ನವದೆಹಲಿ: ಸುಪ್ರೀಂಕೋರ್ಟ್ಗೆ ತನ್ನ ಅಂತ್ಯವಿಲ್ಲದ ಮೇಲ್ಮನವಿಗಳೊಂದಿಗೆ 'ಓವರ್‌ಲೋಡ್' ಮಾಡುವುದನ್ನು ಸರ್ಕಾರ ನಿಲ್ಲಿಸಬೇಕು ಎಂದು ಅಟಾರ್ನಿ ಜನರಲ್ ಆರ್ ವೆಂಕಟರಮಣಿ ಅಭಿಪ್ರಾಯಪಟ್ಟಿದ್ದಾರೆ.
ಇಂದು ಸುಪ್ರೀಂಕೋರ್ಟ್‌ನಲ್ಲಿ ಆಚರಿಸಲಾದ ಸಂವಿಧಾನ ದಿನಾಚರಣೆಯಲ್ಲಿ ಮಾತನಾಡಿದ ಅವರು, ಸುಪ್ರೀಂಕೋರ್ಟ್ಅನ್ನು ಸಣ್ಣ ನ್ಯಾಯಾಲಯವನ್ನಾಗಿ ವರ್ತಿಸುವುದನ್ನು ನಿಲ್ಲಿಸಬೇಕು. ಹೈಕೋರ್ಟ್‌ಗಳಿಂದ ತಡೆರಹಿತ ಮತ್ತು ದೊಡ್ಡ ಪ್ರಮಾಣದ ಪ್ರಕರಣಗಳ ಜೊತೆಗೆ ಕೊನೆಯಿಲ್ಲದ ಶಾಸನಬದ್ಧ ಮೇಲ್ಮನವಿಗಳೊಂದಿಗೆ ಸುಪ್ರೀಂ ಕೋರ್ಟ್ಗೆ ಓವರ್‌ಲೋಡ್ ಮಾಡುವುದನ್ನು ಸರ್ಕಾರ ನಿಲ್ಲಿಸುವುದು ಮುಖ್ಯವಾಗಿದೆ ಎಂದು ಪ್ರತಿಪಾದಿಸಿದರು.
ಎಲ್ಲ ಇಲಾಖೆಗಳು ಪರಿಹಾರ ವಿಭಾಗವನ್ನು ಹೊಂದಿರಬೇಕು ಮತ್ತು ಅವುಗಳನ್ನು ಯಾವಾಗಲೂ ಕಾನೂನು ವಿವಾದಗಳಲ್ಲಿ ತೊಡಗಿಸಿಕೊಳ್ಳುವ ಅಗತ್ಯವಿಲ್ಲ. ನಮಗೆ ಕಾನೂನು ಸುಧಾರಣಾ ವಿಭಾಗ, ಸಂಶೋಧನಾ ವಿಭಾಗ, ಶೈಕ್ಷಣಿಕ ವಿಭಾಗಕ್ಕೆ ಶಾಶ್ವತ ಕಾನೂನು ಆಯೋಗದ ಅಗತ್ಯವಿದೆ. ನಾವು ನಮ್ಮ ಹೈಕೋರ್ಟ್‌ಗಳ ದಟ್ಟಣೆ ಕಡಿಮೆಗೊಳಿಸಬೇಕಾಗಿದೆ ಎಂದು ಸಲಹೆ ನೀಡಿದರು.
ಇದೇ ವೇಳೆ, ಪಶ್ಚಿಮವು ನಮ್ಮಿಂದ ಕಲಿಯಲು ಬರುವ ದಿನಕ್ಕಾಗಿ ನಾನು ಎದುರು ನೋಡುತ್ತಿದ್ದೇನೆ. ವಸಾಹತುಶಾಹಿ ಮನಸ್ಸುಗಳು ಮತ್ತು ಜನರು ಸ್ವತಂತ್ರರಾಗಬೇಕಿದೆ ಎಂದು ಅಟಾರ್ನಿ ಜನರಲ್ ಹೇಳಿದರು.
ಭಾರತೀಯ ಭಾಷಾ ಸಮಿತಿ ರಚನೆ: ಕೇಂದ್ರ ಕಾನೂನು ಸಚಿವ ಕಿರಣ್ ರಿಜಿಜು ಮಾತನಾಡಿ, ಕಾನೂನಿನ ಬಗ್ಗೆ ಎಲ್ಲ ನಾಗರಿಕರಿಗೆ ಮಾಹಿತಿ ಲಭ್ಯವಾಗುವಂತೆ ತಂತ್ರಜ್ಞಾನ ಮತ್ತು ನ್ಯಾಯಾಂಗವನ್ನು ಸಂಯೋಜಿಸಲು ಸರ್ಕಾರ ನಿರಂತರವಾಗಿ ಪ್ರಯತ್ನಿಸುತ್ತಿದೆ. ಟೆಲಿ ಕಾನೂನು ಸೇವೆಗಳ ಮೂಲಕ ವ್ಯಾಜ್ಯ ಪೂರ್ವ ಮಾಹಿತಿ ಲಭ್ಯವಾಗುತ್ತಿದ್ದು, 25 ಲಕ್ಷ ಜನರು ಇದರ ಪ್ರಯೋಜನ ಪಡೆದಿದ್ದಾರೆ. ಮುಂದಿನ 5 ವರ್ಷಗಳಲ್ಲಿ ಒಂದು ಕೋಟಿ ಜನರಿಗೆ ಇದರ ಮಾಹಿತಿ ಲಭ್ಯವಾಗುವಂತೆ ಮಾಡಲಾಗುವುದು ಎಂದು ಹೇಳಿದರು.
ಇದೇ ವೇಳೆ, ಕಾನೂನು ಕ್ಷೇತ್ರದಲ್ಲಿ ಸ್ಥಳೀಯ ಭಾಷೆಗಳ ಪ್ರಾಮುಖ್ಯತೆಯನ್ನು ಎತ್ತಿ ಹೇಳಿದ ಕಾನೂನು ಸಚಿವರು, ಈಗಾಗಲೇ ಮಾಜಿ ಸಿಜೆಐ ಎಸ್‌ಎ ಬೋಬ್ಡೆ ಅಧ್ಯಕ್ಷತೆಯಲ್ಲಿ ಭಾರತೀಯ ಭಾಷಾ ಸಮಿತಿಯನ್ನು ರಚಿಸಲಾಗಿದೆ. ಇದು ನ್ಯಾಯಾಂಗದಲ್ಲಿ ಹೆಚ್ಚು ಬಳಸಲಾಗುವ ಸಿವಿಲ್, ಕ್ರಿಮಿನಲ್ ಇತ್ಯಾದಿ ಪದಗಳನ್ನು ಸಮಿತಿಯು 65 ಸಾವಿರ ಪದಗಳ ಪದಕೋಶ ಪಟ್ಟಿ ಮಾಡಿದೆ ಎಂದರು.
ಇದನ್ನೂ ಓದಿ: NALSAನ ಕಾರ್ಯಕಾರಿ ಅಧ್ಯಕ್ಷರಾಗಿ ನ್ಯಾಯಮೂರ್ತಿ ಸಂಜಯ್ ಕಿಶನ್ ಕೌಲ್ ನೇಮಕ
ಸುಪ್ರೀಂಕೋರ್ಟ್ನ ಮುಖ್ಯ ನ್ಯಾಯಮೂರ್ತಿ ಡಿವೈ ಚಂದ್ರಚೂಡ್ ಮಾತನಾಡಿ, ಎಲ್ಲರಿಗೂ ನ್ಯಾಯ ಸಿಗುವಂತೆ ಮಾಡುವುದು ನ್ಯಾಯಾಂಗದ ಮುಂದಿರುವ ಬಹುಮುಖ್ಯ ಸವಾಲಾಗಿದೆ. ನ್ಯಾಯಾಂಗವು ಜನರನ್ನು ತಲುಪುವುದು ಅತ್ಯಗತ್ಯ. ಆದರೆ, ಜನರೇ ನ್ಯಾಯಾಂಗವನ್ನು ತಲುಪಬೇಕೆಂದು ನಿರೀಕ್ಷಿಸಬಾರದು ಎಂದು ಹೇಳಿದರು.
ತಂತ್ರಜ್ಞಾನದ ಬಳಕೆ ಬಗ್ಗೆಯೂ ಒತ್ತು ಕೊಟ್ಟ ಅವರು, ರಾಷ್ಟ್ರೀಯ ನ್ಯಾಯಾಂಗ ದತ್ತಾಂಶ ಗ್ರಿಡ್ ಹೈಕೋರ್ಟ್‌ಗಳ 77 ಲಕ್ಷ ತೀರ್ಪುಗಳ ಭಂಡಾರವಾಗಿದೆ. ಪ್ರತಿಯೊಬ್ಬ ನಾಗರಿಕರಿಗೂ ಉಚಿತವಾಗಿ ಲಭ್ಯವಿದೆ. ಜಿಲ್ಲಾ ನ್ಯಾಯಾಂಗಗಳು ಜನರ ಸೇವೆ ಮಾಡಬೇಕು. ಅಧೀನ ನ್ಯಾಯಾಂಗದ ಮನಸ್ಥಿತಿಗಿಂತ ಮೇಲೇರಬೇಕೆಂದು ಹೇಳಿದರು.
ಸಂವಿಧಾನ ದಿನಾಚರಣೆ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ಸುಪ್ರೀಂಕೋರ್ಟ್ನ ಇತರ ನ್ಯಾಯಾಧೀಶರು ಉಪಸ್ಥಿತರಿದ್ದರು.
ಇದನ್ನೂ ಓದಿ: ಶಸ್ತ್ರಾಸ್ತ್ರ ನಾಪತ್ತೆ ಪ್ರಕರಣ: 25 ವರ್ಷಗಳ ಬಳಿಕ ಆರೋಪಿಗಳ ವಿರುದ್ಧ ಪ್ರಕರಣ ದಾಖಲು
