ಸಿಕಂದ್ರಾಬಾದ್(ತೆಲಂಗಾಣ): ಲಗ್ನಪತ್ರಿಕೆಯಲ್ಲಿ ಹೆಸರು ಹಾಕುವ ವಿಚಾರಕ್ಕೆ ಶುರುವಾದ ಜಗಳ ತಾರಕಕ್ಕೇರಿ ಕತ್ತಿಯಲ್ಲಿ ಹೊಡೆದಾಡುವವರೆಗೆ ನಡೆದಿದೆ. ಈ ಘಟನೆ ಹೈದರಾಬಾದ್ನ ಸಿಕಂದ್ರಾಬಾದ್ ತುಕಾರಾಂಗೇಟ್ ಪೊಲೀಸ್ ಸ್ಟೇಷನ್ ವ್ಯಾಪ್ತಿಯ ಚಂದ್ರಶೇಖರ್ ನಗರದಲ್ಲಿ ನಡೆದಿದೆ.
ಕಳೆದ ಮೂರು ದಿನಗಳ ಹಿಂದೆ, ಚಂದ್ರನಗರ ನಿವಾಸಿ ಸುರೇಶ್ ಎಂಬ ಯುವಕನ ವಿವಾಹ ನಡೆದಿದೆ. ಆದ್ರೆ ಲಗ್ನಪತ್ರಿಕೆಯಲ್ಲಿ ತನ್ನ ಹೆಸರು ಯಾಕೆ ಹಾಕಿಲ್ಲ ಎಂದು ಪ್ರಶ್ನಿಸಿ ಸರ್ವೇಶ್ ಎಂಬಾತ ಮದುವೆಯ ದಿನವೇ ತಗಾದೆ ತೆಗೆದಿದ್ದ. ಮದುಮಗನ ಸಂಬಂಧಿಗಳೊಂದಿಗೆ ಮಾತಿಗಿಳಿದ ಸರ್ವೇಶ್ ಗಲಾಟೆ ಮಾಡಿದ್ದಾರೆ. ಆದ್ರೆ ಮದುವೆಗೆ ತೊಂದರೆಯಾಗುವುದು ಬೇಡವೆಂದು ಉಳಿದ ಕೆಲ ಸಂಬಂಧಿಕರು ಆತನನ್ನು ತಡೆದು ಮರುದಿನ ಮಾತುಕತೆ ನಡೆಸುವುದಾಗಿ ಸಮಾಧಾನಿಸಿದ್ದಾರೆ.
ಮಾರನೇ ದಿನ ಕುಟುಂಬಸ್ಥರು ಸರ್ವೇಶ್ ಮನೆಗೆ ತೆರಳಿದ್ದಾರೆ. ಆದ್ರೆ ಅಲ್ಲಿ ಸರ್ವೇಶ್ ಸಹೋದರ ಶೇಖರ್ ಸಂಬಂಧಿಗಳ ಮೇಲೆ ಕ್ರೋಧಗೊಂಡಿದ್ದಾನೆ. ಆವೇಶದಿಂದ ಸರ್ವೇಶ್ ಹಾಗೂ ಶೇಖರ್ ತಮ್ಮ ಮೇಲೆ ಕತ್ತಿಗಳಿಂದ ದಾಳಿ ಮಾಡಿರುವುದಾಗಿ ಕುಟುಂಬಸ್ಥರು ತಿಳಿಸಿದ್ದಾರೆ. ಈ ಘಟನೆಯಲ್ಲಿ ನಾಲ್ವರಿಗೆ ಕತ್ತಿಯೇಟು ಬಿದ್ದಿದೆ.
ಘಟನೆಯಲ್ಲಿ ಆಗಿರುವ ಗಾಯಗಳೊಂದಿಗೆ ಅವರು ನೇರವಾಗಿ ಪೊಲೀಸ್ ಠಾಣೆಗೆ ಬಂದು ದೂರು ನೀಡಿದ್ದಾರೆ. ಪೊಲೀಸರು ತಕ್ಷಣ ಗಾಯಾಳುಗಳನ್ನು ಒಸ್ಮಾನಿಯಾ ಆಸ್ಪತ್ರೆಗೆ ದಾಖಲಿಸಿದ್ದು ಇಬ್ಬರ ಪರಿಸ್ಥಿತಿ ಗಂಭೀರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಪ್ರಕರಣದಲ್ಲಿ ಆರೋಪಿಗಳು ಪರಾರಿಯಾಗಿದ್ದು, ಪೊಲೀಸರು ಕೇಸ್ ದಾಖಲಿಸಿ ತನಿಖೆ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: ವಿವಾಹೇತರ ಸಂಬಂಧ ಶಂಕೆ: ಹುಳಿಮಾವುನಲ್ಲಿ ಮಲಗಿದ್ದ ಪತ್ನಿಯ ಕತ್ತು ಕೊಯ್ದ ಪತಿ!
