜೊತೆ ಮಾತನಾಡಲು ಬಯಸಿದ್ದರು. ಆದರೆ, ಅನಾರೋಗ್ಯಕ್ಕೀಡಾಗಿ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಕಾರಣ ಅದು ಸಾಧ್ಯವಾಗಲಿಲ್ಲ. ಸಿಂಗ್ರ ಶೌರ್ಯ, ಸಾಹಸಗಳನ್ನು ಶ್ಲಾಘಿಸಿದ ಪ್ರಧಾನಿ, ಬೇಗನೇ ಚೇತರಿಸಿಕೊಳ್ಳಲಿ ಎಂದು ಹಾರೈಸಿದ್ದರು. ಇದಾದ ನಾಲ್ಕು ದಿನಗಳ ಬಳಿಕ ಅವರು ಬ್ರೇನ್ಸ್ಟ್ರೋಕ್ನಿಂದಾಗಿ ವೀರ ಯೋಧ ಇಹಲೋಕ ತ್ಯಜಿಸಿದ್ದಾರೆ. ಧೀರ ಯೋಧನ ಅಗಲಿಕೆಗೆ ಬಿಎಸ್ಎಫ್ ಸಂತಾಪ ಸೂಚಿಸಿದೆ.
ಓದಿ: ಬೇರ್ಪಟ್ಟ ಹಳಿಗಳು.. ಗ್ರಾಮಸ್ಥರ ಸಮಯಪ್ರಜ್ಞೆಯಿಂದ ತಪ್ಪಿದ ರೈಲು ದುರಂತ
