ನವದೆಹಲಿ: ಬಿಹಾರ ಹಾಗೂ ಕೇರಳ ರಾಜ್ಯಗಳು ಬಾಕಿ ಉಳಿಸಿಕೊಂಡಿದ್ದ ಕೋವಿಡ್ ಸಾವಿನ ದತ್ತಾಂಶ ತಡವಾಗಿ ನೀಡಿದ ಕಾರಣ ನಿನ್ನೆ ದೇಶದಲ್ಲಿ 2,796 ಕೋವಿಡ್ ಸಾವು ವರದಿಯಾಗಿದೆ. ಒಂದೇ ಬಾರಿಗೆ ಬಿಹಾರ 2,426 ಮಂದಿ ಹಾಗೂ ಕೇರಳ 263 ಮಂದಿ ಸೋಂಕಿತರು ಮೃತಪಟ್ಟಿರುವ ಡೇಟಾ ನೀಡಿದೆ. ಈ ಮೂಲಕ ಭಾರತದಲ್ಲಿ ಕೊರೊನಾಗೆ ಬಲಿಯಾದವರ ಸಂಖ್ಯೆ 4,73,326ಕ್ಕೆ ಏರಿಕೆಯಾಗಿದೆ.
ಇನ್ನು ಕಳೆದ 24 ಗಂಟೆಗಳಲ್ಲಿ 8,895 ಮಂದಿ ಹೊಸ ಕೇಸ್ಗಳು ಪತ್ತೆಯಾಗಿದ್ದು, ಇಲ್ಲಿಯವರೆಗೆ 3,46,33,255 ಮಂದಿಗೆ ವೈರಸ್ ಅಂಟಿದೆ. ಆದರೆ ಇವರಲ್ಲಿ 3,40,60,774 ಜನರು ಸೋಂಕಿನಿಂದ ಚೇತರಿಸಿಕೊಂಡಿದ್ದಾರೆ. ಸದ್ಯ 99,155 ಕೇಸ್ಗಳು ಸಕ್ರಿಯವಾಗಿದ್ದು, ಆ್ಯಕ್ಟಿವ್ ಪ್ರಕರಣಗಳ ಪ್ರಮಾಣ ಶೇ.29ಕ್ಕೆ ಇಳಿಕೆಯಾಗಿದೆ ಎಂದು ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಮಾಹಿತಿ ನೀಡಿದೆ.
ಭಾರತದ ಶೇ.50ರಷ್ಟು ಅರ್ಹ ಮಂದಿಗೆ ವ್ಯಾಕ್ಸಿನೇಷನ್
ಕೋವಿಡ್ ವಿರುದ್ಧ ಹೋರಾಡಲು ಜನವರಿ 16ರಿಂದ ದೇಶಾದ್ಯಂತ ಕೊರೊನಾ ಲಸಿಕಾ ಅಭಿಯಾನ ಆರಂಭಿಸಲಾಗಿತ್ತು. ಈವರೆಗೆ 127.61 ಕೋಟಿಗೂ ಅಧಿಕ ಡೋಸ್ ಲಸಿಕೆ ನೀಡಲಾಗಿದ್ದು, ಭಾರತದ ಶೇ.50ರಷ್ಟು ಅರ್ಹ ಮಂದಿಗೆ ವ್ಯಾಕ್ಸಿನೇಷನ್ ಆಗಿದೆ. ನಿನ್ನೆ ಒಂದೇ ದಿನ ಒಂದು ಕೋಟಿ ಜನರಿಗೆ ವ್ಯಾಕ್ಸಿನ್ ನೀಡಿ ಭಾರತ ದಾಖಲೆ ಬರೆದಿದೆ.
ಇದನ್ನೂ ಓದಿ: ದೆಹಲಿಯಲ್ಲಿ ಮೊದಲ ಒಮಿಕ್ರಾನ್ ಕೇಸ್ ಪತ್ತೆ: ಭಾರತದಲ್ಲಿ ಒಟ್ಟು 5 ಮಂದಿಗೆ ಹೊಸ ರೂಪಾಂತರಿ
5 ಒಮಿಕ್ರಾನ್ ಕೇಸ್
ಡಿಸೆಂಬರ್ 2ರಂದು ಭಾರತದ ಮೊದಲೆರಡು ಒಮಿಕ್ರಾನ್ ಪ್ರಕರಣಗಳು ಕರ್ನಾಟಕದಲ್ಲಿ ವರದಿಯಾಗಿದ್ದವು. ಮೂರು ಮತ್ತು ನಾಲ್ಕನೇ ಕೇಸ್ ನಿನ್ನೆ ಗುಜರಾತ್ ಹಾಗೂ ಮಹಾರಾಷ್ಟ್ರದಲ್ಲಿ ವರದಿಯಾಗಿವೆ. ಇದೀಗ ಐದನೇ ಪ್ರಕರಣ ದೆಹಲಿಯಲ್ಲಿ ಪತ್ತೆಯಾಗಿದೆ.
