ಡ್ಯಾನ್ಸ್​ ಮಾಡ್ತಿದ್ದಾಗಲೇ ಹಾರಿಹೋಯ್ತು ವೈದ್ಯನ ಪ್ರಾಣಪಕ್ಷಿ.. ಶೋಕಸಾಗರದಲ್ಲಿ ಮುಳುಗಿದ ಸಂಭ್ರಮದ ಪಾರ್ಟಿ

ಸಂಭ್ರಮದಲ್ಲಿ ಡ್ಯಾನ್ಸ್​ ಮಾಡ್ತಿದ್ದ ಸಂದರ್ಭದಲ್ಲೇ ವೈದ್ಯರೊಬ್ಬರ ಪ್ರಾಣಪಕ್ಷಿ ಹಾರಿಹೋಗಿರುವ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದ್ದು, ಅದರ ವಿಡಿಯೋ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ಭೋಪಾಲ್(ಮಧ್ಯಪ್ರದೇಶ): 'ಜೀವ' ನೀರಿನ ಮೇಲಿನ ಗುಳ್ಳೆ ಇದ್ದಂತೆ ಯಾವಾಗ ಇರ್ತದೆ ಯಾವಾಗ ಹೋಯ್ತದೆ ಎಂದು ಹೇಳೋಕಾಗಲ್ಲ. ಖುಷಿ ಖುಷಿಯಲ್ಲಿದ್ದ ಸಂದರ್ಭದಲ್ಲೇ ಅನೇಕರ ಪ್ರಾಣಪಕ್ಷಿ ಹಾರಿ ಹೋಗಿರುವ ಘಟನೆ ಸಾಕಷ್ಟು ಬಾರಿ ನಡೆದು ಹೋಗಿವೆ. ಸದ್ಯ ಮಧ್ಯಪ್ರದೇಶದ ಭೋಪಾಲ್​ನಲ್ಲಿ ಅಂತಹದೊಂದು ಮನಕಲಕುವ ಘಟನೆ ನಡೆದಿದೆ.

ಭೋಪಾಲ್​​ನಲ್ಲಿ ಕೆಲ ವೈದ್ಯರು ಸೇರಿಕೊಂಡು ನೃತ್ಯ ಮಾಡ್ತಿದ್ದ ವೇಳೆ ವಿಧಿವಿಜ್ಞಾನ ತಜ್ಞ ಡಾ. ಸಿ.ಎಸ್​​ ಜೈನ್​ ಹೃದಯಾಘಾತಕ್ಕೊಳಗಾಗಿ ಸಾವನ್ನಪ್ಪಿದ್ದಾರೆ. ಹೀಗಾಗಿ ಸಂಭ್ರಮದಲ್ಲಿ ತೇಲಾಡುತ್ತಿದ್ದ ಕಾರ್ಯಕ್ರಮದಲ್ಲಿ ದಿಢೀರ್​ ಶೋಕ ಮನೆ ಮಾಡಿದೆ.

ಭೋಪಾಲ್​ನ ಪ್ರಸಿದ್ಧ ವೈದ್ಯರಾಗಿರುವ ಸಿ.ಎಸ್​​ ಜೈನ್​​, ತಮ್ಮ ಹಳೆಯ ಸಹೋದ್ಯೋಗಿಗಳ ಜೊತೆ ಸೇರಿ ಡ್ಯಾನ್ಸ್​ ಮಾಡ್ತಿದ್ದಾಗಲೇ ಈ ಘಟನೆ ನಡೆದಿದೆ. ಎಲ್ಲ ಸೇರಿಕೊಂಡು ಸ್ಟಾರ್​ ಹೋಟೆಲ್​ವೊಂದರಲ್ಲಿ ಪಾರ್ಟಿ ಮಾಡ್ತಿದ್ದರು. ಇದರಲ್ಲಿ ಹೃದ್ರೋಗ ತಜ್ಞರು ಸೇರಿದಂತೆ ವಿವಿಧ ವಿಭಾಗಗಳ 50ಕ್ಕೂ ಹೆಚ್ಚು ಹಿರಿಯ ವೈದ್ಯರು ಭಾಗಿಯಾಗಿದ್ದರು. ಎಲ್ಲರೂ ನಗುನಗುತ್ತಾ ಡ್ಯಾನ್ಸ್​ ಮಾಡ್ತಿದ್ದಾಗಲೇ ಈ ದುರ್ಘಟನೆ ನಡೆದು ಹೋಗಿದೆ.

ಡಾ. ಜೈನ್​​ 1975ರ ಎಂಬಿಬಿಎಸ್(ಮಧ್ಯಪ್ರದೇಶ)​​​ ಬ್ಯಾಚ್​​ನ ವಿದ್ಯಾರ್ಥಿಯಾಗಿದ್ದು, ತಮ್ಮ ಸಹ ವೈದ್ಯರೊಂದಿಗೆ ಸೇರಿಕೊಂಡು ಪಾರ್ಟಿಯಲ್ಲಿ ಭಾಗಿಯಾಗಿದ್ದರು. ಇವರಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದು, ದಿಢೀರ್​ ಆಗಿ ಪ್ರಾಣ ಕಳೆದುಕೊಂಡಿದ್ದಕ್ಕಾಗಿ ಎಲ್ಲರೂ ಆಘಾತ ವ್ಯಕ್ತಪಡಿಸಿದ್ದಾರೆ.