ಹೈದರಾಬಾದ್‌: ಆಹಾರ ಅರಸಿ ಕಾಡಿನಿಂದ ನಾಡಿಗೆ ಬಂದಿದ್ದ ಆನೆಯೊಂದು ಅಡುಗೆ ಕೋಣೆಯ ಕಿಟಿಕಿ ಮುರಿದು ಸೊಂಡಿಲಿನಿಂದ ಆಹಾರ ಹುಡುಕಾಡಿರುವ ವಿಡಿಯೋವೊಂದು ವೈರಲ್ ಆಗಿದೆ. ರಾತ್ರಿ ಸಮಯದಲ್ಲಿ ಮನೆಯ ಅಡುಗೆ ಕೋಣೆ ಕಿಟಕಿ ಸರಳುಗಳನ್ನು ಮುರಿದಿರುವ ಆನೆ ಸೊಂಡಿಲಿನಿಂದಲೇ ಅಡುಗೆ ಮನೆ ಒಳಗಡೆ ಏನಾದ್ರೂ ತಿನ್ನುವುದಕ್ಕೆ ಸಿಗುತ್ತಾ ಅಂತ ಹುಡುಕಾಟ ನಡೆಸಿದೆ.
ಈ ವೇಳೆ ಅಲ್ಲಿದ್ದ ಪಾತ್ರೆಗಳು ಸೇರಿದಂತೆ ಇತರ ವಸ್ತುಗಳನ್ನೆಲ್ಲಾ ಚೆಲ್ಲಾಪಿಲ್ಲಿಯಾಗಿ ಎಸೆದಿದೆ. ಸೊಂಡಿಲಿಗೆ ಸಿಕ್ಕ ಎಲ್ಲ ಕಬೋರ್ಡ್‌ಗಳನ್ನು ತೆರೆದು ಶೋಧ ನಡೆಸಿದೆ. ಚಿಕ್ಕ ಕಬೋರ್ಡ್‌ವೊಂದನ್ನು ತೆರೆದು ಅದರಲ್ಲಿ ಏನೂ ಸಿಗದಿದ್ದಾಗ ಮತ್ತೆ ಸೊಂಡಿಲಿನಿಂದಲೇ ಮುಚ್ಚಿದೆ.
ಮನೆಯ ಹಾಲ್‌ನಲ್ಲಿದ್ದವರು ಈ ವಿಡಿಯೋವನ್ನು ಸೆರೆ ಹಿಡಿದಿದ್ದು, ಭಾರಿ ವೈರಲ್ ಆಗಿದೆ. ವಿಡಿಯೋ ನೋಡಿದ ನೆಟ್ಟಿಗರು ತಮ್ಮದೇ ಧಾಟಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ.
''ಆನೆ ಸೊಂಡಿಲಿನಿಂದ ಚಿಕ್ಕ ಕಬೋರ್ಡ್‌ ಅನ್ನು ತೆರೆಯುತ್ತಿರುವುದು ಇಷ್ಟವಾಯಿತು. ಆದರೆ, ಏನೂ ಸಿಗಲಿಲ್ಲ ಮತ್ತೆ ಅದನ್ನು ಮುಚ್ಚಿದೆ'' ಎಂದು ಸುತಿಕ್ಷಾರಾಮ್‌ ಎಂಬುವವರು ಕಾಮೆಂಟ್‌ ಮಾಡಿದ್ದಾರೆ. ''
''ಇದು ಗುರುಪುರದ ಟಿಬೆಟ್‌ ಕ್ಯಾಂಪ್‌ನದ್ದು'' ಎಂದು ಸಂತೋಶ್‌ ಕುಮಾರ್‌ ಎಂಬುವರು ಹೇಳಿದ್ದಾರೆ.
ಆನೆ ಅಡುಗೆ ಮನೆಗೆ ನುಗ್ಗಿ ಆಹಾರ ಹುಡುಕಾಡಿದ್ದ ಇಂತಹದ್ದೇ ಘಟನೆ ಈ ಹಿಂದೆಯೂ ನಡೆದಿತ್ತು.
ಇದನ್ನೂ ಓದಿ: ಆಹಾರ ಹುಡುಕುತ್ತ ಬಂದು, ಅಡುಗೆ ಮನೆಯ ಗೋಡೆ ಒಡೆದು ಹಾಕಿದ ಕಾಡಾನೆ!
