ದಿಬ್ರುಗಢ್ (ಅಸ್ಸಾಂ) : ಒಂದೇ ಬಾರಿಗೆ ಮೂರು ಅಥವಾ ನಾಲ್ಕು ಮಕ್ಕಳು ಹುಟ್ಟಿದ ಸುದ್ದಿಯನ್ನು ಕೇಳುತ್ತಲೇ ಇರುತ್ತೇವೆ. ಆದರೆ ಪುಟ್ಟ ಕಂದಮ್ಮನ ಅದರಲ್ಲೂ ಬಾಲಕನ ಹೊಟ್ಟೆಯಲ್ಲಿ ಭ್ರೂಣ ಪತ್ತೆಯಾಗಿರುವ ಅಚ್ಚರಿಯ ಘಟನೆಯೊಂದು ಅಸ್ಸಾಂನಲ್ಲಿ ಬೆಳಕಿಗೆ ಬಂದಿದೆ. ದಿಬ್ರುಗಢ್ ಜಿಲ್ಲೆಯಲ್ಲಿ 11 ತಿಂಗಳ ಗಂಡು ಮಗುವಿನ ಹೊಟ್ಟೆಯಲ್ಲಿ ಭ್ರೂಣ ಕಂಡುಬಂದಿದೆ. ಇಲ್ಲಿನ ಅಪೇಕ್ಷಾ ಆಸ್ಪತ್ರೆಯ ವೈದ್ಯರು 2 ಕೆಜಿ ತೂಕದ ಭ್ರೂಣವನ್ನು ಶಸ್ತ್ರಚಿಕಿತ್ಸೆಯ ಮೂಲಕ ಯಶಸ್ವಿಯಾಗಿ ಹೊರತೆಗೆದಿದ್ದು, ಮಗು ಆರೋಗ್ಯವಾಗಿದೆ.
ಅರುಣಾಚಲ ಪ್ರದೇಶದ ಸಾಂಗ್ಲಾಂಗ್ ಜಿಲ್ಲೆಯ ಈ ಗಂಡು ಮಗುವನ್ನು ಅನಾರೋಗ್ಯದ ಕಾರಣಕ್ಕೆ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಶಿಶುವನ್ನು ಪರೀಕ್ಷಿಸಿದ ವೈದ್ಯರಿಗೆ ಹೊಟ್ಟೆಯಲ್ಲಿ ಭ್ರೂಣ ಇರುವುದು ಗೊತ್ತಾಗಿದೆ. ವೈದ್ಯರ ತಂಡ ಶನಿವಾರ 3 ಗಂಟೆಗಳ ಶಸ್ತ್ರಚಿಕಿತ್ಸೆ ನಡೆಸಿ ಭ್ರೂಣವನ್ನು ಹೊರತೆಗೆದಿದ್ದಾರೆ. ಇದಕ್ಕೂ ಮುನ್ನ ಇಂಥದ್ದೇ ಮತ್ತೊಂದು ಪ್ರಕರಣವನ್ನು ಅಪೇಕ್ಷಾ ಆಸ್ಪತ್ರೆಯ ವೈದ್ಯರು ಬಗೆಹರಿಸಿದ್ದರು.
ಭ್ರೂಣ ಬೆಳವಣಿಗೆ ಹೇಗೆ ಸಾಧ್ಯ?: ವೈದ್ಯಕೀಯ ಪರಿಭಾಷೆಯಲ್ಲಿ ಇದನ್ನು ಫೀಟಸ್-ಇನ್-ಫೀಟು (ಎಫ್‌ಐಎಫ್) ಎಂದು ಕರೆಯುತ್ತಾರೆ. ಇದು ಅಪರೂಪದ ವಿದ್ಯಮಾನವಾಗಿದ್ದು, ಇದರಲ್ಲಿ ಒಂದು ದೋಷಪೂರಿತ ಕಶೇರುಕ ಭ್ರೂಣವು ಅದರ ಅವಳಿ ದೇಹದೊಳಗೆ ಸುತ್ತುವರಿಯಲ್ಪಟ್ಟಿರುತ್ತದೆ. ಸಾಮಾನ್ಯವಾಗಿ ಐದು ಲಕ್ಷದಲ್ಲಿ ಒಂದು ಮಗುವಿನಲ್ಲಿ ಮಾತ್ರ ಅಪರೂಪವಾಗಿ ಇದು ಕಂಡುಬರುತ್ತದೆ ಎಂದು ವೈದ್ಯರು ಹೇಳುತ್ತಾರೆ.
ಇದನ್ನೂ ಓದಿ: ಕಲಬುರಗಿ ಭ್ರೂಣಲಿಂಗ ಪತ್ತೆ ದಂಧೆ: ಆಯುಷ್ ವೈದ್ಯನಿಂದಲೇ ಕೃತ್ಯ, ಮಹಾರಾಷ್ಟ್ರದ ಗರ್ಭಿಣಿಯರೇ ಟಾರ್ಗೆಟ್!
ನವಜಾತ ಶಿಶುವಿನ ಹೊಟ್ಟೆಯಲ್ಲಿ 8 ಭ್ರೂಣ!: 2022ರ ನವೆಂಬರ್ ತಿಂಗಳಿನಲ್ಲಿ 21 ದಿನದ ನವಜಾತ ಶಿಶುವಿನ ಹೊಟ್ಟೆಯಲ್ಲಿ 8 ಭ್ರೂಣ ಪತ್ತೆಯಾಗಿತ್ತು. ವೈದ್ಯರು ಸಿಟಿ ಸ್ಕ್ಯಾನ್ ನಡೆಸಿದಾಗ ಹೊಟ್ಟೆಯಲ್ಲಿ ಗಡ್ಡೆ ಕಂಡುಬಂದಿದ್ದು, ಆಪರೇಷನ್ ಮೂಲಕ ಬೆಳವಣಿಗೆಯಾಗದ ಭ್ರೂಣಗಳನ್ನು ಹೊರತೆಗೆಯಲಾಗಿತ್ತು. ಎಂಟು ಭ್ರೂಣಗಳನ್ನು ಏಕಕಾಲದಲ್ಲಿ ಹೊರತೆಗೆದ ಜಗತ್ತಿನ ಮೊದಲ ಪ್ರಕರಣ ಇದಾಗಿತ್ತು. ವಿಶ್ವಾದ್ಯಂತ ಇದಕ್ಕಿಂತ ಕಡಿಮೆ ಭ್ರೂಣಗಳಿರುವ ಪ್ರಕರಣಗಳು ಪತ್ತೆಯಾಗಿವೆ. ಆದರೆ 21 ದಿನದ ನವಜಾತ ಹೆಣ್ಣು ಶಿಶುವಿನ ಹೊಟ್ಟೆಯಿಂದ ಇಷ್ಟೊಂದು ಪ್ರಮಾಣದ ಭ್ರೂಣಗಳನ್ನು ಒಮ್ಮೆಲೆ ತೆಗೆದುಹಾಕಿರುವುದು ಅಚ್ಚರಿ ಉಂಟು ಮಾಡಿತ್ತು.
ಈ ಹಿಂದೆ ಬಿಹಾರದಲ್ಲೂ ಇಂಥದ್ದೇ ಘಟನೆ: ಬಿಹಾರದ ಮೋತಿಹಾರಿಯಲ್ಲಿ ಶಿಶು ಜನಿಸಿದ 40 ದಿನಗಳ ನಂತರ ಅದರ ಉದರದಲ್ಲಿ ಭ್ರೂಣಗಳಿದ್ದವು. ಈ ಘಟನೆ ಕಳೆದ ವರ್ಷದ ಮೇ ತಿಂಗಳಲ್ಲಿ ವರದಿಯಾಗಿತ್ತು. ಜನನದ ಕೆಲವು ದಿನಗಳ ನಂತರ ಹೊಟ್ಟೆಯ ಕೆಳಗೊಂದು ಗಡ್ಡೆ ಊದಿಕೊಂಡಿದೆ. ಕುಟುಂಬಸ್ಥರು ಮಗುವಿನೊಂದಿಗೆ ಮೋತಿಹಾರಿಯ ರಹಮಾನಿಯಾ ವೈದ್ಯಕೀಯ ಆಸ್ಪತ್ರೆಗೆ ತೆರಳಿ ಸ್ಕ್ಯಾನಿಂಗ್ ಮಾಡಿಸಿದಾಗ ಭ್ರೂಣ ಇರುವುದು ಗೊತ್ತಾಗಿದೆ. ನಂತರ ವೈದ್ಯರ ತಂಡ ಯಶಸ್ವಿಯಾಗಿ ಶಸ್ತ್ರಚಿಕಿತ್ಸೆ ನಡೆಸಿದ್ದರು.
ಇದನ್ನೂ ಓದಿ: IVF ಚಿಕಿತ್ಸೆಯಲ್ಲಿ ಭ್ರೂಣ ನಿರ್ಧರಿಸಲು ಕೃತಕ ಬುದ್ಧಿಮತ್ತೆ ಸಹಕಾರಿ
