ಬಕ್ಸರ್ (ಬಿಹಾರ): ಮಂತ್ರವಾದಿಯ ಮಾತು ಕೇಳಿ ತನ್ನ ಸ್ವಂತ ಇಬ್ಬರು ಅಪ್ರಾಪ್ತ ಹೆಣ್ಣುಮಕ್ಕಳ ಮೇಲೆ ತಂದೆಯೊಬ್ಬ ಅತ್ಯಾಚಾರ ಎಸಗಿದ ಆರೋಪ ಪ್ರಕರಣದಲ್ಲಿ ಐವರನ್ನು ದೋಷಿ ಎಂದು ಬಿಹಾರದ ಬಕ್ಸರ್ ಜಿಲ್ಲೆಯ ವಿಶೇಷ ಪೋಕ್ಸೋ ನ್ಯಾಯಾಲಯ ಘೋಷಿಸಿದೆ. ತಂದೆ, ತಾಯಿ, ಚಿಕ್ಕಮ್ಮ ಹಾಗೂ ಮಂತ್ರವಾದಿ ಕೂಡ ದೋಷಿ ಎಂದು ಆದೇಶಿಸಿರುವ ಕೋರ್ಟ್, ಶಿಕ್ಷೆಯ ಪ್ರಮಾಣವನ್ನು ಸೆಪ್ಟೆಂಬರ್ 12ರಂದು ಪ್ರಕಟಿಸುವುದಾಗಿ ತಿಳಿಸಿದೆ.
ಈ ಪ್ರಕರಣದ ಬಗ್ಗೆ ಮಾಹಿತಿ ನೀಡಿರುವ ಪೋಕ್ಸೋ ನ್ಯಾಯಾಲಯದ ವಿಶೇಷ ಪಬ್ಲಿಕ್ ಪ್ರಾಸಿಕ್ಯೂಟರ್ ಸುರೇಶ್ ಕುಮಾರ್ ಸಿಂಗ್, ಇದು 14 ಹಾಗೂ 16 ವರ್ಷದ ಇಬ್ಬರು ಬಾಲಕಿಯರ ಮೇಲೆ ಅತ್ಯಾಚಾರಕ್ಕೆ ಸಂಬಂಧ ರಾಜ್‌ಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ದಾಖಲಾದ ಪ್ರಕರಣವಾಗಿದೆ. ವಿಶೇಷ ಪೋಕ್ಸೊ ನ್ಯಾಯಾಲಯದ ನ್ಯಾಯಾಧೀಶ ಮಂಕಮೇಶ್ವರ ಪ್ರಸಾದ್ ಚೌಬೆ ಅವರ ಪ್ರಕರಣದ ತ್ವರಿತ ವಿಚಾರಣೆ ನಡೆಸಿ ಅಪರಾಧಿಗಳ ಶಿಕ್ಷೆಯ ಪ್ರಮಾಣವನ್ನು ಕಾಯ್ದಿರಿಸಿದ್ದಾರೆ ಎಂದು ತಿಳಿಸಿದ್ದಾರೆ.
ಪ್ರಕರಣದ ವಿವರ: ರಾಜ್‌ಪುರ ಪೊಲೀಸ್ ಠಾಣಾ ವ್ಯಾಪ್ತಿಯ ಗ್ರಾಮವೊಂದರ ದಂಪತಿಗೆ ಇಬ್ಬರು ಹೆಣ್ಣು ಮಕ್ಕಳು ಇದ್ದು, ಗಂಡು ಮಗು ಆಗಿರಲಿಲ್ಲ. ಹೀಗಾಗಿ ಈ ದಂಪತಿ ಮಂತ್ರವಾದಿ ಅಜಯ್ ಕುಮಾರ್ ಎಂಬಾತನ ಮೊರೆ ಹೋಗಿದ್ದರು. ಆಗ ಈತನ ಮಾತು ಕೇಳಿಕೊಂಡು ತಂದೆ ತನ್ನ ಸ್ವಂತ ಇಬ್ಬರು ಹೆಣ್ಣು ಮಕ್ಕಳನ್ನು ಲೈಂಗಿಕವಾಗಿ ಬಳಸಿಕೊಳ್ಳಲು ಶುರುಮಾಡಿದ್ದ. ಅಲ್ಲದೇ, ಮಂತ್ರವಾದಿ ಹೇಳಿದ ಕೆಲ ಪೂಜೆಯನ್ನೂ ಪಾಲಿಸುತ್ತಿದ್ದ. ಇದರ ನಡುವೆ ಗಂಡು ಮಗು ಜನಿಸಿತ್ತು. ಆದರೆ, ಆಗ ಹುಟ್ಟಿದ ಮಗುವಿಗೆ ಅಪಾಯವಿದೆ ಎಂದು ಹೇಳಿ ತಾನು ಹೇಳುವ ಆಚರಣೆಗಳಲ್ಲಿ ಬಾಲಕಿಯರನ್ನೂ ತೊಡಗಿಸಬೇಕೆಂದು ಮಂತ್ರವಾದಿ ಸಲಹೆ ನೀಡಿದ್ದ. ಈ ವೇಳೆ, ಮಂತ್ರವಾದಿ ಕೂಡ ಬಾಲಕಿಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸುತ್ತಿದ್ದ ಎಂದು ಹೇಳಲಾಗುತ್ತಿದೆ.
ತನ್ನ ಸ್ವಂತ ತಂದೆ ಹಾಗೂ ಮಂತ್ರವಾದಿಯ ದೌರ್ಜನ್ಯವನ್ನು ಹಲವು ದಿನಗಳು ಸಹಿಸಿಕೊಂಡಿದ್ದ ಸಂತ್ರಸ್ತ ಬಾಲಕಿಯರು ಮನೆಯಿಂದ ತಪ್ಪಿಸಿಕೊಂಡು ಬಕ್ಸರ್ಗೆ ಬಂದಿದ್ದರು. ಅಲ್ಲಿ ಓರ್ವ ವ್ಯಕ್ತಿಯನ್ನು ಭೇಟಿಯಾಗಿ ತಮ್ಮ ಸಂಪೂರ್ಣ ಕಥೆಯನ್ನು ಹೇಳಿದ್ದರು. ಆ ವ್ಯಕ್ತಿ ಇಬ್ಬರೂ ಬಾಲಕಿಯರಿಗೆ ಪೊಲೀಸರನ್ನು ತಲುಪಲು ಸಹಾಯ ಮಾಡಿದ್ದರು. ಇದಾದ ನಂತರ ಪ್ರಕರಣದ ಸಂಪೂರ್ಣ ಮಾಹಿತಿಯನ್ನು ಅಂದಿನ ಪೊಲೀಸ್ ವರಿಷ್ಠಾಧಿಕಾರಿ ನೀರಜ್ ಕುಮಾರ್ ಸಿಂಗ್ ಕಲೆ ಹಾಕಿದ್ದರು. ಅಲ್ಲದೇ, ಈ ಕುರಿತು ಏಪ್ರಿಲ್ 28ರಂದು ಮಹಿಳಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲು ಸೂಚಿಸಿದ್ದರು.
ಈ ದೂರಿನ ಸಂದರ್ಭದಲ್ಲಿ ಸಂತ್ರಸ್ತ ಬಾಲಕಿಯರು ತನ್ನ ತಂದೆ, ತಾಯಿ, ಚಿಕ್ಕಮ್ಮ ಮತ್ತು ಮಂತ್ರವಾದಿ ಸೇರಿ ಐವರು ಹೆಸರನ್ನು ಬಹಿರಂಗ ಪಡಿಸಿದ್ದರು. ಇದರ ಆಧಾರದ ಮೇಲೆ ಪೊಲೀಸರು ತಕ್ಷಣವೇ ಕ್ರಮ ಕೈಗೊಂಡು ಎಲ್ಲ ಆರೋಪಿಗಳನ್ನು ಬಂಧಿಸಿದ್ದರು. ಈ ಪ್ರಕರಣದ ವಿಚಾರಣೆಯನ್ನು ವಿಶೇಷ ಪೋಕ್ಸೋ ನ್ಯಾಯಾಲಯ ನಡೆಸುತ್ತಿದೆ. ಇದೀಗ ಅಂತಿಮ ಹಂತಕ್ಕೆ ತಲುಪಿದೆ.
ಇದನ್ನೂ ಓದಿ: ವಿವಾಹಿತ ಮಹಿಳೆಯ ಮೇಲೆ ಸಾಮೂಹಿಕ ಅತ್ಯಾಚಾರ: ಪೊಲೀಸ್ ಸೇರಿ 7 ಜನರ ವಿರುದ್ಧ ಪ್ರಕರಣ ದಾಖಲು
