ಆಗ್ರಾ (ಉತ್ತರ ಪ್ರದೇಶ): ಹಿರಿಯ ಸೇನಾಧಿಕಾರಿಯ ಅಪ್ರಾಪ್ತ ಮಗಳ ಮೇಲೆ ಅತ್ಯಾಚಾರ ಎಸಗಿದ ಗಂಭೀರ ಸ್ವರೂಪದ ಪ್ರಕರಣದಲ್ಲಿ ಭಾರತೀಯ ಸೇನೆಯ ಕಮಾಂಡರ್ವೊಬ್ಬರಿಗೆ ಉತ್ತರ ಪ್ರದೇಶದ ಆಗ್ರಾ ನ್ಯಾಯಾಲಯ ಜೀವಾವಧಿ ಶಿಕ್ಷೆ ವಿಧಿಸಿ ಮಹತ್ವದ ಆದೇಶ ಹೊರಡಿಸಿತು. ಅಪರಾಧಿಗೆ ಒಂದು ಲಕ್ಷ ರೂಪಾಯಿ ದಂಡವನ್ನೂ ಹಾಕಿರುವ ಕೋರ್ಟ್, ''ಇದೊಂದು ಸಾಮಾನ್ಯ ಅತ್ಯಾಚಾರ ಪ್ರಕರಣವಲ್ಲ'' ಎಂದು ತೀರ್ಪಿನಲ್ಲಿ ಉಲ್ಲೇಖಿಸಿದೆ.
ಹತ್ತು ವರ್ಷಗಳ ಹಿಂದೆ ನಡೆದ ಪ್ರಕರಣವಿದು. ಮಣಿಪುರದ ತೌಬಲ್ ಮೂಲದ ಸೇನಾ ಕಮಾಂಡರ್ ಎನ್. ಘನಶ್ಯಾಮ್ ಪೋಕ್ಸೋ ಕಾಯ್ದೆಯಡಿ ಜೀವಾವಧಿ ಶಿಕ್ಷೆಗೆ ಗುರಿಯಾಗಿದ್ದಾರೆ. ವಿಶೇಷ ನ್ಯಾಯಾಲಯದ (ಪೋಕ್ಸೋ ಕಾಯ್ದೆ) ನ್ಯಾ. ಪ್ರಮೇಂದ್ರ ಕುಮಾರ್ ಗುರುವಾರ ತೀರ್ಪು ಪ್ರಕಟಿಸಿದ್ದಾರೆ. ''32 ವರ್ಷದ ಮತ್ತು ಈಗಾಗಲೇ ಮದುವೆಯಾಗಿರುವ ವ್ಯಕ್ತಿ, 11 ವರ್ಷದ ಬಾಲಕಿ ಮೇಲೆ ಅಪರಾಧ ಎಸಗಿದ್ದಾನೆ. ಆರೋಪಿ ಸಶಸ್ತ್ರ ಪಡೆಯಲ್ಲಿದ್ದು, ಸಂತ್ರಸ್ತೆ ಎಷ್ಟೊಂದು ಭಯಗೊಂಡಿದ್ದಳು ಎಂದರೆ, ಆರೋಪಿಯ ಕೃತ್ಯವನ್ನು ಪೋಷಕರಿಗೆ ತಿಳಿಸಲು ಆಕೆಗೆ ಏಳು ವರ್ಷಗಳಿಗೂ ಹೆಚ್ಚು ಸಮಯ ಬೇಕಾಯಿತು. ಇದು ಸಾಮಾನ್ಯ ಅತ್ಯಾಚಾರ ಅಪರಾಧವಲ್ಲ'' ಎಂದು ನ್ಯಾಯಾಧೀಶರು ಆದೇಶದಲ್ಲಿ ತಿಳಿಸಿದ್ದಾರೆ.
ಪ್ರಕರಣದ ಸಂಪೂರ್ಣ ವಿವರ: 2013ರಲ್ಲಿ ಸೇನೆಯಲ್ಲಿ ಉನ್ನತ ಹುದ್ದೆಯಲ್ಲಿದ್ದ ಅಧಿಕಾರಿಯೊಬ್ಬರ ಕುಟುಂಬ ಆಗ್ರಾದಲ್ಲಿ ನೆಲೆಸಿತ್ತು. ಈ ಅಧಿಕಾರಿಗೆ ಅಪ್ರಾಪ್ತ ಮಗಳಿದ್ದಳು. ಸೇನೆಯಲ್ಲೇ ಕಮಾಂಡರ್ ಆಗಿದ್ದ ಘನಶ್ಯಾಮ್, ಹಿರಿಯ ಅಧಿಕಾರಿ ನಿವಾಸಕ್ಕೆ ಬರುತ್ತಿದ್ದ. 2013ರ ಫೆಬ್ರವರಿಯಲ್ಲಿ ಒಂದು ದಿನ ಅಧಿಕಾರಿಯ ಮಗಳನ್ನು ಮನೆಯಲ್ಲಿ ಒಬ್ಬಂಟಿಯಾಗಿದ್ದಳು. ಇದನ್ನು ಗಮನಿಸಿದ್ದ ಆತ, ಅತ್ಯಾಚಾರವೆಸಗಿದ್ದ. ಕೃತ್ಯದ ವಿಡಿಯೋ ಚಿತ್ರೀಕರಣ ಕೂಡ ಮಾಡಿಕೊಂಡಿದ್ದ. ಹೀಗಾಗಿಯೇ ಸಂತ್ರಸ್ತೆ ಆತಂಕದಿಂದ ಯಾರಿಗೂ ವಿಷಯ ತಿಳಿಸಿರಲಿಲ್ಲ. ಇದರ ನಡುವೆ ಸಂತ್ರಸ್ತೆಯ ತಂದೆಯನ್ನು ಆಗ್ರಾದಿಂದ ಮಧ್ಯಪ್ರದೇಶದ ಭೋಪಾಲ್‌ಗೆ ವರ್ಗಾವಣೆ ಮಾಡಲಾಗಿತ್ತು. ಇದಾದ ಬಳಿಕ ಆರೋಪಿ ಕಮಾಂಡರ್ ಅಲ್ಲಿಗೂ ತಲುಪಿ ಬಾಲಕಿ ಮೇಲೆ ತನ್ನ ದುಷ್ಕೃತ್ಯ ಎಸಗಿದ್ದಾನೆ. ಅಲ್ಲದೇ, ಅಶ್ಲೀಲ ವಿಡಿಯೋಗಳನ್ನಿಟ್ಟುಕೊಂಡು ಬೆದರಿಕೆ ಹಾಕುತ್ತಿದ್ದ. ಆದ್ದರಿಂದ ನೊಂದ ಬಾಲಕಿ ಆರು ವರ್ಷಗಳ ಕಾಲ ಮೌನವಾಗಿಯೇ ಸಹಿಸಿಕೊಂಡಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.
ಕೃತ್ಯ ಬೆಳಕಿಗೆ ಬಂದಿದ್ದು ಹೇಗೆ?: ಭೋಪಾಲ್‌ನಲ್ಲಿ ಸಂತ್ರಸ್ತೆ ಶಾಲೆಗೆ ಹೋಗುತ್ತಿದ್ದಳು. ಒಂದು ದಿನ ಶಾಲೆಯಲ್ಲಿ ಪೋಕ್ಸೋ ಕಾಯ್ದೆ ಕುರಿತು ಅರಿವು ಮೂಡಿಸುವ ಕಾರ್ಯಾಗಾರ ಹಮ್ಮಿಕೊಳ್ಳಲಾಗಿತ್ತು. ಈ ವೇಳೆ, ಲೈಂಗಿಕ ಅಪರಾಧಗಳ ವಿರುದ್ಧ ದನಿ ಎತ್ತಬೇಕು. ಸುಮ್ಮನಿದ್ದರೆ ಆರೋಪಿಗಳು ಪದೇ ಪದೇ ಅಪರಾಧ ಎಸಗುತ್ತಾರೆ. ಅಂತಹ ಪ್ರಕರಣಗಳಲ್ಲಿ ತಕ್ಷಣವೇ ದೂರು ನೀಡಬೇಕು. ಇದರಿಂದ ಆರೋಪಿಗೆ ಶಿಕ್ಷೆಯಾಗುತ್ತದೆ ಎಂದು ಕಾರ್ಯಾಗಾರದಲ್ಲಿ ಪಾಲ್ಗೊಂಡಿದ್ದ ಆಪ್ತಸಮಾಲೋಚಕರು ಸಲಹೆ ನೀಡಿದ್ದರು.
ಇದೇ ಮಾತುಗಳಿಂದ ಸ್ಥೈರ್ಯ ತುಂಬಿಕೊಂಡ ಸಂತ್ರಸ್ತೆ, ಶಾಲೆಯಿಂದ ಮನೆಗೆ ಮರಳಿ ಕಮಾಂಡರ್ ತನ್ನ ಬಳಿ ನಡೆದುಕೊಂಡ ಘಟನೆಯನ್ನು ಪೋಷಕರಿಗೆ ವಿವರಿಸಿದ್ದಳು. ಈ ವೇಳೆಗೆ ಆಕೆಗೆ 18 ವರ್ಷ ವಯಸ್ಸಾಗಿತ್ತು. ಅಂತೆಯೇ, 2019ರಲ್ಲಿ ಆರೋಪಿ ಘನಶ್ಯಾಮ್ ವಿರುದ್ಧ ಭೋಪಾಲ್‌ನ ಮಹಿಳಾ ಪೊಲೀಸ್ ಠಾಣೆಯಲ್ಲಿ ಅತ್ಯಾಚಾರ ಮತ್ತು ಪೋಕ್ಸೊ ಕಾಯ್ದೆಯಡಿ ಪ್ರಕರಣವನ್ನು ಪೋಷಕರು ದಾಖಲಿಸಿದ್ದರು.
2020ರಲ್ಲಿ ಆಗ್ರಾಕ್ಕೆ ಪ್ರಕರಣ ವರ್ಗಾವಣೆ: ಮಧ್ಯಪ್ರದೇಶ ಪೊಲೀಸರು ಈ ಪ್ರಕರಣದ ತನಿಖೆಯನ್ನು ಆರಂಭಿಸಿ, ಸಂತ್ರಸ್ತೆಯ ಹೇಳಿಕೆಯನ್ನು ದಾಖಲಿಸಿಕೊಂಡಿದ್ದರು. ಇದರ ಆಧಾರದ ಮೇಲೆ ಆರಂಭಿಕ ಘಟನೆಯು ಆಗ್ರಾದಲ್ಲಿ ನಡೆದಿದ್ದ ಕಾರಣ ತನಿಖೆಯನ್ನು 2020ರಲ್ಲಿ ಆಗ್ರಾ ಪೊಲೀಸರಿಗೆ ಸ್ಥಳಾಂತರ ಮಾಡಲಾಗಿತ್ತು. ಆಗ್ರಾ ಪೊಲೀಸರು ಪ್ರಕರಣದ ಸಾಕ್ಷ್ಯಗಳನ್ನು ಸಂಗ್ರಹಿಸಿ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು. ಈ ಸಾಕ್ಷ್ಯ ಮತ್ತು ಸಾಕ್ಷಿಗಳ ಆಧಾರದ ಮೇಲೆ ಅಪರಾಧಿ ಕಮಾಂಡರ್ಗೆ ಜೀವಾವಧಿ ಶಿಕ್ಷೆ ಪ್ರಕಟಿಸಲಾಗಿದೆ.
ಇದನ್ನೂ ಓದಿ: ಉತ್ತರಪ್ರದೇಶದಲ್ಲಿ ಹರಿಯಾಣದ ಬಾಲಕಿ ಮೇಲೆ ಮೌಲ್ವಿಯಿಂದ ಅತ್ಯಾಚಾರ; ಪೊಲೀಸರಿಗೆ ದೂರು
