ಸುವರ್ಣಪುರ(ಒಡಿಶಾ): ಜಿಲ್ಲೆಯಲ್ಲಿ 80 ವರ್ಷದ ವೃದ್ಧೆಯೊಬ್ಬರು 20 ಅಡಿ ಆಳದ ಬೋರ್ವೆಲ್ಗೆ ಬಿದ್ದಿದ್ದಾರೆ. ಹಲವಾರು ಗಂಟೆಗಳ ಕಾಲ ಕಾರ್ಯಾಚರಣೆ ನಡೆಸಿ ಗಂಭೀರ ಸ್ಥಿತಿಯಲ್ಲಿ ವೃದ್ಧೆಯನ್ನು ರಕ್ಷಿಸಲಾಗಿದೆ ಎಂದು ಪೊಲೀಸರು ಮಂಗಳವಾರ ತಿಳಿಸಿದ್ದಾರೆ. ಸುವರ್ಣಪುರ ಜಿಲ್ಲೆಯ ಕೆಕುಫುಲ್ ಗ್ರಾಮದಲ್ಲಿ ಈ ಘಟನೆ ನಡೆದಿದೆ.
ಮಾಹಿತಿ ಪ್ರಕಾರ, ಸುವರ್ಣಪುರ ಜಿಲ್ಲೆಯ ಗೋಬಿಂದಪುರ ಗ್ರಾಮದಲ್ಲಿ ತನ್ನ ಮಗಳ ಮನೆಗೆ ಸಂತ್ರಸ್ತೆ ದುಖಿ ನಾಯ್ಕ್ ಬಂದಿದ್ದರು. ಸೋಮವಾರ ಸೋನ್‌ಪುರ ಬುರ್ದಾ ರಸ್ತೆಯ ಕನೆಫುಲ್ ಗ್ರಾಮಕ್ಕೆ ಕಸಬರಿಕೆ ತಯಾರಿಸಲು ಗರಿಗಳನ್ನು ಹಾರಿಸಲು ತೆರಳಿದ್ದರು. ಅಷ್ಟರಲ್ಲಿ ಅಲ್ಲಿಯೇ ಇದ್ದ ಬೋರ್ವೆಲ್ಗೆ ಬಿದ್ದಿದ್ದಾರೆ. ಈ ಸಂಗತಿ ಯಾರಿಗೂ ತಿಳಿದಿರಲಿಲ್ಲ.
ವೃದ್ಧೆ ನಾಪತ್ತೆಯಾದ ಕಾರಣ ಸಂಬಂಧಿಕರು ಮತ್ತು ಸ್ಥಳೀಯರು ರಾತ್ರಿಯಿಡೀ ಹುಡುಕಿದರು ಪ್ರಯೋಜನವಾಗಿರಲಿಲ್ಲ. ಬಳಿಕ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಮಂಗಳವಾರ ಬೆಳಗ್ಗೆ ಬೋರ್ವೆಲ್ನಲ್ಲಿ ಆಕೆ ಪತ್ತೆಯಾಗಿದ್ದು, ಕೂಡಲೇ ಅಗ್ನಿಶಾಮಕ ಸೇವೆಗಳು ಮತ್ತು ಒಡಿಶಾ ವಿಪತ್ತು ಕ್ಷಿಪ್ರ ಕಾರ್ಯಾಚರಣೆ ಪಡೆ (ODRAF) ರಕ್ಷಣಾ ಕಾರ್ಯಾಚರಣೆ ಪ್ರಾರಂಭಿಸಿತು.
ಇನ್ನು ವೃದ್ಧೆಗೆ ಕಿವಿ ಕೇಳಿಸುವುದಿಲ್ಲವಂತೆ. ಅಷ್ಟೇ ಅಲ್ಲ ಅಜ್ಜಿಗೆ ಮಾತನಾಡಲು ಸಹ ಸಾಧ್ಯವಾಗುವುದಿಲ್ಲ ಎಂದು ಸಂತ್ರಸ್ತೆಯ ಕುಟುಂಬಸ್ಥರು ಹೇಳಿಕೊಂಡಿದ್ದಾರೆ. ರಕ್ಷಣಾ ತಂಡವು ವೃದ್ಧೆಯ ಉಸಿರಾಟಕ್ಕೆ ಸಹಾಯ ಮಾಡಲು ಬೋರ್ವೆಲ್ಗೆ ಆಮ್ಲಜನಕವನ್ನು ಪೂರೈಸಿತ್ತು. ಆಕೆಯನ್ನು ಬೋರ್ವೆಲ್ನಿಂದ ಹೊರಗೆ ತರಲು ಬೋರ್ವೆಲ್ ಪಕ್ಕದಲ್ಲಿ ಜೆಸಿಬಿ ಮೂಲಕ ಭೂಮಿಯನ್ನು ಅಗೆಯಲಾಯಿತು. ಸುಮಾರು 10 ಗಂಟೆಗಳ ಕಾಲ ರಕ್ಷಣಾ ಕಾರ್ಯಾಚರಣೆ ನಡೆಸಿ ವೃದ್ಧೆಯನ್ನು ರಕ್ಷಿಸಲಾಗಿದೆ.
ರಕ್ಷಿಸಿದ ನಂತರ ಆಕೆಯ ಹಾರ್ಟ್ಬೀಟ್ ತೀರಾ ಕಡಿಮೆಯಾಗಿದ್ದು, ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು ಎಂದು ಸೋನೆಪುರ ಪೊಲೀಸ್ ವರಿಷ್ಠಾಧಿಕಾರಿ ಅಮರೇಶ್ ಪಾಂಡಾ ತಿಳಿಸಿದ್ದಾರೆ. ಆದ್ರೆ ಮಹಿಳೆ ಬದುಕುಳಿಯಲಿಲ್ಲ. ಚಿಕಿತ್ಸೆ ಫಲಿಸದೇ ವೃದ್ಧೆ ಸಾವನ್ನಪ್ಪಿದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ.
ಬೋರ್ವೆಲ್ನಲ್ಲಿ ಹಾವು ಪತ್ತೆ; ವೃದ್ಧೆ ಬಿದ್ದಿದ್ದ ಬೋರ್ವೆಲ್ನಲ್ಲಿ ಹಾವು ಕೂಡ ಪತ್ತೆಯಾಗಿದೆ. ಆದರೆ ಆಕೆಗೆ ಹಾವು ಕಚ್ಚಿದೆಯಾ, ಎಂಬುದು ಇನ್ನೂ ದೃಢಪಟ್ಟಿಲ್ಲ. ಮರಣೋತ್ತರ ಪರೀಕ್ಷೆ ಬಳಿಕ ವೃದ್ಧೆಯ ಸಾವಿಗೆ ನಿಖರ ಕಾರಣ ತಿಳಿಯಲಿದೆ.
ಸಂತ್ರಸ್ತೆಯನ್ನು ರಕ್ಷಿಸಲು ನಾವು ಬೋರ್ವೆಲ್ ಹತ್ತಿರ ಭೂಮಿಯನ್ನು ಅಗೆಯಬೇಕಾಯಿತು. ಶೋಧ ಕಾರ್ಯಾಚರಣೆಯ ಸಮಯದಲ್ಲಿ ನಾವು ಅವರನ್ನು ನೋಡಿದ್ದೇವೆ. ಆದರೆ ಅವರು ನಮ್ಮ ಆಜ್ಞೆಗಳಿಗೆ ಸ್ಪಂದಿಸಲಿಲ್ಲ ಎಂದು ಸಹಾಯಕ ಅಗ್ನಿಶಾಮಕ ಅಧಿಕಾರಿ ಧನಂಜಯ್ ಮಲ್ಲಿಕ್ ಹೇಳಿದ್ದಾರೆ.
ರಕ್ಷಣಾ ಕಾರ್ಯಾಚರಣೆ ವೇಳೆ ಮಹಿಳೆಗೆ ಆಮ್ಲಜನಕವನ್ನು ಸರಬರಾಜು ಮಾಡಲಾಗಿತ್ತು. ಭೂಮಿಯನ್ನು ಸಮಾನಾಂತರವಾಗಿ ಅಗೆಯಲಾಗಿತ್ತು ಎಂದು ಅಗ್ನಿಶಾಮಕ ಸೇವೆಗಳ ಡಿಜಿ ಸುಧಾಂಶು ಸಾರಂಗಿ ಸುದ್ದಿಗಾರರಿಗೆ ತಿಳಿಸಿದರು.
ಓದಿ: ಬೆಂಗಳೂರಲ್ಲಿ ಮತ್ತೆ ಹುಸಿ ಬಾಂಬ್ ಕರೆ: ಕಂಪನಿಯನ್ನು ಬೆಚ್ಚಿಬೀಳಿಸಿದ ಮಹಿಳಾ ಮಾಜಿ ಉದ್ಯೋಗಿ!
