ಫುಡ್ ಡೆಲಿವರಿ ಮಾಡುವ ಡ್ರೋನ್ ತಯಾರಿಸಿದ ವಿದ್ಯಾರ್ಥಿಗಳು!

ಸಾಮಾನ್ಯವಾಗಿ ಮದುವೆ ಮನೆಗಳಲ್ಲಿ, ಸಮಾರಂಭಗಳಲ್ಲಿ, ಸುರಕ್ಷತೆಗೆ ಸಂಬಂಧಿಸಿದಂತೆ ಡ್ರೋನ್​ಗಳನ್ನು ಬಳಸುವುದು ನೀವೆಲ್ಲ ಕೇಳಿರುತ್ತೀರಿ. ಆದರೆ, ಮನೆ ಮನೆಗಳಿಗೆ ಫುಡ್ ಡೆಲಿವರಿ ಮಾಡುವಂತಹ ಡ್ರೋನ್​ ಅನ್ನು ಲಖನೌದ ಕಾಲೇಜು ವಿದ್ಯಾರ್ಥಿಗಳು ಸಿದ್ಧಪಡಿಸಿದ್ದಾರೆ.

ಲಖನೌ (ಉತ್ತರಪ್ರದೇಶ): ಲಖನೌ ಪಬ್ಲಿಕ್ ಕಾಲೇಜ್ ಆಫ್ ಪ್ರೊಫೆಷನಲ್ ಸ್ಟಡೀಸ್ ವಿದ್ಯಾರ್ಥಿಗಳು 80 ಸಾವಿರ ರೂಪಾಯಿ ವೆಚ್ಚದಲ್ಲಿ ಡ್ರೋನ್ ​ವೊಂದನ್ನು ಸಿದ್ಧಪಡಿಸಿದ್ದಾರೆ. ಈ ಡ್ರೋನ್​ಗಳಿಂದ ಮನೆ ಮನೆಗೆ ಆಹಾರ ವಿತರಿಸಬಹುದು. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಕಾಲೇಜಿನ ಡೀನ್​ ಎಲ್​.ಎಸ್.ಅವಸ್ಥಿ, ಈ ಡ್ರೋನ್​ ಅನ್ನು 80 ಸಾವಿರ ರೂಪಾಯಿಗೆ ಸಿದ್ಧಪಡಿಸಿದ್ದಾರೆ. ಮಾರುಕಟ್ಟೆಯಲ್ಲಿ ಈ ಡ್ರೋನ್ ಬೆಲೆ ಎರಡೂವರೆ ಲಕ್ಷ ರೂಪಾಯಿಯಿಂದ 3 ಲಕ್ಷ ರೂಪಾಯಿವರೆಗಿದೆ ಎಂದರು.

ಮಾನಿಟರ್ ಸಹಾಯದಿಂದ ಈ ಡ್ರೋನ್​ ಅನ್ನು ನಿಯಂತ್ರಿಸಬಹುದು. ಡ್ರೋನ್​ ಅನ್ನು ಮತ್ತಷ್ಟು ಸುಧಾರಿಸುವ ಕೆಲಸ ಮಾಡಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ಒಂದರಿಂದ ಒಂದೂವರೆ ಕೆ.ಜಿ.ತೂಕದ ಸರಕುಗಳನ್ನು ಒಯ್ಯಲು ಸಹ ಈ ಡ್ರೋನ್ ಸಹಕಾರಿಯಾಗಲಿದೆ ಎಂದು ಅವಸ್ಥಿ ಮಾಹಿತಿ ನೀಡಿದ್ದಾರೆ.

ವಿದ್ಯಾರ್ಥಿಗಳಾದ ರಜತ್ ಮತ್ತು ಅಪ್ವಯನ್ ಸಿನ್ಹಾ ಈ ಡ್ರೋನ್ ಸಿದ್ಧಪಡಿಸಿದ್ದಾರೆ. ಈ ನಿಟ್ಟಿನಲ್ಲಿ SIDBI ಜೊತೆ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಈ ಉತ್ಪನ್ನದ ವಾಣಿಜ್ಯ ಬಳಕೆ ಬಗ್ಗೆ ಎಲ್ಲ ಕಾನೂನು ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಲಾಗುತ್ತಿದೆ. ಅದರ ನಂತರವೇ ಇದನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುತ್ತದೆ ಎಂದು ಡಾ ಅವಸ್ಥಿ ವಿವರಿಸಿದರು.

ಕೆಲವು ಸಮಯದಿಂದ ಡ್ರೋನ್‌ಗಳ ಬಳಕೆ ಸಾಕಷ್ಟು ಜನಪ್ರಿಯವಾಗಿದೆ. ಇದನ್ನು ಛಾಯಾಗ್ರಹಣಕ್ಕಾಗಿ ಮತ್ತು ಸಣ್ಣ ವಸ್ತುಗಳನ್ನು ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ಸಾಗಿಸಲು ಬಳಸಲಾಗುತ್ತಿದೆ. ಇದರ ದುರುಪಯೋಗದ ಆತಂಕದ ದೃಷ್ಟಿಯಿಂದ, ನಾಗರಿಕ ವಿಮಾನಯಾನ ಸಚಿವಾಲಯದಿಂದ ಕೆಲವು ಮಾರ್ಗಸೂಚಿಗಳನ್ನು ಸಹ ನೀಡಲಾಗಿದೆ. ಮಾನವ ರಹಿತ ವಿಮಾನ ವ್ಯವಸ್ಥೆ ನಿಯಮಗಳಲ್ಲಿ ಇದರ ಬಳಕೆಗೆ ಸಂಬಂಧಿಸಿದಂತೆ ಮಾರ್ಗಸೂಚಿಗಳನ್ನು ಸಿದ್ಧಪಡಿಸಲಾಗಿದೆ.

ತೂಕ ಮತ್ತು ಗಾತ್ರಕ್ಕೆ ಅನುಗುಣವಾಗಿ ಡ್ರೋನ್‌ಗಳನ್ನು ವಿವಿಧ ವರ್ಗಗಳಾಗಿ ವಿಂಗಡಿಸಲಾಗಿದೆ.

ನ್ಯಾನೋ ಡ್ರೋನ್: ಇವು 250 ಗ್ರಾಂ ಗಿಂತ ಕಡಿಮೆ ತೂಕದ ಡ್ರೋನ್‌ಗಳು. ಇವುಗಳನ್ನು ಹಾರಿಸಲು ಯಾವುದೇ ಪರವಾನಗಿ ಅಗತ್ಯವಿಲ್ಲ.

ಮೈಕ್ರೋ ಡ್ರೋನ್: ಈ ಡ್ರೋನ್‌ಗಳ ತೂಕ 200 ಗ್ರಾಂಗಿಂತ ಹೆಚ್ಚು 2 ಕೆ.ಜಿ.ಗಿಂತ ಕಡಿಮೆ. ಈ ಡ್ರೋನ್‌ಗಳನ್ನು ಹಾರಿಸಲು ಅನುಮತಿ ಅಗತ್ಯವಿದೆ.

ಸಣ್ಣ ಡ್ರೋನ್: ಇದರ ತೂಕ 2 ಕೆಜಿಗಿಂತ ಹೆಚ್ಚು 25 ಕೆಜಿಗಿಂತ ಕಡಿಮೆ. ಮೈಕ್ರೋ ಡ್ರೋನ್‌ಗಳಂತೆ, ಇವುಗಳನ್ನು ಹಾರಲು ಅನುಮತಿಯ ಅಗತ್ಯವಿದೆ.

ಮಧ್ಯಮ ಡ್ರೋನ್: ಇದರ ತೂಕ 25 ಕೆಜಿಗಿಂತ ಹೆಚ್ಚು ಆದರೆ 150 ಕೆಜಿಗಿಂತ ಕಡಿಮೆ

ದೊಡ್ಡ ಡ್ರೋನ್: ಇದು 150 ಕೆಜಿಗಿಂತ ಹೆಚ್ಚಿರುತ್ತದೆ.

ನ್ಯಾನೋವೊಂದನ್ನು ಹೊರತುಪಡಿಸಿ ಉಳಿದ ಡ್ರೋನ್ ಹಾರಿಸಲು ಪರವಾನಗಿ ಅಗತ್ಯವಿದೆ. ಅನುಮತಿಯಿಲ್ಲದೇ ಡ್ರೋನ್ ಹಾರಾಟದಲ್ಲಿ ಸಿಕ್ಕಿಬಿದ್ದರೆ, 25,000 ರೂ. ದಂಡ ವಿಧಿಸಲಾಗುತ್ತದೆ. ಕಾರ್ಯಾಚರಣೆಯಿಲ್ಲದ ಪ್ರದೇಶದಲ್ಲಿ ಡ್ರೋನ್ ಹಾರಿಸಿದರೆ 50,000 ರೂ ದಂಡ ವಿಧಿಸಲಾಗುತ್ತದೆ.

ಡ್ರೋನ್‌ಗಳನ್ನು ಹಾರಿಸಲು ಎರಡು ರೀತಿಯ ಪರವಾನಗಿಗಳನ್ನು ನೀಡಲಾಗುತ್ತದೆ. ಮೊದಲನೆಯದು ವಿದ್ಯಾರ್ಥಿ ದೂರಸ್ಥ ಪೈಲಟ್ ಪರವಾನಗಿ. ಎರಡನೆಯದು ದೂರಸ್ಥ ಪೈಲಟ್ ಪರವಾನಗಿ. ವಾಣಿಜ್ಯ ಚಟುವಟಿಕೆಗಾಗಿ ಡ್ರೋನ್ ಹಾರಿಸಲು ಆಯೋಜಕರ ಕನಿಷ್ಠ ವಯಸ್ಸು 18 ವರ್ಷಗಳು ಮತ್ತು ಗರಿಷ್ಠ 35 ವರ್ಷಗಳು. ಡ್ರೋನ್ ಆಪರೇಟರ್ ಕನಿಷ್ಠ 10 ನೇ ತರಗತಿ ಉತ್ತೀರ್ಣರಾಗಿರಬೇಕು ಅಥವಾ ಮಾನ್ಯತೆ ಪಡೆದ ಮಂಡಳಿಯಿಂದ ಸಮಾನ ಪದವಿ ಹೊಂದಿರಬೇಕು.