ನವದೆಹಲಿ/ಗಾಜಿಯಾಬಾದ್ : ಇತ್ತೀಚಿನ ದಿನಗಳಲ್ಲಿ ರಾಷ್ಟ್ರ ರಾಜಧಾನಿ ನವದೆಹಲಿ ಒಂದಲ್ಲೊಂದು ಅಪರಾಧ ಕೃತ್ಯಗಳಿಂದ ಮುನ್ನಲೆಗೆ ಬರುತ್ತಲೇ ಇದೆ. ಇದೀಗ ಗೇಮಿಂಗ್ ಆ್ಯಪ್ ಮೂಲಕ ಬಾಲಕನ ಮತಾಂತರ ಪ್ರಕರಣದಲ್ಲಿ ಕೇಂದ್ರ ಗುಪ್ತಚರ ಇಲಾಖೆ (ಐಬಿ) ಮಧ್ಯಪ್ರವೇಶಿಸಿದೆ. ಈ ಹಿಂದೆ ಗಾಜಿಯಾಬಾದ್ ಪೊಲೀಸರು ಗೇಮಿಂಗ್ ಆ್ಯಪ್ ಮೂಲಕ ಮತಾಂತರ ಮಾಡುತ್ತಿದ್ದ ಗ್ಯಾಂಗ್‌ನ ಸದಸ್ಯರನ್ನು ಬಂಧಿಸಿದ್ದರು. ಪ್ರಕರಣ ಸಂಬಂಧ ಐಬಿ ಕೂಡ ವಿಶೇಷ ನಿಗಾ ಇಟ್ಟಿದೆ ಎಂದು ಮೂಲಗಳು ತಿಳಿಸಿವೆ.
ಈ ಪ್ರಕರಣದಲ್ಲಿ ಮೇ 4 ರಂದು (ಭಾನುವಾರ) ಗಾಜಿಯಾಬಾದ್ ಪೊಲೀಸರು ಮೌಲಾನ ಅಬ್ದುಲ್ ಎಂಬಾತನನ್ನು ಬಂಧಿಸಿದ್ದರು. ಪ್ರಮುಖ ಆರೋಪಿ ಮಹಾರಾಷ್ಟ್ರದಲ್ಲಿ ನೆಲೆಸಿದ್ದು, ಆತನಿಗಾಗಿ ಗಾಜಿಯಾಬಾದ್ ಪೊಲೀಸರ ತಂಡ ಮಹಾರಾಷ್ಟ್ರಕ್ಕೆ ತೆರಳಿದೆ. ಭಯೋತ್ಪಾದಕರ ಜೊತೆಗೂ ಆರೋಪಿಗಳು ಒಡನಾಟ ಹೊಂದಿರುವುದು ತನಿಖೆಯಲ್ಲಿ ತಿಳಿದು ಬಂದಿದೆ.
ಪ್ರಕರಣದ ಹಿನ್ನೆಲೆ: ಗಾಜಿಯಾಬಾದ್‌ನ ಕವಿನಗರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಕೆಲವು ದಿನಗಳ ಹಿಂದೆ ಜೈನ ಸಮುದಾಯದ ಕುಟುಂಬವೊಂದು ಗೇಮಿಂಗ್ ಆ್ಯಪ್ನಲ್ಲಿ ಮತಾಂತರ ಜಾಲದಲ್ಲಿ ಸಿಕ್ಕಿ ಹಾಕಿಕೊಂಡಿತ್ತು. ಆನೇಕ ಆಮಿಷಗಳನ್ನೊಡ್ಡಿ ನಮ್ಮ ಮಗನಿಗೆ ಅನ್ಯ ಧರ್ಮದ ಪಾಠಗಳನ್ನು ಕಲಿಸಲಾಗುತ್ತಿದೆ ಎಂದು ಆ ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಿದ್ದರು. ಅಷ್ಟೇ ಅಲ್ಲ, ಆನ್ ಲೈನ್ ಮೂಲಕ ಮತಾಂತರ ನಡೆಯುತ್ತಿದೆ. ಮಹಾರಾಷ್ಟ್ರ ಮೂಲದ ಶಹನವಾಜ್ ಖಾನ್ ಎಂಬ ವ್ಯಕ್ತಿ ತನ್ನ ಹೆಸರನ್ನು ಬಡ್ಡೋ ಎಂದು ಬದಲಿಸಿಕೊಂಡು ಪ್ರಕರಣದಲ್ಲಿ ಪ್ರಮುಖ ಆರೋಪಿಯಾಗಿದ್ದಾನೆ ಎಂದು ಅವರು ದೂರಿನಲ್ಲಿ ಉಲ್ಲೇಖಿಸಿದ್ದರು.
ಇತ್ತ ಪಕ್ರರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದ ಪೊಲೀಸರಿಗೆ ಅಚ್ಚರಿ ಸಂಗತಿ ಗೊತ್ತಾಗಿತ್ತು. ಈ ಕುರಿತು ಮಾಹಿತಿ ನೀಡಿರುವ ಡಿಸಿಪಿ ಪ್ರಕಾರ, ಹದಿಹರೆಯದವರನ್ನು ಫೋರ್ಟ್‌ನೈಟ್ ಗೇಮಿಂಗ್ ಅಪ್ಲಿಕೇಶನ್ ಮೂಲಕ ಆಕರ್ಷಿತರಾಗುವಂತೆ ಮಾಡುತ್ತಿದ್ದು, ಆ್ಯಪ್ನಲ್ಲಿ ಮುಸ್ಲಿಂ ಹುಡುಗರು ಹಿಂದೂಗಳಂತೆ ನಟಿಸುವ ಮೂಲಕ ಹುಡುಗರನ್ನು ಈ ಆಟವಾಡಲು ಆಕರ್ಷಿಸುತ್ತಿದ್ದರು. ನಂತರ ಆಟದಲ್ಲಿ ಗೆಲ್ಲಲು ಮಕ್ಕಳಿಗೆ ಧಾರ್ಮಿಕ ಪದ್ಯಗಳನ್ನು ಹೇಳುವಂತೆ ಸೂಚಿಸುತ್ತಿದ್ದರು. ಇದರೊಂದಿಗೆ ಚಾಟ್ ಅಪ್ಲಿಕೇಶನ್‌ನಲ್ಲಿ ನಿಷೇಧಿತ ವ್ಯಕ್ತಿ ಝಾಕಿರ್‌ನ ವಿಡಿಯೋ ತೋರಿಸಿ ಮತಾಂತರಕ್ಕೆ ಆ ಮಕ್ಕಳು ಪ್ರೇರೇಪಿಸಿದ್ದರು. ಮತಾಂತರಗೊಂಡ ನಂತರ, ಇತರೆ ವಿಡಿಯೋಗಳನ್ನು ಸಹ ಅವರೊಂದಿಗೆ ಹಂಚಿಕೊಳ್ಳಲಾಗುತ್ತಿತ್ತು ಎಂದು ಹೇಳಿದ್ದಾರೆ.
ಈ ಪ್ರಕರಣದಲ್ಲಿ ಒಟ್ಟು 4 ಅಪ್ರಾಪ್ತರು ಸಿಲುಕಿಕೊಂಡಿದ್ದು, ಈಗಾಗಲೇ ಮತಾಂತರಗೊಂಡಿರುವ ಇಬ್ಬರು ಅಪ್ರಾಪ್ತರು ಗಾಜಿಯಾಬಾದ್‌ನ ನಿವಾಸಿಗಳು ಹಾಗು ಒಬ್ಬ ಫರಿದಾಬಾದ್‌ನ ನಿವಾಸಿ ಎಂದು ತಿಳಿದು ಬಂದಿದೆ. ಇದಲ್ಲದೇ ಚಂಡೀಗಢದ ಬಾಲಕನೊಬ್ಬ ಮತಾಂತರಗೊಂಡಿರುವ ಬಗ್ಗೆಯೂ ಮಾಹಿತಿ ಹೊರ ಬಿದ್ದಿದೆ. ಪೊಲೀಸರು ವಿಸ್ತೃತ ತನಿಖೆ ನಡೆಸುತ್ತಿದ್ದು, ಆರೋಪಿಗಳು ಮಕ್ಕಳ ಅಫಿಡವಿಟ್‌ನಲ್ಲಿ ಸಹಿ ಮಾಡಿದ್ದು, ಯಾವುದೇ ಒತ್ತಡವಿಲ್ಲದೆ ಅನ್ಯ ಧರ್ಮ ಸ್ವೀಕರಿಸಿದ್ದಾರೆ ಎಂದು ಪ್ರಕರಣವನ್ನು ವಿವರಿಸಿದ್ದಾರೆ.
ಇದನ್ನೂ ಓದಿ : ಮತಾಂತರಕ್ಕಾಗಿ ಬಲವಂತದ ಮದುವೆಗೆ ಒತ್ತಡ: ರೂಪದರ್ಶಿ ಗಂಭೀರ ಆರೋಪ
