ನವದೆಹಲಿ: ದೇಶದಲ್ಲಿ ಕೊರೊನಾ ವ್ಯಾಪಕತೆ ಹೆಚ್ಚಿದ್ದರೂ, 'ಆರ್' ವ್ಯಾಲ್ಯೂ ತಗ್ಗುತ್ತಿದೆ. ಮುಂದಿನ 15 ದಿನಗಳಲ್ಲಿ ಕೊರೊನಾ ಮೂರನೇ ಅಲೆ ಉತ್ತುಂಗಕ್ಕೇರಲಿದೆ ಎಂದು ಮದ್ರಾಸ್ ಐಐಟಿ ಅಧ್ಯಯನ ತಿಳಿಸಿದೆ.
ದೇಶದಲ್ಲಿ ಆರ್ ವ್ಯಾಲ್ಯೂ(ಒಬ್ಬ ವ್ಯಕ್ತಿಯಿಂದ ಎಷ್ಟು ಮಂದಿಗೆ ಸೋಂಕು ತಗುಲುತ್ತದೆ ಎಂಬುದನ್ನು ತಿಳಿಸುವ ಪ್ರಮಾಣ) ಕುಸಿತ ಕಾಣುತ್ತಿದೆ. ಜನವರಿ 14 ರಿಂದ ಜನವರಿ 21ರ ಮಧ್ಯೆ 1.57ಕ್ಕೆ ಇಳಿದಿದೆ. ಇದು ಜನವರಿ 7 ರಿಂದ 13 ರ ನಡುವೆ 2.2 ರಷ್ಟಿತ್ತು. ಜನವರಿ 1 ರಿಂದ 6 ನಡುವೆ 4, ಡಿಸೆಂಬರ್ 25 ರಿಂದ 31 ರ ನಡುವೆ 2.9 ರಷ್ಟು ಇತ್ತು. ಇದರಿಂದ ದೇಶದಲ್ಲಿ ಕೊರೊನಾ ಸೋಂಕಿನ ತೀವ್ರತೆ ಕಡಿಮೆಯಾಗುವ ಲಕ್ಷಣವಿದೆ ಎಂದು ತಿಳಿಸಿದೆ.
ಮುಂಬೈನಲ್ಲಿ ಆರ್ ದರ 0.67, ದೆಹಲಿಯಲ್ಲಿ 0.98, ಚೆನ್ನೈನಲ್ಲಿ 1.2, ಕೋಲ್ಕತ್ತಾದಲ್ಲಿ 0.56 ಇದೆ. ಇದರಿಂದಾಗಿ ಈ ರಾಜ್ಯಗಳಲ್ಲಿ ಕೊರೊನಾ ಮೂರನೇ ಅಲೆಯ ಪ್ರಭಾವ ಮುಗಿದಿದೆ ಎಂದರ್ಥ. ಈ ಮಧ್ಯೆಯೂ ಆರ್ ವ್ಯಾಲ್ಯೂ ದರದಲ್ಲಿ ಮುಂದಿರುವ ಚೆನ್ನೈ, ದೆಹಲಿಯಲ್ಲಿ ಇನ್ನೊಂದು ಸುತ್ತಿನ ಕೊರೊನಾ ಆರ್ಭಟ ಉಂಟಾಗುವ ಸಾಧ್ಯತೆ ಇದೆ ಎಂದು ಅಧ್ಯಯನ ತಿಳಿಸಿದೆ.
ಮುಂದಿನ 14 ದಿನ ಅಂದರೆ ಫೆಬ್ರವರಿ 6 ರೊಳಗೆ ಕೊರೊನಾ ಮೂರನೇ ಅಲೆ ದೇಶದಲ್ಲಿ ಉಚ್ಛಾಯ ಸ್ಥಿತಿಗೆ ತಲುಪಿ, 15ರವರೆಗೂ ಅದು ಮುಂದುವರಿಯಲಿದೆ. ಬಳಿಕ ಅದು ಇಳಿಕೆ ಕಾಣಲಿದೆ. ಅಲ್ಲದೇ ಈ ಹಿಂದೆಯೇ ದೇಶದಲ್ಲಿ ಫೆಬ್ರವರಿಯಲ್ಲಿ ಕೊರೊನಾ ಮೂರನೇ ಅಲೆ ಕಾಣಿಸಿಕೊಳ್ಳಲಿದೆ ಎಂದು ಅಂದಾಜು ಮಾಡಲಾಗಿತ್ತು.
ಇದನ್ನೂ ಓದಿ: ಉತ್ಸವ ಮೂರ್ತಿಯಾಗಿರಲು ತಯಾರಿಲ್ಲ..ಅಧ್ಯಕ್ಷೀಯ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಸರ್ಕಿಸಿಯನ್
