ನವದೆಹಲಿ: ದರೋಡೆ ಪ್ರಕರಣದ ಆರೋಪಿಯ ಮನೆ ಮೇಲೆ ಪೊಲೀಸರ ದಾಳಿ ವೇಳೆ ವ್ಯಕ್ತಿಯ ಮೇಲೆ ಹಲ್ಲೆ ಮತ್ತು ವ್ಯಕ್ತಿಯ ಮನೆಯಲ್ಲಿದ್ದ ಸಾಕುನಾಯಿಯ ಸಾವಿಗೆ ಕಾರಣವಾದ ಆರೋಪದ ಮೇಲೆ ಸುಮಾರು 9 ಮಂದಿ ಪೊಲೀಸರ ವಿರುದ್ಧ ಎಫ್ಐಆರ್ ದಾಖಲು ಮಾಡಿಕೊಳ್ಳಬೇಕು ಎಂದು ದೆಹಲಿಯ ರೋಹಿಣಿ ಕೋರ್ಟ್ ಜಿಲ್ಲೆಯ ಡಿಸಿಪಿಗೆ ನಿರ್ದೇಶನ ನೀಡಿದೆ.
ರೋಹಿಣಿ ಕೋರ್ಟ್ನ ಹೆಚ್ಚುವರಿ ಮುಖ್ಯ ಮೆಟ್ರೋಪಾಲಿಟನ್ ಮ್ಯಾಜಿಸ್ಟ್ರೇಟ್ ಬಬ್ರು ಭಾನ್ ಈ ರೀತಿಯ ಆದೇಶ ನೀಡಿದ್ದು, ಜನವರಿ ಮೂರರಂದು ಈ ಪ್ರಕರಣದ ಕುರಿತು ಸಂಪೂರ್ಣ ವರದಿ ನೀಡುವಂತೆ ಪೊಲೀಸ್ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ.
ಡಿಸೆಂಬರ್ 8ರಂದು ದೆಹಲಿಯ ಬೇಗಂಪುರ ಪೊಲೀಸರು, ದರೋಡೆ ಪ್ರಕರಣವೊಂದರ ಆರೋಪಿಯಾದ ಪ್ರಿನ್ಸ್ ಗಿಲ್ ಎಂಬುವವರ ಮನೆಗೆ ನುಗ್ಗಿದ್ದರು. ಈ ವೇಳೆ, ಹಲ್ಲೆ ನಡೆಸಿದ್ದು, ಮಾತ್ರವಲ್ಲದೇ ಪ್ರಿನ್ಸ್ ಗಿಲ್ ಮನೆಯ ಸಾಕು ನಾಯಿಯ ಮೇಲೆ ಪಿಟ್ಬುಲ್ ನಾಯಿಯನ್ನು ಛೂ ಬಿಟ್ಟಿದ್ದರು ಎಂದು ಪ್ರಿನ್ಸ್ ಗಿಲ್ ಮನೆಯವರು ಆರೋಪಿಸಿದ್ದಾರೆ.
ಸಾಕುನಾಯಿ ಪಿಟ್ಬುಲ್ ನಾಯಿಯೊಂದಿಗೆ ಹೋರಾಡುತ್ತಿತ್ತು. ಪೊಲೀಸರು ಅದನ್ನು ಹುರಿದುಂಬಿಸುತ್ತಿದ್ದರು ಎಂದು ಪ್ರಿನ್ಸ್ ಗಿಲ್ ಕುಟುಂಬಸ್ಥರು ಆರೋಪಿಸಿದ್ದಾರೆ. ಇದರೊಂದಿಗೆ ಮನೆಯವರು ಮೊಬೈಲ್ನಲ್ಲಿ ದೃಶ್ಯವನ್ನು ರೆಕಾರ್ಡ್ ಮಾಡಿದ್ದು, ಕೋರ್ಟ್ಗೆ ನೀಡಿದ್ದಾರೆ. ತೀವ್ರವಾಗಿ ಗಾಯಗೊಂಡಿದ್ದ ಸಾಕುನಾಯಿ ನಂತರ ಸಾವನ್ನಪ್ಪಿದೆ.
ಈ ಪ್ರಕರಣದ ವಿಚಾರಣೆ ನಡೆಸಿದ ರೋಹಿಣಿ ಕೋರ್ಟ್ ಪ್ರಕರಣದಲ್ಲಿ ಭಾಗಿಯಾಗಿದ್ದ ಎಲ್ಲಾ 9 ಮಂದಿ ಪೊಲೀಸರ ಮೇಲೆ ಎಫ್ಐಆರ್ ದಾಖಲು ಮಾಡಿಕೊಳ್ಳುವಂತೆ ಸೂಚನೆ ನೀಡಿದೆ. ಅದರ ಜೊತೆಗೆ ಜನವರಿ ಮೂರರಂದು ವರದಿ ಸಲ್ಲಿಕೆಗೆ ನಿರ್ದೇಶನ ನೀಡಿದೆ.
ಇದನ್ನೂ ಓದಿ: ಬೆಂಗಳೂರಿನ ಮಸೀದಿ ಕಾಂಪ್ಲೆಕ್ಸ್ನಲ್ಲಿ ಸಿಲಿಂಡರ್ ಸ್ಫೋಟ: ಇಬ್ಬರಿಗೆ ಗಾಯ
