ಹೈದರಾಬಾದ್: ವಿಶ್ವದಲ್ಲಿ ಪ್ರತಿವರ್ಷ ಅಂದಾಜು 931 ಮಿಲಿಯನ್ ಟನ್ಗಳಷ್ಟು ಆಹಾರವನ್ನು ಹಾಳು ಮಾಡಲಾಗುತ್ತಿದೆ ಎಂದು 2019ರ ವಿಶ್ವಸಂಸ್ಥೆಯ ವರದಿ ಹೇಳಿದೆ. ಹೀಗೆ ಹಾಳು ಮಾಡುವ ಆಹಾರದಿಂದ ಇಡೀ ಭೂಮಿಯನ್ನು ಏಳು ಬಾರಿ ಸುತ್ತು ಹೊಡೆಯಬಹುದು ಎಂದರೆ ನಾವು ಹಾಳು ಮಾಡುತ್ತಿರುವ ಆಹಾರದ ಪ್ರಮಾಣ ಎಷ್ಟೆಂಬುದು ಅರ್ಥವಾಗುತ್ತದೆ.
ದಿ ಫುಡ್ ಇಂಡೆಕ್ಸ್ ರಿಪೋರ್ಟ್ - 2021
ಭಾರತದಲ್ಲಿಯೂ ಪ್ರತಿವರ್ಷ 68.7 ಮಿಲಿಯನ್ ಟನ್ಗಳಷ್ಟು ಆಹಾರ ತ್ಯಾಜ್ಯ ಸೇರುತ್ತಿದೆ. ವಿಶ್ವಸಂಸ್ಥೆಯ ಪ್ರಾಕೃತಿಕ ಯೋಜನೆ (United Nations Environment Programme -UNEP) ಮತ್ತು ಇದರ ಅಂಗಸಂಸ್ಥೆ ಡಬ್ಲ್ಯೂಆರ್ಎಪಿ ಸಿದ್ಧಪಡಿಸಿದ ದಿ ಫುಡ್ ಇಂಡೆಕ್ಸ್ ರಿಪೋರ್ಟ್ - 2021ರ ಪ್ರಕಾರ, 2019 ರಲ್ಲಿ ವಿಶ್ವಾದ್ಯಂತ 931 ಮಿಲಿಯನ್ ಟನ್ಗಳಷ್ಟು ಆಹಾರವು ತ್ಯಾಜ್ಯವಾಗಿತ್ತು. ಇದರಲ್ಲಿ ಶೇ 61 ರಷ್ಟು ಮನೆಗಳಿಂದ, ಶೇ 26 ರಷ್ಟು ವಾಣಿಜ್ಯ ಆಹಾರ ಸಂಸ್ಥೆಗಳಿಂದ ಹಾಗೂ ಶೇ 13 ರಷ್ಟು ರಿಟೇಲ್ ವಲಯದಿಂದ ಬಂದಿತ್ತು.
ಅಂದರೆ ವಿಶ್ವದಲ್ಲಿ ಬೆಳೆಯಲಾಗುವ ಒಟ್ಟು ಆಹಾರದ ಶೇ 17 ರಷ್ಟು ವೇಸ್ಟ್ ಅಥವಾ ತ್ಯಾಜ್ಯವಾಗುತ್ತದೆ ಎಂದು ಅರ್ಥೈಸಬಹುದು. ಇದನ್ನು ಇನ್ನೂ ಸರಳವಾಗಿ ಹೇಳುವುದಾದರೆ- ತಲಾ 40 ಟನ್ ಸರಕು ತುಂಬಿದ 23 ಮಿಲಿಯನ್ ಲಾರಿಗಳಷ್ಟು ತ್ಯಾಜ್ಯ ಇದಾಗುತ್ತದೆ. ಈ ಲಾರಿಗಳನ್ನು ಬಂಪರ್ ಟು ಬಂಪರ್ ಒಂದರ ಹಿಂದೆ ಒಂದು ನಿಲ್ಲಿಸಿದರೆ ಇವುಗಳಿಂದ ಏಳು ಸುತ್ತು ಭೂಮಿಯನ್ನು ಸುತ್ತಬಹುದು.ಭಾರತದಲ್ಲಿ ಪ್ರತಿವರ್ಷ ಪ್ರತಿವ್ಯಕ್ತಿಗೆ 50 ಕೆಜಿ ಆಹಾರ ಹಾಳು ಮಾಡಲಾಗುತ್ತದೆ. ಇದು ವರ್ಷಕ್ಕೆ ಒಟ್ಟಾರೆ 68,760,163 ಟನ್ಗಳಾಗುತ್ತದೆ.
ಆಹಾರ ಹಾಳು ಮಾಡುವಿಕೆಯ ದುಷ್ಪರಿಣಾಮಗಳು
ಆಹಾರ ಹಾಳು ಮಾಡುವಿಕೆಯಿಂದ ಪ್ರಾಕೃತಿಕವಾಗಿ, ಸಾಮಾಜಿಕವಾಗಿ ಹಾಗೂ ಆರ್ಥಿಕವಾಗಿ ಭಾರಿ ಪ್ರಮಾಣದ ದುಷ್ಪರಿಣಾಮಗಳುಂಟಾಗುತ್ತವೆ. ವಿಶ್ವದಲ್ಲಿ ಬಿಡುಗಡೆಯಾಗುತ್ತಿರುವ ಒಟ್ಟು ಹಸಿರು ಮನೆ ಅನಿಲಗಳಲ್ಲಿ ಶೇ 8 ರಿಂದ 10 ರಷ್ಟು ಹಾಳಾಗುವ ಆಹಾರದಿಂದಲೇ ಬಿಡುಗಡೆಯಾಗುತ್ತಿವೆ.
ಹಸಿವಿನಿಂದ ಬಳಲುತ್ತಿರುವವರ ನೆರವಿಗೆ ಧಾವಿಸೋಣ
2019ರ ವೇಳೆಗೆ ಜಗತ್ತಿನಲ್ಲಿ 690 ಮಿಲಿಯನ್ ಜನತೆ ಊಟವಿಲ್ಲದೆ ಬಳಲುತ್ತಿದ್ದರು. ಇನ್ನು ವಿಶ್ವಾದ್ಯಂತ 3 ಬಿಲಿಯನ್ ಜನತೆಗೆ ಪೌಷ್ಟಿಕಾಂಶಯುಕ್ತ ಆಹಾರ ಸಿಗುತ್ತಿಲ್ಲ. ಕೋವಿಡ್ನ ಈ ಸಂಕಷ್ಟದಲ್ಲಿ ಹಸಿವಿನಿಂದ ಬಳಲುವವರ ಸಂಖ್ಯೆ ಮತ್ತೂ ಹೆಚ್ಚಾಗಬಹುದು. ಹೀಗಾಗಿ ನಾವು ಆಹಾರ ಹಾಳು ಮಾಡುವುದನ್ನು ಶೂನ್ಯ ಮಟ್ಟಕ್ಕೆ ತಂದು ಹಸಿವಿನಲ್ಲಿರುವವರಿಗೆ ಆಹಾರ ಸಿಗುವಂತೆ ನೋಡಿಕೊಳ್ಳುವುದು ತುರ್ತು ಅಗತ್ಯವಾಗಿದೆ.
