ನವದೆಹಲಿ: 12 ವರ್ಷ ಹಾಗೂ ಅದಕ್ಕಿಂತ ಮೇಲ್ಪಟ್ಟವರಿಗೆ ತಮ್ಮ ಕೋವಿಡ್ ಲಸಿಕೆ ಸೂಕ್ತವಾಗಿದೆ ಎಂದು ಕೇಂದ್ರ ಸರ್ಕಾರಕ್ಕೆ ಫೈಜರ್ ಮಾಹಿತಿ ನೀಡಿದೆ.
ಅಮೆರಿಕದ ಫೈಜರ್ ಹಾಗೂ ಬಯೊಎನ್ಟೆಕ್‌ ಸಂಸ್ಥೆ ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ಕೊರೊನಾ ಲಸಿಕೆಯನ್ನು 2-8 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಸಂಗ್ರಹಿಸಬಹುದು. ಕೊರೊನಾ ತಡೆಗಟ್ಟುವಲ್ಲಿ ನಮ್ಮ ಲಸಿಕೆ ಶೇಕಡಾ 91ಕ್ಕಿಂತಲೂ ಹೆಚ್ಚು ಪರಿಣಾಮಕಾರಿಯಾಗಿದೆ. ತಮ್ಮ ಕ್ಲಿನಿಕಲ್ ಪ್ರಯೋಗದ ಫಲಿತಾಂಶಗಳು, ಈ ಲಸಿಕೆ ವಯಸ್ಕರಿಗಿಂತಲೂ ಮಕ್ಕಳ ಮೇಲೆ ಪ್ರಯೋಜನಕಾರಿ ಪರಿಣಾಮ ಬೀರಲಿದೆ ಎಂಬುದನ್ನು ತೋರಿಸಿದೆ. ಹೀಗಾಗಿ 12 ವರ್ಷ ಹಾಗೂ ಅದಕ್ಕಿಂತ ಮೇಲ್ಪಟ್ಟವರಿಗೆ ನಮ್ಮ ಲಸಿಕೆ ಸೂಕ್ತ ಎಂದು ಸಂಸ್ಥೆ ತಿಳಿಸಿದೆ.
ಇದನ್ನೂ ಓದಿ: ಭಾರತದಲ್ಲಿ ಹೊಸ ಬಗೆ ಕೋವಿಡ್ ಅಟ್ಟಹಾಸ: ಅಮೆರಿಕದಲ್ಲಿ 12-15 ವಯಸ್ಸಿನ ಮಕ್ಕಳಿಗೂ ಲಸಿಕೆ
ಈಗಾಗಲೇ ಅಮೆರಿಕದಲ್ಲಿ 12 ರಿಂದ 15 ವರ್ಷ ವಯಸ್ಸಿನ ಮಕ್ಕಳಿಗೆ ಫೈಜರ್ ಲಸಿಕೆ ನೀಡಲಾಗುತ್ತಿದೆ. ಭಾರತಕ್ಕೆ ಲಸಿಕೆ ತರಲು ಕೆಲವು ಷರತ್ತುಗಳಿದ್ದು, ಕೇಂದ್ರ ಸರ್ಕಾರ ಹಾಗೂ ಫೈಜರ್ ಈ ಬಗ್ಗೆ ಚರ್ಚಿಸಿವೆ. ಷರತ್ತುಗಳಿದ್ದರೂ ಫೈಜರ್ 2021 ರಲ್ಲಿ ತನ್ನ 50 ಮಿಲಿಯನ್ ಲಸಿಕೆಗಳನ್ನು ಭಾರತಕ್ಕೆ ಪೂರೈಸುವ ನಿರೀಕ್ಷೆಯಿದೆ ಎಂದು ಮೂಲಗಳು ತಿಳಿಸಿವೆ.
ಇನ್ನು ಅಮೆರಿಕದ ಮತ್ತೊಂದು ಲಸಿಕೆ ತಯಾರಿಕಾ ಕಂಪನಿಯಾದ ಮಾಡೆರ್ನಾ ಕೂಡ, ಮುಂಬೈ ಮೂಲದ ಸಿಪ್ಲಾ ಔಷಧೀಯ ಕಂಪನಿಯೊಂದಿಗಿನ ವಿಶ್ಲೇಷಣೆಯ ಬಳಿಕ ಭಾರತದಲ್ಲಿ ತನ್ನ ಕೋವಿಡ್-19 ಲಸಿಕೆಗಳನ್ನು ತಯಾರಿಸಲು ಮುಂದಾಗಿದೆ ಎಂದು ಹೇಳಲಾಗಿದೆ. 12 ರಿಂದ 17 ವರ್ಷದ ಸುಮಾರು 3,700 ಮಕ್ಕಳನ್ನು ಅಧ್ಯಯನಕ್ಕೆ ಒಳಪಡಿಸಿರುವ ಮಾಡೆರ್ನಾ, ತನ್ನ ಲಸಿಕೆ 12 ವರ್ಷ ವಯಸ್ಸಿನ ಮಕ್ಕಳಿಗೆ ಸಹಕಾರಿಯಾಗಿದೆ ಎಂದು ಯುಸ್ ಸರ್ಕಾರಕ್ಕೆ ತಿಳಿಸಿತ್ತು.
ಇದನ್ನೂ ಓದಿ: 12 ವರ್ಷದ ಮಕ್ಕಳಿಗೆ ಕೋವಿಡ್ ಲಸಿಕೆ ಸಹಕಾರಿ ಎಂದ ಮಾಡೆರ್ನಾ
ಈ ಹಿಂದೆ ದೆಹಲಿ ಹಾಗೂ ಪಂಜಾಬ್ ಸರ್ಕಾರಗಳು ತಮ್ಮ ರಾಜ್ಯಕ್ಕೆ ಲಸಿಕೆ ಪೂರೈಸುವಂತೆ ಫೈಜರ್ ಮತ್ತು ಮಾಡೆರ್ನಾ ಕಂಪನಿಗಳಿಗೆ ಕೇಳಿದ್ದವು. ಆದರೆ ಕೇಂದ್ರ ಸರ್ಕಾರದೊಂದಿಗೆ ಒಪ್ಪಂದವಾಗದ ಕಾರಣ ನೇರವಾಗಿ ದೆಹಲಿ-ಪಂಜಾಬ್ಗೆ ವ್ಯಾಕ್ಸಿನ್ ಪೂರೈಸಲು ಫೈಜರ್ ಮತ್ತು ಮಾಡೆರ್ನಾ ನಿರಾಕರಿಸಿದ್ದವು. ಮೂರನೇ ಕೊರೊನಾ ಅಲೆಯು ಮಕ್ಕಳ ಮೇಲೆ ಹೆಚ್ಚಿನ ಪರಿಣಾಮ ಬೀರಲಿದೆ ಎಂದು ತಜ್ಞರು ಎಚ್ಚರಿಕೆ ನೀಡಿದ್ದು, ಫೈಜರ್ ಲಸಿಕೆಗೆ ಭಾರತ ಸರ್ಕಾರ ಅಸ್ತು ಎನ್ನುತ್ತದಾ ನೋಡಬೇಕಾಗಿದೆ.
