ಕಾನ್ಪುರ(ಉತ್ತರ ಪ್ರದೇಶ): 14.56 ಲಕ್ಷ ರೂ. ಹಣ, ವಿದೇಶಿ ಕರೆನ್ಸಿ ಹೊಂದಿದ್ದ ಸೇರಿದಂತೆ ನಕಲಿ ಆಧಾರ್ ಕಾರ್ಡ್, ನಕಲಿ ಭಾರತೀಯ ಪಾಸ್ಪೋರ್ಟ್ಗಳು, ಬಾಂಗ್ಲಾದೇಶದ ಪಾಸ್ಪೋರ್ಟ್ಗಳು ಮತ್ತು ಇತರ ದಾಖಲೆಗಳ ಜೊತೆಗೆ ಕಾನ್ಪುರದಲ್ಲಿ ಅಕ್ರಮವಾಗಿ ತಂಗಿದ್ದ ಐವರು ಬಾಂಗ್ಲಾದೇಶಿ ಪ್ರಜೆಗಳನ್ನು ಕಾನ್ಪುರ ಪೊಲೀಸ್ ಕಮಿಷನರೇಟ್ ಭಾನುವಾರ ಬಂಧಿಸಿದ್ದಾರೆ. ಈ ಹೊಸ ಪ್ರಕರಣದೊಂದಿಗೆ ಇದೀಗ ಉತ್ತರ ಪ್ರದೇಶದಲ್ಲಿ ಅಕ್ರಮ ಬಾಂಗ್ಲಾದೇಶಿ ವಲಸಿಗರ ಸಮಸ್ಯೆ ಮತ್ತೆ ಮುನ್ನೆಲೆಗೆ ಬಂದಿದೆ.
ಐವರು ಆರೋಪಿಗಳು ಒಂದೇ ಕುಟುಂಬದ ಸದಸ್ಯರಾಗಿದ್ದು, ರಿಜ್ವಾನ್ ಮೊಹಮ್ಮದ್(53), ಆತನ ಭಾರತೀಯ ಮೂಲದ ಪತ್ನಿ ಹಿನಾ ಖಾಲಿದ್(45), ರಿಜ್ವಾನ್ ತಂದೆ ಖಾಲಿದ್ ಮಜೀದ್(79), ದಂಪತಿ ಮಕ್ಕಳಾದ ರುಖ್ಸರ್ ರಿಜ್ವಾನ್(21) ಮತ್ತು ಒಬ್ಬ 17 ವರ್ಷದ ಬಾಲಾಪರಾಧಿ ಎಂದು ಗುರುತಿಸಲಾಗಿದೆ ಎಂದು ಜಂಟಿ ಪೊಲೀಸ್ ಆಯುಕ್ತ ಆನಂದ್ ಪ್ರಕಾಶ್ ತಿವಾರಿ ತಿಳಿಸಿದ್ದಾರೆ.
ಈ ಕುರಿತು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಆರಂಭದಲ್ಲಿ ರಿಜ್ವಾನ್ ಪೊಲೀಸರನ್ನು ದಾರಿ ತಪ್ಪಿಸಲು ಪ್ರಯತ್ನಿಸಿದ್ದು, ನಂತರ ವಿಚಾರಣೆ ವೇಳೆ ತಪ್ಪೊಪ್ಪಿಕೊಂಡಿದ್ದಾನೆ. ರಿಜ್ವಾನ್ 1996ರಲ್ಲಿ ಪ್ರವಾಸಿ ವೀಸಾದಲ್ಲಿ ಭಾರತಕ್ಕೆ ಬಂದಿದ್ದು, 1998ರಲ್ಲಿ ದೆಹಲಿಯಲ್ಲಿ ಹಿನಾ ಖಾಲಿದ್ ಅವರನ್ನು ಮದುವೆಯಾಗಿದ್ದನು. ನಂತರ ಮಡದಿ ಹಿನಾಳನ್ನು ದೆಹಲಿ ಮೂಲಕ ಪಶ್ಚಿಮ ಬಂಗಾಳಕ್ಕೆ ತಲುಪಿ, ಅಲ್ಲಿಂದ ನಂತರ ಬಾಂಗ್ಲಾದೇಶಕ್ಕೆ ಅತಿಕ್ರಮವಾಗಿ ಕರೆದುಕೊಂಡು ಹೋಗಿದ್ದಾನೆ. ಅಲ್ಲಿಂದ ಭಾರತಕ್ಕೆ ಹಿಂತಿರುಗುವ ಮೊದಲು ಹಿನಾ ಖಾಲಿದ್ ಬಾಂಗ್ಲಾದೇಶದ ಪಾಸ್ಪೋರ್ಟ್ ಅನ್ನು ಪಡೆದಿದ್ದಾಳೆ. ನಂತರ ಅವರ ಇಬ್ಬರು ಮಕ್ಕಳು ಕೂಡ ಅಕ್ರಮವಾಗಿ ಬಾಂಗ್ಲಾದೇಶಕ್ಕೆ ಹೋಗಿ ಅಲ್ಲಿನ ಪಾಸ್ಪೋರ್ಟ್ ಪಡೆದು ಭಾರತಕ್ಕೆ ಮರಳಿದ್ದಾರೆ.
ವಿಚಾರಣೆ ವೇಳೆ ಎಸ್‌ಪಿ ಶಾಸಕ ಇರ್ಫಾನ್ ಸೋಲಂಕಿ ಮತ್ತು ಎಸ್‌ಪಿ ಕೌನ್ಸಿಲರ್ ಮನ್ನು ರೆಹಮಾನ್ ಅವರು ಮೂಲತಃ ಬಾಂಗ್ಲಾದೇಶದ ಖುಲ್ನಾ ನಿವಾಸಿಯಾಗಿರುವ ರಿಜ್ವಾನ್ ಮತ್ತು ಅವರ ಕುಟುಂಬ ಸದಸ್ಯರಿಗೆ ಭಾರತೀಯ ಪ್ರಜೆಗಳು ಎಂದು ಸಾಬೀತುಪಡಿಸುವ ನಿವಾಸ, ಪುರಾವೆ ಪ್ರಮಾಣಪತ್ರಗಳನ್ನು ಪಡೆಯಲು ಸಹಾಯ ಮಾಡಿದ್ದಾರೆ ಎಂದು ತಿಳಿದುಬಂದಿದೆ. ಕುಟುಂಬಕ್ಕೆ ನೀಡಲಾಗಿರುವ ಪ್ರಮಾಣ ಪತ್ರಗಳಲ್ಲಿರುವ ಅವರದ್ದಾ ಎಂಬ ಬಗ್ಗೆ ಪರಿಶೀಲಿಸಲಾಗುವುದು. ಆರೋಪಿಗಳ ವಿರುದ್ಧ ಭಾರತೀಯ ದಂಡ ಸಂಹಿತೆ (IPC) ಮತ್ತು 1946 ರ 14-ವಿದೇಶಿ ಕಾಯ್ದೆ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಈ ವಿಷಯದ ಬಗ್ಗೆ ವಿವರವಾದ ತನಿಖೆ ನಡೆಯುತ್ತಿದ್ದು, ಶೀಘ್ರದಲ್ಲೇ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುವುದು ಎಂದು ತಿವಾರಿ ತಿಳಿಸಿದ್ದಾರೆ.
ಆರೋಪಿಗಳಿಂದ ಪೊಲೀಸರು 13 ನಕಲಿ ಪಾಸ್ಪೋರ್ಟ್ಗಳು, ಐದು ಆಧಾರ್ ಕಾರ್ಡ್‌ಗಳು, ಶೈಕ್ಷಣಿಕ ಪ್ರಮಾಣಪತ್ರಗಳು, ವಿದೇಶಿ ಕರೆನ್ಸಿ, ಚಿನ್ನಾಭರಣಗಳು ಮತ್ತು 14 ಲಕ್ಷ ರೂ. ನಗದು ವಶಪಡಿಸಿಕೊಂಡಿದ್ದಾರೆ. ಶಾಸಕ ಇರ್ಫಾನ್ ಸೋಲಂಕಿ ಅವರು 2019 ರಲ್ಲಿ ಅವರನ್ನು ಕಾನ್ಪುರದ ನಿವಾಸಿ ಎಂದು ಪ್ರಮಾಣೀಕರಿಸಿದ ಕಾಗದವನ್ನು ಹಾಗೂ ಕೌನ್ಸಿಲರ್ ಮನ್ನು ರೆಹಮಾನ್ ಅವರ ಕಾನ್ಪುರ ನಿವಾಸವನ್ನು ಪ್ರಮಾಣೀಕರಿಸಿದ ಮತ್ತೊಂದು ಕಾಗದವನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ತಿವಾರಿ ಮಾಹಿತಿ ನೀಡಿದರು.
ಇದನ್ನೂ ಓದಿ: ಪ್ರವಾಸಿ ವೀಸಾ.. ನಿರ್ದಿಷ್ಟ ಧರ್ಮದ ಬೋಧನೆ: 7 ಜರ್ಮನ್ ಪ್ರಜೆಗಳಿಗೆ 500 ಯುಎಸ್ ಡಾಲರ್ ದಂಡ
